വിദ്യാഭ്യാസ വായ്പ; തിരിച്ചടവ് മുടങ്ങുമ്പോള്‍ കോളജുകള്‍ക്കും ബാധ്യത ഏര്‍പ്പെടുത്തുന്ന സംവിധാനം വൈറ്റ്ഹൗസ് പരിഗണിക്കുന്നു

Wed,Mar 13,2019


വാഷിംഗ്ടണ്‍ ഡി സി: കോളജ് വിദ്യാഭ്യാസത്തിന് ഫെഡറല്‍ ഗവണ്‍മെന്റില്‍ നിന്ന് വായ്പ എടുത്ത ശേഷം വിദ്യാര്‍ഥികള്‍ അതു തിരിച്ചടിക്കാതെ വരുന്ന സാഹചര്യം എങ്ങിനെ മറികടക്കുമെന്ന് ട്രമ്പ് ഭരണകൂടം ആലോചിച്ചു വരുന്നു. തിരിച്ചടവ് മുടങ്ങുമ്പോള്‍ വിദ്യാര്‍ഥികള്‍ പഠിച്ച കോളജും, യൂണിവേഴ്‌സിറ്റിയും ഈ സാമ്പത്തികബാധ്യതയുടെ പങ്ക് വഹിക്കേണ്ടി വരുന്ന സാധ്യത വൈറ്റ്ഹൗസ് പരിഗണിച്ചു വരികയാണ്. നികുതിദായകരുടെ ഫണ്ട് ലഭിക്കുന്ന പോസ്റ്റ് സെക്കന്‍ഡറി സ്ഥാപനങ്ങളെ സ്റ്റുഡന്റ് ലോണ്‍ റിസ്‌ക് ഷെയറിംഗ് പ്രോഗ്രാമില്‍ ഉള്‍പ്പെടുത്തുന്ന വിധം എഡ്യൂക്കേഷണല്‍ ഫിനാന്‍സ് സംവിധാനം രൂപപ്പെടുത്തുന്ന കാര്യം പരിഗണിച്ചു വരികയാണെന്ന് കഴിഞ്ഞ ദിവസം പുറത്തുവിട്ട ബജറ്റ് നിര്‍ദേശത്തില്‍ വൈറ്റ്ഹൗസ് സൂചന നല്‍കി.
ഉന്നത വിദ്യാഭ്യാസം സംബന്ധിച്ച് അടുത്തു തന്നെ ഉണ്ടായേക്കാവുന്ന എക്‌സിക്യൂട്ടിവ് ഓര്‍ഡറില്‍ ഈ നിര്‍ദേശം ഉള്‍പ്പെടുത്തിയേക്കുമെന്ന് കരുതപ്പെടുന്നു. ഇതുസംബന്ധിച്ച കരടു നിര്‍ദേശത്തിന് അവസാന രൂപമായിട്ടില്ല. ഭരണകൂടം തന്നെ ഇത്തരമൊരു നിര്‍ദേശം കൊണ്ടുവരണമോ അല്ലെങ്കില്‍ കോണ്‍ഗ്രസ് ഈ വിഷയം എടുക്കണമോ എന്ന കാര്യത്തിലും വ്യക്തത കൈവന്നിട്ടില്ല. ഉന്നത വിദ്യാഭ്യാസ മേഖലയിലെ പരിഷ്‌കരണവുമായി ബന്ധപ്പെട്ട രേഖ ഇവാന്‍ക ട്രമ്പിന്റെ നേതൃത്വത്തിലാണ് തയാറാക്കപ്പെടുന്നത്. ഫെഡറല്‍ റിസര്‍ച്ച് ഫണ്ടിംഗും, കാമ്പസുകളിലെ ഫ്രീ സ്പീച്ചുമൊക്കെ പരിമതപ്പെടുത്തുന്നതുള്‍പ്പെടെ നിരവധി സുപ്രധാന വിഷയങ്ങള്‍ ഇതിലുണ്ടാകുമെന്നാണ് സൂചന. ഉന്നത വിദ്യാഭ്യാസവും, സ്റ്റുഡന്റ് ലോണും സംബന്ധിച്ച കാര്യങ്ങള്‍ വ്യക്തമാക്കുന്ന 1965 ലെ ഹയര്‍ എഡ്യൂക്കേഷന്‍ ആക്ടില്‍ കാലോചിത മാറ്റം വരുത്തുന്നതു സംബന്ധിച്ച് സെനറ്റിലെയും, ഹൗസിലെയും എഡ്യൂക്കേഷന്‍ കമ്മിറ്റി അംഗങ്ങള്‍ ചര്‍ച്ച ചെയ്യുന്ന അവസരം കൂടിയാണിത്.
റിസ്‌ക് ഷെയറിംഗ് സംബന്ധിച്ച കാര്യത്തില്‍ ഡെമോക്രാറ്റുകള്‍ ഭിന്നിച്ചു നില്‍ക്കുകയാണ്. അതേസമയം, സെനറ്റിലെ എഡ്യൂക്കേഷന്‍ കമ്മിറ്റി ചെയര്‍മാനായ റിപ്പബ്ലിക്കന്‍ പാര്‍ട്ടിയിലെ ലമാര്‍ അലക്‌സാണ്ടര്‍ ഇതിനെ പിന്തുണയ്ക്കുന്നു. ഏതെങ്കിലും വര്‍ഷത്തില്‍ ഒരു കോളജിലെ വിദ്യാര്‍ഥികളുടെ വിദ്യാഭ്യാസ വായ്പാ തിരിച്ചടവ് നിശ്ചിത ശതമാനത്തില്‍ കൂടുതലായാല്‍ പ്രസ്തുത കോളജിന് ഫെഡറല്‍ ഫണ്ടിംഗ് നഷ്ടപ്പെടുന്ന സംവിധാനം നിലവിലുണ്ട്. ഇതിനു പകരം എല്ലാ കോളജുകള്‍ക്കും ഒരേപോലെ ബാധകമാകുന്ന വിധത്തില്‍ ബാധ്യതാ സംവിധാനം ഏര്‍പ്പെടുത്തണമെന്നാണ് യാഥാസ്ഥിതികരുടെ പക്ഷം.
നിലവില്‍ ഫെഡറല്‍ വിദ്യാഭ്യാസ വായ്പ എടുക്കുന്ന വിദ്യാര്‍ഥിക്ക് മാത്രമാണ് അതിന്റെ തിരിച്ചടവില്‍ ബാധ്യതയുള്ളത്. ഒരു തൊഴില്‍ കണ്ടെത്തുന്ന വിധത്തില്‍ പ്രസ്തുത വിദ്യാര്‍ഥിയെ മാറ്റിയെടുക്കാന്‍ വിദ്യാഭ്യാസ സ്ഥാപനത്തിനു കഴിഞ്ഞോ എന്നത് പരിഗണിക്കപ്പെടുന്നില്ല. വിദ്യാര്‍ഥി വായ്പ മുടക്കിയാല്‍ നികുതിദായകര്‍ അതിന്റെ ഭാരം കൂടി വഹിക്കേണ്ടി വരുന്നു. എന്നാല്‍, വായ്പാ കുടിശിക ഭാഗികമായോ പൂര്‍ണമായോ വിദ്യാഭ്യാസ സ്ഥാഥാപനങ്ങള്‍ അടയ്ക്കണമെന്ന നിബന്ധന വന്നാല്‍ നിലവാരം കുറഞ്ഞ പ്രോഗ്രാമുകള്‍ അവര്‍ അവസാനിപ്പിക്കുമെന്നും, തിരിച്ചടവിന് സാധ്യതയില്ലാത്ത വിദ്യാര്‍ഥികള്‍ക്ക് പ്രവേശനം നിഷേധിക്കാന്‍ അവര്‍ തയാറാകുമെന്നും റിസ്‌ക് ഷെയറിംഗിനു വേണ്ടി വാദിക്കുന്നവര്‍ പറയുന്നു.
പക്ഷേ, കോളജുകളും യൂണിവേഴ്‌സിറ്റികളും പറയുന്നത് മറ്റൊന്നാണ്. ഈ സംവിധാനം നടപ്പിലാക്കിയാല്‍ കുറഞ്ഞ വരുമാനക്കാരായ വിദ്യാര്‍ഥികളെ അകറ്റി നിറുത്താനാകും സ്ഥാപനങ്ങള്‍ ശ്രമിക്കുകയെന്നും ചരിത്രപരമായ കറുത്ത വര്‍ഗക്കാര്‍ കൂടുതല്‍ പഠിക്കുന്ന സ്ഥാപനങ്ങളെയും, ലാഭം നോക്കാതെ പ്രവര്‍ത്തിക്കുന്ന സ്ഥാപനങ്ങളെയും അത് ദോഷകരമായി ബാധിക്കുമെന്നും അവര്‍ ചൂണ്ടിക്കാട്ടുന്നു. ഇക്കാരണത്താല്‍ റിസക് ഷെയറിംഗ് ഗുണത്തേക്കാള്‍ ദോഷം ചെയ്യാനാണ് സാധ്യതയെന്ന് അമേരിക്കന്‍ കൗണ്‍സില്‍ ഓണ്‍ എഡ്യൂക്കേഷന്റെ ഡയറക്ടര്‍ ജോനാഥന്‍ ഫാന്‍സ്മിത്ത് ചൂണ്ടിക്കാട്ടി.

Other News

  • സിഖുകാരനെ ആക്രമിച്ച യുവാവിന് ലഭിച്ച ശിക്ഷ സിഖ് മതത്തെക്കുറിച്ചുള്ള പഠനവും മൂന്നുവര്‍ഷത്തെ തടവും
  • ഒക്‌ലഹോമയില്‍ ടൊര്‍ണാഡോ; രണ്ടു പേര്‍ കൊല്ലപ്പെട്ടു, വന്‍ നാശം
  • അതിര്‍ത്തി മതില്‍ നിര്‍മിക്കാന്‍ പ്രതിരോധ വകുപ്പിന്റെ ഫണ്ട് വകമാറ്റിയ ട്രമ്പിന്റെ നടപടി കോടതി തടഞ്ഞു
  • സുഷമ സ്വരാജിന്റെ യാത്രയ്ക്ക് പാക്കിസ്ഥാന്‍ വ്യോമപാത തുറന്നു കൊടുത്തു
  • ഉത്തരകൊറിയയുടെ മിസൈല്‍ പരീക്ഷണങ്ങളെ നിസാരവല്‍ക്കരിച്ച് ട്രമ്പ്; അവര്‍ നിര്‍മിച്ചത് ചെറിയ ആയുധങ്ങളെന്ന്
  • കര്‍ണാടകയില്‍ അട്ടിമറി നീക്കം സജീവം: ഓപ്പറേഷന്‍ താമര; രണ്ട് കോണ്‍ഗ്രസ് എംഎല്‍എമാര്‍ ബിജെപി നേതാക്കളെ കണ്ടു
  • ഇറാന്‍ ഭീഷണി: കോണ്‍ഗ്രസിനെ മറികടന്ന് സൗദിക്ക് എട്ടു ബില്യണ്‍ ഡോളറിന്റെ ആയുധങ്ങള്‍ വില്‍ക്കാന്‍ ട്രമ്പിന്റെ പച്ചക്കൊടി
  • ലോകത്തിലെ ഏറ്റവും വില കൂടിയ മരുന്ന് വിപണിയിലേക്ക്; വില 2.15 മില്യണ്‍ ഡോളര്‍
  • പശ്ചിമേഷ്യയിലേക്ക്​ 10,000 സൈനികരെ അയക്കാൻ പെന്റഗണ്‍
  • നിയമാനുസൃത കുടിയേറ്റക്കാര്‍ക്ക് ഉണ്ടാകുന്ന മെഡിക്കല്‍ ഉള്‍പ്പെടെയുള്ള എല്ലാ സാമൂഹ്യക്ഷേമ ചെലവുകളും ഇനി മുതല്‍ സ്‌പോണ്‍സര്‍ തിരിച്ചടയ്ക്കണം
  • വി​ക്കി​ലീ​ക്​​സ്​ സ്​​ഥാ​പ​ക​ൻ ജൂ​ലി​യ​ൻ അ​സാ​ൻ​ജി​നെ​തി​രെ യു.​എ​സ്​ കു​റ്റം​ചു​മ​ത്തി
  • Write A Comment

     
    Reload Image
    Add code here