തിരുവനന്തപുരം: തിരുവനന്തപുരം അന്താരാഷ്ട്ര വിമാനത്താവളത്തിന്റെ പരിധിയില്‍ അദാനി എയര്‍പോര്‍ട്ട് ഹോള്‍ഡിങ്‌സ് ലിമിറ്റഡ് നിര്‍മിക്കാന്‍ ഉദ്ദേശിക്കുന്ന 136 കോടി രൂപയുടെ പഞ്ചനക്ഷത്ര ഹോട്ടല്‍ പദ്ധതിക്ക് കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രാലയം അനുമതി നല്‍കി. ഏകദേശം എട്ടായിരം ചതുരശ്ര മീറ്ററില്‍ വ്യാപിച്ചു നില്‍ക്കുന്ന ഈ ഹോട്ടലില്‍ 240 മുറികളും 660 പേര്‍ക്ക് ഇരുന്ന് ഭക്ഷണം കഴിക്കാവുന്ന സൗകര്യങ്ങളും ഉള്‍പ്പെടും.
ഈ വര്‍ഷം ഓഗസ്റ്റില്‍ ചേര്‍ന്ന എക്സ്പര്‍ട്ട് അപ്രൈസല്‍ കമ്മിറ്റിയുടെ ഇന്‍ഫ്ര2 വിശദമായ പരിശോധനയ്ക്കുശേഷമാണ് അനുമതി നല്‍കിയതെന്ന് അധികൃതര്‍ അറിയിച്ചു. 2021 ജനുവരിയില്‍ വിമാനത്താവളം അതോറിറ്റിയുമായുള്ള ദീര്‍ഘകാല കണ്‍സഷന്‍ കരാറിന്റെ അടിസ്ഥാനത്തിലാണ് ഈ ഭൂമി അദാനി ഗ്രൂപ്പിന് കൈമാറിയത്.
മന്ത്രാലയത്തിന്റെ രേഖകള്‍ പ്രകാരം 23 മീറ്റര്‍ ഉയരമുള്ള അഞ്ച് നിലകളുള്ള കെട്ടിടമാണ് നിര്‍ദ്ദേശിച്ചിരിക്കുന്നത്.
വാഹന പാര്‍ക്കിംഗിന് രണ്ട് ബേസ്‌മെന്റ് നിലകള്‍, ഗ്രൗണ്ട് ഫ്‌ളോര്‍, അതിനു മുകളില്‍ നാല് നിലകള്‍ എന്നിവ ഉള്‍പ്പെടുന്ന കെട്ടിടത്തിന്റെ ആകെ നിര്‍മ്മിത വിസ്തീര്‍ണം ഏകദേശം 34,000 ചതുരശ്ര മീറ്ററായിരിക്കും.
ദിവസേന ആവശ്യമായ വെള്ളത്തിന്റെ ഏകദേശം പകുതി ഓണ്‍സൈറ്റ് എസ് ടി പിയില്‍ നിന്നും ശുദ്ധീകരിച്ച ജലം ഉപയോഗിച്ച് റീസൈക്ലിങിലൂടെ കണ്ടെത്തുമെന്നാണ് റിപ്പോര്‍ട്ട്. സോളിഡ് വേസ്റ്റ് ഓര്‍ഗാനിക് വെയ്‌സ്റ്റ് കണ്‍വെര്‍ട്ടറുകളും റിസൈക്ലിംഗ് രീതികളും ഉപയോഗിച്ച് സംസ്‌കരിക്കും.
പദ്ധതി സ്ഥലത്ത് നിലവില്‍ നില്‍ക്കുന്ന ഏകദേശം 40 മരങ്ങല്‍ വിമാനത്താവളത്തിനുള്ളിലെ മറ്റ് ഇടങ്ങളിലേക്ക് മാറ്റിപ്പിടിപ്പിക്കും.
ഗ്രീന്‍ ബെല്‍റ്റ് മേഖലയും ഊര്‍ജക്ഷമത ഉറപ്പാക്കുന്ന നടപടികളുമടക്കം വിവിധ മാനദണ്ഡങ്ങള്‍ പദ്ധതിയില്‍ ഉള്‍പ്പെടുത്തിയിട്ടുണ്ട്. ഇവ വഴി ഏകദേശം 20 ശതമാനം ഊര്‍ജ ഉപഭോഗ കുറവ് ലക്ഷ്യമിടുന്നു.
പദ്ധതി പ്രദേശം പരിസ്ഥിതി പ്രകൃതി സംരക്ഷണമേഖലയിലോ വനമേഖലയിലോ ഉള്‍പ്പെടുന്നതല്ലെന്നും പദ്ധതിക്കെതിരെ യാതൊരു കേസുകളും നിലവിലില്ലെന്നും മന്ത്രാലയം അറിയിച്ചു. കേരള സ്‌റ്റേറ്റ് എന്‍വയോണ്‍മെന്റ് ഇംപാക്ട് അസസ്‌മെന്റ് താത്ക്കാലികമായി പ്രവര്‍ത്തന രഹിതമായതിനാലാണ് ഈ അനുമതി കേന്ദ്രതലത്തില്‍ നിര്‍വഹിച്ചതെന്നും റിപ്പോര്‍ട്ടില്‍ പറയുന്നു.
ഏകദേശം മൂന്ന് വര്‍ഷമാണ് കെട്ടിട നിര്‍മാണം പൂര്‍ത്തിയാക്കാന്‍ എടുക്കുകയെന്നാണ് കണക്കാക്കുന്നത്. പദ്ധതി നടപ്പിലായാല്‍ 300 നേരിട്ടുള്ള തൊഴിലവസരങ്ങളും 900ത്തോളം പരോക്ഷ തൊഴിലവസരങ്ങളും സൃഷ്ടിക്കുമെന്ന് അധികൃതര്‍ അറിയിച്ചു.
യാത്രക്കാരുടെ സൗകര്യം വര്‍ധിപ്പിക്കാനും തിരുവനന്തപുരം നഗരത്തിലെ ടൂറിസം മേഖലയെ കൂടുതല്‍ ശക്തിപ്പെടുത്താനുമാണ് ഈ സംരംഭം ലക്ഷ്യമിടുന്നത്.
അദാനി ഗ്രൂപ്പിന്റെ എയര്‍പോര്‍ട്ട് സിറ്റി സൈഡ് ഡെവലപ്‌മെന്റ് പദ്ധതിയുടെ പ്രധാന ഘടകമാണ് ഈ ഹോട്ടല്‍. വിമാന യാത്രക്കാരെയും അദാനി തുറമുഖത്ത് എത്തുന്ന വലിയ ചരക്ക് കപ്പലുകളിലെ വിദേശ ക്രൂ അംഗങ്ങളെയുമാണ് ഈ സൗകര്യം പ്രധാനമായും ലക്ഷ്യമിടുന്നത്.