ന്യൂഡല്‍ഹി: ജമാഅത്തെ ഉലമാ-എ-ഹിന്ദ് പ്രസിഡന്റ് മൗലാന മഹ്മൂദ് മദനി നടത്തിയ പ്രസ്താവന രാഷ്ട്രീയ ചര്‍ച്ചകള്‍ക്ക് ഇടയാക്കി. അനീതിയുണ്ടെങ്കില്‍ ജിഹാദ് ഉണ്ടായിരിക്കുമെന്ന അദ്ദേഹത്തിന്റെ പരാമര്‍ശവും ന്യൂനപക്ഷാവകാശങ്ങള്‍ കോടതിയും സര്‍ക്കാറും ചേര്‍ന്ന് ദുര്‍ബലപ്പെടുത്തുകയാണെന്ന ആരോപണവുമാണ് വിവാദത്തിന് കാരണം.
അദ്ദേഹത്തിന്റെ പരാമര്‍ശങ്ങള്‍ മുസ്ലിംകള്‍ക്ക് തീവ്രവാദ പ്രചോദനവും ഭരണഘടനാ സ്ഥാപനങ്ങളെ വെല്ലുവിളിക്കുന്നതാണെന്നും ബി ജെ പി വിമര്‍ശിച്ചു.
മധ്യപ്രദേശിലെ ഭോപ്പാലില്‍ നടന്ന ജമാഅത്തെ ഉലമാ-എ-ഹിന്ദ് ദേശീയ ഗവണിങ് ബോഡി യോഗത്തിലാണ് മദനി പ്രസംഗിച്ചത്. ബാബരി മസ്ജിദ്, മുത്തലാഖ് തുടങ്ങിയ കേസുകളിലെ സമീപകാല കോടതിവിധികള്‍ 'സര്‍ക്കാരിന്റെ സമ്മര്‍ദ്ദത്തിലാണ്' ഉണ്ടായതെന്നായിരുന്നു മദനിയുടെ ആരോപണം. ഭരണഘടന ഉറപ്പുനല്‍കുന്ന ന്യൂനപക്ഷാവകാശങ്ങളെ ഇതുവഴി ലംഘിച്ചതെന്നും അദ്ദേഹം പറഞ്ഞു.
ഭരണഘടന സംരക്ഷിക്കപ്പെടുന്നിടത്തോളം മാത്രമാണ് സുപ്രിം കോടതി 'സുപ്രിം' എന്ന് വിളിക്കപ്പെടാന്‍ അര്‍ഹതയെന്ന് അദ്ദേഹം പരാമര്‍ശിച്ചു. ഭരണഘടന പാലിക്കല്‍ നടക്കാതെ വന്നാല്‍, അതിന്റെ മഹത്തായ സ്ഥാനം ചോദ്യം ചെയ്യപ്പെടുമെന്നും മദനി വിമര്‍ശിച്ചു.
ജിഹാദിനെ തെറ്റിദ്ധരിപ്പിക്കുന്ന രീതിയില്‍ അവതരിപ്പിക്കുന്നതില്‍ മാധ്യമങ്ങളും സര്‍ക്കാരും പങ്കാളികളാണെന്ന് മദനി ആരോപിച്ചു. ലവ് ജിഹാദ്, തുപ്പു ജിഹാദ്, ലാന്‍ഡ് ജിഹാദ് പോലുള്ള പദങ്ങള്‍ ജിഹാദിന്റെ യഥാര്‍ഥ അര്‍ഥത്തെ വളച്ചൊടിക്കുന്നവയാണെന്ന് അദ്ദേഹം പറഞ്ഞു.
ജിഹാദ് എന്നും വിശുദ്ധമാണെന്നും മറ്റുള്ളവരുടെ നന്മയ്ക്കും സമൂഹത്തിന്റെ ക്ഷേമത്തിനുമാണ് മതഗ്രന്ഥങ്ങളില്‍ ജിഹാദ് പറയുന്നതെന്നും മദനി പ്രസ്താവിച്ചു.
ഇന്ത്യയുടെ മതനിരപേക്ഷ ജനാധിപത്യ സംവിധാനത്തില്‍ ഹിംസയ്ക്ക് സ്ഥാനം ഇല്ലെന്നും മുസ്ലിംകള്‍ ഭരണഘടനയ്ക്കുള്ള നിഷ്ഠയാണ് കാണുന്നതെന്നും അദ്ദേഹം കൂട്ടിച്ചേര്‍ത്തു.
വന്ദേ മാതരം വിഷയത്തെയും മദനി പരാമര്‍ശിച്ചു. മരിച്ച സമൂഹം മാത്രമാണ് കീഴടങ്ങുകടെന്നും 'വന്ദേ മാതരം പറയൂ' എന്നു പറഞ്ഞാല്‍ ഉടനെ പറയാന്‍ തുടങ്ങുന്ന സമൂഹം മരിച്ച സമൂഹമാകുമെന്നും ജീവിച്ചിരിക്കുന്ന സമൂഹം സാഹചര്യങ്ങളെ നേരിടുമെന്നുമാണ് അദ്ദേഹത്തിന്റെ വാക്കുകള്‍.
മദനിയുടെ പ്രസ്താവനകള്‍ക്ക് ബി ജെ പി ശക്തമായ പ്രതികരണം രേഖപ്പെടുത്തി. പാര്‍ട്ടി വക്താവും എം പിയുമായ സമ്ബിത് സ്വരാജ്, മദനിയുടെ പ്രസ്താവന രാജ്യം വിഭജിക്കാനുള്ള ശ്രമമാണെന്നും അതീവ പ്രകോപനപരമായ പ്രസ്താവനയാണെന്നും പറഞ്ഞു.
രാജ്യത്തു പുതിയ ജിന്നമാര്‍ ഉയര്‍ന്നു വരുന്നുവെന്നും അവര്‍ മുസ്ലിംകളെ പ്രേരിപ്പിക്കുകയാണെന്നും സുപ്രിം കോടതി സ്വമേധയാ കേസെടുക്കണമെന്നും മധ്യപ്രദേശ് എം എല്‍ എ രമേശ്വര്‍ ശര്‍മ്മ ആവശ്യപ്പെട്ടു.