ടുളൂസ്: വിമാന നിര്‍മാതാക്കളായ എയര്‍ ബസ്സിന്റെ എ320 വിമാന ശ്രേണിയെ ബാധിക്കുന്ന സുരക്ഷാ വീഴ്ചയെ തുടര്‍ന്ന് ആറായിലത്തിലധികം വിമാനങ്ങള്‍ തിരിച്ചു വിളിച്ചതിനെ തുടര്‍ന്ന് വിവിധ അന്താരാഷ്ട്ര എയര്‍ലൈന്‍സുകള്‍ പ്രവര്‍ത്തനത്തിലെ മാറ്റങ്ങള്‍ പ്രഖ്യാപിച്ചു.
മൂന്നു വിമാനങ്ങള്‍ മാത്രമാണ് തങ്ങളുടേത് തിരിച്ചു വിളിക്കുന്നതിലുള്ളു എന്നതിനാല്‍ സര്‍വീസില്‍ തടസ്സമുണ്ടാകില്ലെന്ന് ബ്രിട്ടീഷ് എയര്‍വെയ്‌സ് അറിയിച്ചു.
ലോകത്തിലെ ഏറ്റവും വലിയ എ320 ഓപ്പറേറ്ററായ അമേരിക്കന്‍ എയര്‍ലൈന്‍സ് ഭൂരിഭാഗം വിമാനങ്ങളിലും പ്രശ്‌നപരിഹാരം വേഗത്തില്‍ പൂര്‍ത്തിയാക്കുമെന്ന് വ്യക്തമാക്കി. ഡെല്‍റ്റ എയര്‍ ലൈന്‍സ് നിര്‍ദേശങ്ങള്‍ പാലിക്കുമെന്നും പ്രവര്‍ത്തനത്തെ ബാധിക്കുന്നത് പരിമിതമായിരിക്കുമെന്നും അറിയിച്ചു. ജര്‍മന്‍ എയര്‍ലൈന്‍ ലുഫ്താന്‍സ വാരാന്ത്യത്തില്‍ കുറച്ച് സര്‍വീസുകളില്‍ റദ്ദാക്കലുകളും വൈകലുകളും ഉണ്ടാകാമെന്ന മുന്നറിയിപ്പ് നല്‍കി.
വിസ് എയര്‍ പരിപാലന പ്രവര്‍ത്തനങ്ങള്‍ തുടരുകയാണെന്നും ചില സര്‍വീസുകള്‍ക്ക് വാരാന്ത്യത്തില്‍ പ്രത്യാഘാതമുണ്ടാകാമെന്നും അറിയിച്ചു. ഈസിജെറ്റ് സാധാരണ സര്‍വീസുകള്‍ പ്രതീക്ഷിക്കുന്നുവെങ്കിലും യാത്രക്കാര്‍ ഫ്‌ളൈറ്റ് സ്റ്റാറ്റസ് നിരീക്ഷിക്കാന്‍ നിര്‍ദേശിച്ചു. ഐറിഷ് എയര്‍ലൈന്‍ ഏര്‍ ലിങ്‌സ് ചില വിമാനങ്ങളെ മാത്രമാണ് ബാധിക്കുകയെന്നും സുരക്ഷാ നിര്‍ദേശങ്ങള്‍ പാലിക്കുന്നതിനുള്ള നടപടികള്‍ സ്വീകരിച്ചിട്ടുണ്ടെന്നും പറഞ്ഞു.
ടര്‍ക്കിഷ് എയര്‍ലൈന്‍സ് ആവശ്യമായ പരിശോധനകളും പരിഹാര നടപടികളും പൂര്‍ത്തിയാക്കിയതിന് ശേഷം എല്ലാ വിമാനങ്ങളും സാധാരണ സര്‍വീസിലേക്ക് മടങ്ങുമെന്നും പ്രവര്‍ത്തനത്തില്‍ തടസ്സമുണ്ടാകില്ലെന്നും വ്യക്തമാക്കി. കൊളംബിയന്‍ കരിയര്‍ അവിയാന്‍കയുടെ ഫ്‌ളീറ്റിലെ 70 ശതമാനത്തിലധികം വിമാനങ്ങള്‍ തിരിച്ചുവിളിക്കലില്‍ ഉള്‍പ്പെട്ടിട്ടുള്ളതിനാല്‍ അടുത്ത 10 ദിവസത്തേക്ക് ഗണ്യമായ പ്രവര്‍ത്തന തടസ്സങ്ങള്‍ ഉണ്ടാകാമെന്ന് കമ്പനി അറിയിച്ചു. ഇതിന്റെ ഭാഗമായി ഡിസംബര്‍ 8 വരെ ടിക്കറ്റ് വില്‍പ്പനയും താത്കാലികമായി നിര്‍ത്തി.
എയര്‍ ഇന്ത്യ ചില വിമാനങ്ങളില്‍ ആവശ്യമായ സോഫ്റ്റ്വെയര്‍, ഹാര്‍ഡ്വെയര്‍ പരിഷ്‌കാരങ്ങള്‍ നടക്കുന്നതിനാല്‍ ടേണ്‍എറൗണ്ട് സമയം വര്‍ധിക്കുകുയം സര്‍വീസ് പ്രശ്‌നങ്ങള്‍ ഉണ്ടാകാനിടയുണ്ടെന്നും അറിയിച്ചു. ഇന്ത്യന്‍ കരിയര്‍ ഇന്‍ഡിഗോയ്ക്ക് ചില സര്‍വീസുകളുടെ ഷെഡ്യൂളില്‍ മാറ്റങ്ങള്‍വരാന്‍ സാധ്യതയുണ്ടെന്ന് അറിയിച്ചു.
എയര്‍ ന്യൂസിലാന്‍ഡ് നിരവധി സര്‍വീസുകള്‍ റദ്ദാക്കപ്പെടാനും മറ്റ് ചിലതില്‍ തടസ്സങ്ങള്‍ ഉണ്ടാകാനും സാധ്യതയുണ്ടെന്ന് വ്യക്തമാക്കി. സൗദി അറേബ്യയുടെ ഫ്‌ളൈനാസ് ചെറിയ ഷെഡ്യൂള്‍ പ്രശ്‌നങ്ങള്‍ ഉണ്ടാകാമെന്ന് അറിയിച്ചു.
യുണൈറ്റഡ് എയര്‍ലൈന്‍സ് തങ്ങളുടെ സര്‍വീസുകള്‍ക്ക് യാതൊരു ആഘാതവും ഉണ്ടാകില്ലെന്ന് വ്യക്തമാക്കിയപ്പോള്‍ ബ്രസീലിയന്‍ എയര്‍ലൈന്‍ അസുല്‍, അവരുടെ എ320 വിമാനങ്ങള്‍ തിരിച്ചുവിളിക്കല്‍ പട്ടികയില്‍ ഇല്ലെന്നും അറിയിച്ചു. ലോകവ്യാപകമായി നിരവധി എയര്‍ലൈന്‍സുകള്‍ക്ക് വ്യത്യസ്ത തലങ്ങളില്‍ പ്രവര്‍ത്തനപ്രതിസന്ധി സൃഷ്ടിച്ച തിരിച്ചു വിളിക്കല്‍ നടപടിയോട് അനുബന്ധിച്ച് സുരക്ഷാ മാനദണ്ഡങ്ങള്‍ പാലിച്ചുകൊണ്ട് പ്രവര്‍ത്തന തടസ്സം കുറയ്ക്കാനുള്ള ശ്രമങ്ങള്‍ തുടരുകയാണ്.