വാഷിംഗ്ടണ്‍: ഐസ്‌ബ്രേക്കര്‍ കപ്പലുകളുടെ കാര്യത്തില്‍ അമേരിക്ക റഷ്യയെക്കാള്‍ ഏറെ പിന്നിലാണെന്ന് തുറന്നുപറഞ്ഞ് അമേരിക്കന്‍ പ്രസിഡന്റ് ഡോണള്‍ഡ് ട്രംപ്. വൈറ്റ് ഹൗസില്‍ നടത്തിയ പ്രസംഗത്തില്‍, 'നമുക്കൊരു ഐസ്‌ബ്രേക്കറേയുള്ളൂ. റഷ്യയ്ക്ക് 48 എണ്ണം ഉണ്ട്. ഇത് അസംബന്ധമാണ്,' എന്നാണ് ട്രംപ് പറഞ്ഞത്. ആര്‍ക്ടിക് മേഖലയിലെ അമേരിക്കന്‍ സാന്നിധ്യം വേഗത്തില്‍ ശക്തിപ്പെടുത്തുന്നതിന്റെ ഭാഗമായി ഫിന്‍ലന്‍ഡില്‍ നിന്ന് 11 പുതിയ ഐസ്‌ബ്രേക്കര്‍ കപ്പലുകള്‍ക്ക് അമേരിക്ക ഓര്‍ഡര്‍ നല്‍കിയതായി അദ്ദേഹം അറിയിച്ചു.
2025 ഒക്ടോബറില്‍ അമേരിക്കയും ഫിന്‍ലന്‍ഡും സഹനിര്‍മാണ കരാറില്‍ ഒപ്പുവച്ചിരുന്നു. ഇതനുസരിച്ച് നാല് കപ്പലുകള്‍ ഫിന്‍ലന്‍ഡിലെ കപ്പല്‍ശാലകളിലും ഏഴ് കപ്പലുകള്‍ അമേരിക്കയിലുമായിരിക്കും നിര്‍മിക്കുക. 6.1 ബില്യണ്‍ ഡോളര്‍ വിലമതിക്കുന്ന ഈ കരാര്‍ യുഎസ് കോസ്റ്റ് ഗാര്‍ഡിന്റെ ശേഷി വന്‍തോതില്‍ വര്‍ധിപ്പിക്കുമെന്ന് വൈറ്റ് ഹൗസ് അറിയിച്ചു. നിലവില്‍ കോസ്റ്റ് ഗാര്‍ഡിന് പ്രവര്‍ത്തനക്ഷമമായി രണ്ട് പോളര്‍ ഐസ്‌ബ്രേക്കറുകളേയുള്ളൂ-1976ല്‍ നിര്‍മ്മിച്ച ഒരു കപ്പലും അടുത്തിടെയാണ് സേവനത്തില്‍ പ്രവേശിപ്പിച്ച മറ്റൊരു വാണിജ്യ കപ്പലുമാണ് അവ.
'ലോകത്തിലെ ഏറ്റവും മികച്ച, അത്യാധുനിക ഐസ്‌ബ്രേക്കറുകളാണ് പുതുതായി സ്വന്തമാക്കുന്നത്. വളരെ വേഗത്തില്‍ തന്നെ ഡെലിവറി നടക്കും,' ട്രംപ് പറഞ്ഞു. ആര്‍ക്ടിക് മേഖലയില്‍ ഉയര്‍ന്നുവരുന്ന ദേശീയ സുരക്ഷാ വെല്ലുവിളികള്‍ നേരിടുന്നതിനായാണ് ഈ നീക്കമെന്നും, വര്‍ഷം മുഴുവന്‍ അമേരിക്കന്‍ താല്‍പ്പര്യങ്ങള്‍ സംരക്ഷിക്കാന്‍ കുറഞ്ഞത് ഒന്‍പത് ഐസ്‌ബ്രേക്കറുകളെങ്കിലും ആവശ്യമാണെന്ന് കോസ്റ്റ് ഗാര്‍ഡ് വിലയിരുത്തിയിട്ടുണ്ടെന്നും വൈറ്റ് ഹൗസ് ഒക്ടോബര്‍ 9ന് പുറത്തിറക്കിയ ഫാക്റ്റ് ഷീറ്റില്‍ വ്യക്തമാക്കി. ഫിന്‍ലന്‍ഡിലേക്കുള്ള ഔട്ട്‌സോഴ്‌സിംഗ് താല്‍ക്കാലിക നടപടിയേയുള്ളുവെന്നും, ഭാവിയില്‍ ഭൂരിഭാഗം കപ്പലുകളും അമേരിക്കയിലുതന്നെ നിര്‍മിക്കുകയെന്നതാണ് ലക്ഷ്യമെന്നും ഭരണകൂടം അറിയിച്ചു.
റഷ്യയ്ക്ക് 48, അമേരിക്കയ്ക്ക് ഒന്ന്; 'ഇത് പരിഹാസ്യമാണ്' - 11 പുതിയ ഐസ് ബ്രേക്കറുകള്‍ വാങ്ങാന്‍ ഉത്തരവ് നല്‍കി ട്രംപ്
