വാഷിംഗ്്ടണ്‍: ടര്‍ക്കി മാംസം ചിക്കന്‍ പോലെ രുചിയുള്ളതല്ലെന്ന അമേരിക്കന്‍ വൈസ് പ്രസിഡന്റ് ജെ.ഡി. വാന്‍സിന്റെ തമാശ സൈനികര്‍ക്കിടയില്‍ കൂട്ടച്ചിരിയുണര്‍ത്തി. കെന്റക്കിയിലെ ഫോര്‍ട്ട് കാംബല്‍ സൈനിക കേന്ദ്രത്തില്‍, താങ്ക്‌സ്ഗിവിങ് ദിനാഘോഷങ്ങളുടെ ഭാഗമായി സൈനികരുമായി സംവദിക്കവെയായിരുന്നു വാന്‍സിന്റെ പരാമര്‍ശം.
'സത്യമായി പറയൂ, ടര്‍ക്കി ശരിക്കും ആരെങ്കിലും ഇഷ്ടപ്പെടുന്നുണ്ടോ?' എന്നായിരുന്നു വാന്‍സിന്റെ ചോദ്യം. ചിലര്‍ കൈ ഉയര്‍ത്തിയപ്പോള്‍, 'നിങ്ങള്‍ എല്ലാവരും കള്ളം പറയുന്നുവെന്ന് അദ്ദേഹം പറഞ്ഞു..
കൈ ഉയര്‍ത്തിയ എല്ലാവരും, '' അതെ'' എന്ന് പറഞ്ഞ് എല്ലാവരും ചിരിച്ചു.
'യാദൃശ്ചികമായി ആരെങ്കിലും 18 പൗണ്ടിന്റെ ടര്‍ക്കി റോസ്റ്റ് ചെയ്യാറുണ്ടോ? ഇല്ലല്ലോ. കാരണം, ടര്‍ക്കിക്ക് അത്ര രുചിയില്ല,' എന്നും അദ്ദേഹം കൂട്ടിച്ചേര്‍ത്തു.
അതേസമയം, ടര്‍ക്കി കഴിച്ചുകൊണ്ട് അമേരിക്കന്‍ പാരമ്പര്യത്തെ ആദരിക്കുമെന്നും വാന്‍സ് പറഞ്ഞു. ' അമേരിക്കയിലെ ഏറ്റവും വലിയ ആഘോഷ ദിനത്തില്‍ ടര്‍ക്കി തന്നെ പാകം ചെയ്യും. കാരണം, അമേരിക്കക്കാര്‍ അങ്ങനെ തന്നെയാണ് ചെയ്യുന്നത്,' എന്നായിരുന്നു വൈസ് പ്രസിഡന്റിന്റെ വാക്കുകള്‍. ഒരുസൈനിക യുവതി സ്വന്തം ടര്‍ക്കി ഡീപ്‌ഫ്രൈ ചെയ്യാനാണ് ഉദ്ദേശിക്കുന്നതെന്ന് പറഞ്ഞതോടെ, താനും ഇത്തവണ അത് പരീക്ഷിക്കാമെന്ന് പറഞ്ഞു. എന്നാല്‍, 'രുചിയുണ്ടാക്കാന്‍ ഡീപ്‌ഫ്രൈ ചെയ്യേണ്ടിവരുന്ന ഭക്ഷണത്തിന് അത്ര ഗുണമില്ല. - വാന്‍സ് കൂട്ടിച്ചേര്‍ത്തു.
ടര്‍ക്കിയെയും ചിക്കനെയും താരതമ്യം ചെയ്ത വാന്‍സ്, 'ചിക്കന്‍ എപ്പോഴും രുചിയുള്ളതാണ്. ഫ്രൈ ചെയ്താലും ഇല്ലെങ്കിലും,' എന്ന് അഭിപ്രായപ്പെട്ടു.
അമേരിക്കയില്‍ എല്ലാ വര്‍ഷവും നവംബര്‍ മാസത്തിലെ നാലാം വ്യാഴാഴ്ചയാണ് താങ്ക്‌സ്ഗിവിങ് ആഘോഷിക്കുന്നത്. വിളവെടുപ്പിനും കഴിഞ്ഞ വര്‍ഷത്തെ അനുഗ്രഹങ്ങള്‍ക്കും നന്ദി പറയുന്നതില്‍ കേന്ദ്രീകരിച്ച അവധിയാണിത്. 1600കളില്‍ ആദ്യ കുടിയേറ്റക്കാരും തദ്ദേശജാതികളും ഒത്തുചേര്‍ന്ന് നടത്തിയ വിരുന്നുകളിലൂടെയാണ് ടര്‍ക്കി താങ്ക്‌സ്ഗിവിങ് ഭക്ഷണത്തിന്റെ ഭാഗമായതെന്ന് ചരിത്രം പറയുന്നു. അന്നത്തെ കാലത്ത് കാട്ടുടര്‍ക്കികള്‍ കൂടുതലായിരുന്നതിനാല്‍ അവ വിരുന്നുകളിലെ മുഖ്യവിഭവമായി.
താങ്ക്‌സ്ഗിവിങ് ദിനത്തിലാണ് അമേരിക്കയില്‍ ഏറ്റവും കൂടുതല്‍ ടര്‍ക്കി ഉപഭോഗം നടക്കുന്നത്. ഈ ദിനത്തില്‍ പ്രസിഡന്റ് കൊല്ലാന്‍ കൊണ്ടുവരുന്ന ഒന്നോ രണ്ടോ ടര്‍ക്കികളെ 'മാപ്പ്' നല്‍കി രക്ഷപ്പെടുത്തി ഫാം അല്ലെങ്കില്‍ സങ്കേതത്തിലേക്ക് അയക്കുന്ന പതിവുമുണ്ട്. നാഷണല്‍ ടര്‍ക്കി ഫെഡറേഷന്‍ കണക്കുകള്‍ പ്രകാരം, ഈ വര്‍ഷം ഏകദേശം 3 കോടി ടര്‍ക്കികളാണ് താങ്ക്‌സ്ഗിവിങ് വിരുന്നുകളിലുണ്ടാകുക എന്നാണ് റിപ്പോര്‍ട്ട്.
'ടര്‍ക്കിക്കു രുചിയില്ല ചിക്കനാണ് രാജാവ് ' ; ജെഡി വാന്‍സിന്റെ തമാശകേട്ട് സൈനികരുടെ കൂട്ടച്ചിരി
