വാഷിങ്ടണ്‍ ഡി സി: നാഷണല്‍ ഗാര്‍ഡ് വെടിവെപ്പിനെ തുടര്‍ന്ന് യു എസ് എല്ലാത്തരം അഭയാര്‍ഥി അപേക്ഷകളുടെയും തീരുമാനം താത്ക്കാലികമായി നിര്‍ത്തിവച്ചു
യു എസ് ആഭ്യന്തര സുരക്ഷാ വകുപ്പിന്റെ കീഴിലുള്ള യു എസ് സിറ്റിസണ്‍ഷിപ്പ് ആന്‍ഡ് ഇമിഗ്രേഷന്‍ സര്‍വീസസ് എല്ലാ അഭയാര്‍ഥി അപേക്ഷകളുടെയും തീര്‍പ്പാക്കല്‍ നടപടികള്‍ നിര്‍ത്തിവച്ചതായി ഡയറക്ടര്‍ ജോസഫ് എഡ്‌ലോ അറിയിച്ചു. ഒരു സൈനികന്‍ കൊല്ലപ്പെടുകയും മറ്റൊരാള്‍ ഗുരുതരാവസ്ഥയില്‍ തുടരുകയും ചെയ്യുന്ന സംഭവത്തില്‍ ഒരു അഫ്ഗാന്‍ പൗരനാണ് പ്രതി.
ഓരോ വിദേശ പൗരനെയും പരമാവധി തലത്തില്‍ പരിശോധന നടത്തി ഉറപ്പാക്കിയതിനു ശേഷമേ നടപടികള്‍ പുനരാരംഭിക്കുകയുള്ളു എന്നാണ് യു എസ് സിറ്റിസണ്‍ഷിപ്പ് ആന്‍ഡ് ഇമിഗ്രേഷന്‍ സര്‍വീസസ് അറിയിച്ചത്.
മൂന്നാം ലോക രാജ്യങ്ങളില്‍ നിന്നുള്ള കുടിയേറ്റം പൂര്‍ണമായും നിര്‍ത്തിവയ്ക്കുമെന്ന് സംഭവത്തിന് ശേഷം യു എസ് പ്രസിഡന്റ് ഡൊണാള്‍ഡ് ട്രംപ് പ്രഖ്യാപിക്കുകയും അഭയാര്‍ഥി- കുടിയേറ്റ നയങ്ങളില്‍ കടുത്ത നിലപാടുകള്‍ സ്വീകരിക്കുകയും ചെയ്തു.
സി ബി സി ന്യൂസിന്റെ റിപ്പോര്‍ട്ട് പ്രകാരം എല്ലാത്തരം ദേശീയതകളിലുള്ള അഭയാര്‍ഥി അപേക്ഷകളും ഇനി അംഗീകരിക്കാനും നിരാകരിക്കാനും അവസാനിപ്പിക്കാനും പാടില്ല. അതേസമയം, ഉദ്യോഗസ്ഥര്‍ തീരുമാനമെടുക്കുന്നതിന് മുന്‍പുവരെയുള്ള പരിശോധന നടപടികള്‍ തുടരാമെന്നാണ് റിപ്പോര്‍ട്ട്. നിര്‍ദ്ദേശത്തിന്റെ കൂടുതല്‍ വിശദാംശങ്ങള്‍ പുറത്തുവന്നിട്ടില്ല.
ട്രംപ് ഏതു രാജ്യങ്ങളാണ് 'മൈഗ്രേഷന്‍ പോസ്'ന് വിധേയമാവുന്നതെന്ന് വ്യക്തമാക്കിയിട്ടില്ല. നിയമപരമായ വെല്ലുവിളികള്‍ക്കും യു എന്‍ ഏജന്‍സികളുടെ വിമര്‍ശനത്തിനും ഇതിന് സാധ്യതയുണ്ടെന്നാണ് വിലയിരുത്തല്‍.
ട്രംപിന്റെ രണ്ടാം ഭരണകാലത്ത് കുടിയേറ്റത്തെ കുറിച്ചുള്ള കടുത്ത സമീപനത്തിന്റെ ഭാഗമായാണ് പുതിയ തീരുമാനങ്ങള്‍. അനധികൃത കുടിയേറ്റക്കാരുടെ കൂട്ടപ്പുറപ്പെടുവിക്കല്‍, അഭയാര്‍ഥി സ്വീകരണ സംഖ്യ കുറയ്ക്കല്‍, യു എസില്‍ ജനിച്ചവര്‍ക്ക് സ്വതവേയുള്ള പൗരത്വ അവകാശം അവസാനിപ്പിക്കല്‍ തുടങ്ങിയ നയങ്ങളാണ് അടുത്തിടെ ട്രംപ് സ്വീകരിച്ചിരിക്കുന്നത്.
ബുധനാഴ്ച നടന്ന വെടിവെപ്പിനുശേഷം പ്രതി യാത്ര ചെയ്തിരുന്ന അഫ്ഗാന്‍ വിസാ പദ്ധതിയില്‍ താത്ക്കാലിക വിലക്കേര്‍പ്പെടുത്തുകയും തുടര്‍ന്ന് അഫ്ഗാന്‍ കുടിയേറ്റ അപേക്ഷകള്‍ മുഴുവനും പുനഃപരിശോധനയ്ക്കായി മാറ്റുകയും ചെയ്തു.
യു എസ് സിറ്റിസണ്‍ഷിപ്പ് ആന്‍ഡ് ഇമിഗ്രേഷന്‍ സര്‍വീസസ് 19 രാജ്യങ്ങളില്‍ നിന്നുള്ള കുടിയേറ്റക്കാര്‍ക്ക് നേരത്തേ നല്‍കിയ ഗ്രീന്‍ കാര്‍ഡുകള്‍ പുനഃപരിശോധിക്കുമെന്ന് അറിയിച്ചു. അഫ്ഗാനിസ്ഥാന്‍, ക്യൂബ, ഹൈതി, ഇറാന്‍, സൊമാലിയ, വെനിസ്വേല എന്നിവ ഉള്‍പ്പെടുത്തിയുള്ള ജൂണ്‍ പ്രഖ്യാപനവുമായി ബന്ധപ്പെട്ട നടപടിയാണ് ഇത്. പുനഃപരിശോധന എങ്ങനെയായിരിക്കും എന്നതിനെ കുറിച്ച് വിശദാംശങ്ങള്‍ നല്‍കിയിട്ടില്ല. അതേ ദിവസം ട്രംപ് യു എസ് പൗരന്മാരല്ലാത്തവര്‍ക്ക് ഫെഡറല്‍ ബെനിഫിറ്റുകളോ സബ്‌സിഡിയോ നല്‍കില്ലെന്ന് ട്രംപ് പ്രഖ്യാപിച്ചു.
അമേരിക്കയിലെ സാമൂഹിക പ്രതിസന്ധികള്‍ക്ക് അഭയാര്‍ഥികളാണ് കാരണക്കാരെന്ന് ട്രംപ് ആരോപിച്ചു. സൊമാലിയയില്‍ നിന്ന് വന്ന ലക്ഷക്കണക്കിന് അഭയാര്‍ഥികള്‍ ഒരിക്കല്‍ മഹത്തായ മിന്നസോട്ടയെ പൂര്‍ണമായും കൈയടക്കി എന്നാണ് ട്രംപ് പറഞ്ഞത്. അമേരിക്കന്‍ സിസ്റ്റം പൂര്‍ണ്ണമായി വീണ്ടെടുക്കുന്നതുവരെ എല്ലാ മൂന്നാം ലോക രാജ്യങ്ങളില്‍ നിന്നുള്ള കുടിയേറ്റവും സ്ഥിരമായി നിര്‍ത്തുമെന്നും ട്രംപ് അറിയിച്ചു.
ഈ വര്‍ഷം ആദ്യം 11 ആഫ്രിക്കന്‍- ഏഷ്യന്‍ രാജ്യങ്ങളിലെ പൗരന്മാര്‍ക്കുള്ള യാത്രാ നിരോധനം നടപ്പാക്കിയിരുന്നു. ട്രംപിന്റെ ആദ്യ കാലത്തും മുസ്ലിം രാജ്യങ്ങളെ കേന്ദ്രീകരിച്ചുള്ള യാത്രാ നിരോധനങ്ങള്‍ പ്രാബല്യത്തിലുണ്ടായിരുന്നു.
ഈ സംഭവത്തെ അടിസ്ഥാനമാക്കി കുടിയേറ്റക്കാരെ ബലിയാടുകളാക്കുകയാണെന്ന് അമേരിക്കന്‍ ഇമിഗ്രേഷന്‍ ലോയേഴ്‌സ് അസോസിയേഷന്‍ പ്രസിഡന്റ് ജെരമി മക്കിന്നി വിമര്‍ശിച്ചു. തീവ്രവാദം, മാനസിക പ്രശ്‌നങ്ങള്‍ എന്നിവയ്ക്ക് ദേശീയതയോ വര്‍ഗ്ഗമോ ഇ്‌ല്ലെന്നും അദ്ദേഹം പറഞ്ഞു.
അധികൃതര്‍ നല്‍കിയ വിവരങ്ങള്‍ പ്രകാരം പ്രതിയായ റഹ്മാനുല്ല ലകാന്‍വല്‍ 2021-ലാണ് യു എസിലെത്തിയത്. സി ഐ എയുമായി ചേര്‍ന്ന് പ്രവര്‍ത്തിച്ചിരുന്ന 'സീറോ യൂണിറ്റ്' അംഗമായിരുന്നുവെന്നും അഫ്ഗാന്‍ സുരക്ഷാ സേനയിലെ ഏറ്റവും വിശ്വസനീയ വിഭാഗങ്ങളിലൊന്നായി അമേരിക്ക ഈ യൂണിറ്റിനെ കണക്കാക്കിയിരുന്നതായും സി ബി സി റിപ്പോര്‍ട്ട് ചെയ്തു.
സി ഐ എ ഡയറക്ടര്‍ തന്നെ ലകാന്‍വല്‍ ഏജന്‍സിയുമായി പ്രവര്‍ത്തിച്ചിരുന്നതായുള്ള വിവരം സ്ഥിരീകരിച്ചിട്ടുണ്ട്.യു എസില്‍ എത്തുന്നതിനും മുമ്പ് അദ്ദേഹത്തിന് കര്‍ശന പരിശോധനകള്‍ നടന്നിട്ടുണ്ടെന്നും ഭവന്‍സ് അധികൃതര്‍ സിഎന്‍ എന്നിനവ CNNനോട് പറഞ്ഞു.