വാഷിംഗ്ടണ്‍: വാഷിംഗ്ടണ്‍ ഡി.സിയില്‍ നാഷണല്‍ ഗാര്‍ഡിലെ രണ്ട് അംഗങ്ങള്‍ക്ക് നേരെയുണ്ടായ വെടിവെപ്പിന് പിന്നാലെ, എല്ലാ അഭയ അപേക്ഷകളിലെയും തീരുമാനങ്ങള്‍ താത്കാലികമായി നിര്‍ത്തിവയ്ക്കുമെന്ന് ട്രംപ് ഭരണകൂടം പ്രഖ്യാപിച്ചു. അപേക്ഷകരെ പരമാവധി പരിശോധനക്കും സുരക്ഷാ വിലയിരുത്തലുകള്‍ക്കും വിധേയമാക്കുന്നത് ഉറപ്പാക്കാന്‍ സമയമെടുക്കേണ്ടതുണ്ടെന്നാണ് കാരണമായി യുഎസ് സിറ്റിസണ്‍ഷിപ്പ് ആന്‍ഡ് ഇമിഗ്രേഷന്‍ സര്‍വീസസ് (ഡടഇകട) ഡയറക്ടര്‍ ജോസഫ് എഡ്‌ലോ വ്യക്തമാക്കിയത്.
ബുധനാഴ്ചത്തെ വെടിവെപ്പില്‍ ഒരു നാഷണല്‍ ഗാര്‍ഡ് അംഗം കൊല്ലപ്പെടുകയും മറ്റൊരാള്‍ ഗുരുതരമായി പരിക്കേല്‍ക്കുകയും ചെയ്തിരുന്നു. അഫ്ഗാനിസ്ഥാന്‍കാരനായ 29 വയസ്സുള്ള റഹ്മത്തുള്ള ലക്ന്‍വാല്‍ ആണ് പ്രതിയെന്ന് പൊലീസ് തിരിച്ചറിഞ്ഞിട്ടുണ്ട്. 2021ല്‍ ബൈഡന്‍ ഭരണകാലത്ത് അമേരിക്കയില്‍ എത്തിയ ഇയാള്‍ക്ക് 2025 ഏപ്രിലില്‍ അഭയം ലഭിച്ചതായി അന്വേഷണ ഏജന്‍സികള്‍ പറഞ്ഞു. അഫ്ഗാനിസ്ഥാനില്‍ സി.ഐ.എയുമായി ചേര്‍ന്ന് പ്രവര്‍ത്തിച്ച 'സീറോ യൂണിറ്റ്' എന്ന പ്രത്യേക സംഘത്തിലെ അംഗമായിരുന്നു ലക്ന്‍വാലെന്നും, ഭീകരവിരുദ്ധ ഓപ്പറേഷനുകളില്‍ പങ്കെടുത്ത വിശ്വസ്തനാണെന്നും അന്വേഷണത്തില്‍ വ്യക്തമായിട്ടുണ്ട്.
സംഭവത്തെ തുടര്‍ന്നാണ് പ്രസിഡന്റ് ഡോണള്‍ഡ് ട്രംപ് കടുത്ത കുടിയേറ്റ നിയന്ത്രണങ്ങള്‍ പ്രഖ്യാപിച്ചത്. 'മൂന്നാംലോക രാജ്യങ്ങളില്‍' നിന്നുള്ള കുടിയേറ്റം സ്ഥിരമായി നിര്‍ത്തിവയ്ക്കുമെന്ന സൂചനയും അദ്ദേഹം നല്‍കി. ഏത് രാജ്യങ്ങളെ ബാധിക്കുമെന്നത് വ്യക്തമാക്കിയിട്ടില്ലെങ്കിലും, കഴിഞ്ഞ ജൂണില്‍ ആഫ്രിക്കയും മിഡില്‍ ഈസ്റ്റും ഉള്‍പ്പെടെയുള്ള 12 രാജ്യങ്ങളില്‍ നിന്നുള്ള യാത്രകള്‍ക്ക് വിലക്കേര്‍പ്പെടുത്തിയിരുന്നു; മറ്റ് ചില രാജ്യങ്ങളില്‍ നിയന്ത്രണങ്ങള്‍ ഏര്‍പ്പെടുത്തിയതുമുണ്ട്.
ഇതിനു പുറമേ, അഫ്ഗാന്‍ പാസ്‌പോര്‍ട്ട് കൈവശമുള്ള എല്ലാവര്‍ക്കും അമേരിക്കന്‍ വിസ നല്‍കല്‍ താല്‍ക്കാലികമായി നിര്‍ത്തിവച്ചതായി സ്‌റ്റേറ്റ് ഡിപ്പാര്‍ട്ട്‌മെന്റ് അറിയിച്ചു. 'രാജ്യത്തിന്റെയും ജനങ്ങളുടെ സുരക്ഷയാണ് ഏറ്റവും വലിയ മുന്‍ഗണന'യെന്നു സ്‌റ്റേറ്റ് സെക്രട്ടറി മാര്‍ക്കോ റൂബിയോ എക്‌സ് പ്ലാറ്റ്‌ഫോമിലൂടെ വ്യക്തമാക്കി.
അനധികൃത കുടിയേറ്റത്തിനെതിരെ ഭരണകൂടം കടുത്ത നടപടികള്‍ സ്വീകരിക്കുമെന്നും, 'ദേശീയ സുരക്ഷയ്ക്ക് ഭീഷണിയാകുന്നവരെയും പൊതുഭാരമാകുന്ന വിദേശ പൗരന്മാരെയും പുറത്താക്കും' എന്നും ട്രംപ് പറഞ്ഞു. ബൈഡന്‍ ഭരണകാലത്തെ 'നിയമവിരുദ്ധ പ്രവേശനങ്ങള്‍' എല്ലാം അവസാനിപ്പിക്കുമെന്നും, അതുമായി ബന്ധപ്പെട്ട ആനുകൂല്യങ്ങള്‍ റദ്ദാക്കുമെന്നും അദ്ദേഹം അവകാശപ്പെട്ടു.
എന്നാല്‍ ഈ നിയന്ത്രണങ്ങളെതിരെ ഡെമോക്രാറ്റുകളും കുടിയേറ്റാവകാശസംരക്ഷകരും കടുത്ത വിമര്‍ശനമുയര്‍ത്തി. ദേശീയ സുരക്ഷയുടെ പേരില്‍ ഭരണകൂടം ഭീഷണി അമിതമായി ഉയര്‍ത്തിക്കാട്ടുകയാണെന്നും, സഹായത്തിനായി എത്തിയ ലക്ഷക്കണക്കിന് കുടുംബങ്ങളെ അമേരിക്ക തിരിച്ചയക്കുകയാണെന്നുമാണ് ആരോപണം.
വെടിവെപ്പിന് പിന്നാലെ വാഷിംഗ്ടണിലും ഷിക്കാഗോ, പോര്‍ട്ട്‌ലന്‍ഡ് തുടങ്ങിയ ഡെമോക്രാറ്റ് നേതൃത്വത്തിലുള്ള നഗരങ്ങളിലും നാഷണല്‍ ഗാര്‍ഡ് സാന്നിധ്യം ശക്തമാക്കിയിട്ടുണ്ട്. സംഭവത്തിന്റെ പശ്ചാത്തലത്തില്‍ കുടിയേറ്റ നയം കൂടുതല്‍ കടുപ്പിക്കാനുള്ള നീക്കത്തിലാണ് ട്രംപ് ഭരണകൂടമെന്ന സൂചനകളാണ് ഇപ്പോള്‍ പുറത്തുവരുന്നത്.
നാഷണല്‍ ഗാര്‍ഡ് അംഗങ്ങളെ വെടിവെച്ച സംഭവം: അഭയാര്‍ത്ഥി അപേക്ഷാ തീരുമാനങ്ങള്‍ക്ക് ഇടവേള പ്രഖ്യാപിച്ച് ട്രംപ് ഭരണകൂടം
