ഒട്ടാവ: വെസ്റ്റ് ബാങ്കിലെ 'തീവ്രവാദ സ്വഭാവമുള്ള കുടിയേറ്റ അക്രമങ്ങളില്' പങ്കുണ്ടെന്നാരോപിക്കപ്പെടുന്ന കൂടുതല് ഇസ്രയേല് പൗരന്മാര്ക്കും സ്ഥാപനങ്ങള്ക്കുമെതിരെ കാനഡ പുതിയ ഉപരോധം പ്രഖ്യാപിച്ചു. 2024-ല് നാല് ഇസ്രയേല് കുടിയേറ്റക്കാരെ ഉപരോധ പട്ടികയില് ഉള്പ്പെടുത്തിയതിന് പിന്നാലെയാണ് ഈ നടപടി.
1967 മുതല് ഇസ്രയേല് അധീനതയിലുള്ള വെസ്റ്റ് ബാങ്കില് ഇസ്രയേല് പൗരന്മാര് സ്ഥാപിച്ചുവരുന്ന കുടിയേറ്റ കേന്ദ്രങ്ങള് അന്താരാഷ്ട്ര നിയമങ്ങളുടെ ലംഘനമാണെന്ന് കാനഡ ഉള്പ്പെടെയുള്ള നിരവധി രാജ്യങ്ങള് നിലപാട് സ്വീകരിച്ചിട്ടുണ്ട്. ഗാസ മുനമ്പില് നിന്ന് വേറിട്ട പ്രദേശമായ വെസ്റ്റ് ബാങ്കിലാണ് ഇത്തരം കുടിയേറ്റങ്ങള് വ്യാപകമായി രൂപപ്പെട്ടത്.
2023-ല് ഹമാസ് ഇസ്രയേലിനെതിരെ നടത്തിയ ആക്രമണത്തെ തുടര്ന്ന് ഗാസയില് ഇസ്രയേല് സൈനിക നടപടി ശക്തമാക്കുകയും വെസ്റ്റ് ബാങ്കില് നിയന്ത്രണങ്ങള് കടുപ്പിക്കുകയും ചെയ്തിരുന്നു. ഇതിന് പിന്നാലെ പാലസ്തീന് പൗരന്മാര്ക്കെതിരായ കുടിയേറ്റക്കാരുടെ ആക്രമണങ്ങളില് ഗണ്യമായ വര്ധന ഉണ്ടായതായി ഐക്യരാഷ്ട്രസഭ രേഖപ്പെടുത്തിയിട്ടുണ്ട്.
ഇസ്രയേല് കുടിയേറ്റക്കാരെതിരായ അഞ്ചാമത്തെ ഉപരോധ നടപടിയുടെ ഭാഗമായി കുടിയേറ്റ കേന്ദ്രങ്ങളുടെ നിര്മാണവുമായി ബന്ധപ്പെട്ട രണ്ട് വ്യക്തികളെയും കൃഷിയിടങ്ങളും മറ്റ് കേന്ദ്രങ്ങളും സ്ഥാപിക്കുന്നതില് പങ്കുണ്ടെന്ന് ആരോപിക്കപ്പെടുന്ന അഞ്ച് കമ്പനികളെയും കാനഡ ഉപരോധ പട്ടികയില് ഉള്പ്പെടുത്തി.
പാലസ്തീന് പൗരന്മാര്ക്കെതിരായ ആക്രമണങ്ങളില് പങ്കുണ്ടെന്ന് ബ്രിട്ടനും ന്യൂസിലന്ഡും ആരോപിച്ച വ്യക്തികളും സംഘടനകളും ഈ പട്ടികയിലുണ്ടെന്ന് റിപ്പോര്ട്ടുകള് വ്യക്തമാക്കുന്നു.
ഇസ്രയേലും പാലസ്തീനും സ്വതന്ത്ര രാഷ്ട്രങ്ങളായി സഹവര്ത്തിത്വത്തോടെ നിലനില്ക്കുന്ന ദ്വിരാഷ്ട്ര പരിഹാര സാധ്യത നിലനിര്ത്തുന്നതിനാണ് ഉപരോധ നടപടികള് ലക്ഷ്യമിടുന്നതെന്ന് കാനഡ അറിയിച്ചു. എന്നാല് നിലവിലെ ഇസ്രയേല് സര്ക്കാര് ഈ ആശയം തള്ളിക്കളഞ്ഞ നിലപാടാണ് സ്വീകരിച്ചിരിക്കുന്നത്.
വെസ്റ്റ് ബാങ്കിലെ കുടിയേറ്റ വികസനവും അതുമായി ബന്ധപ്പെട്ട അക്രമ സംഭവങ്ങളും പശ്ചിമേഷ്യയിലെ സമാധാനശ്രമങ്ങള്ക്ക് വലിയ വെല്ലുവിളിയായി തുടരുന്നതിനിടെയാണ് കാനഡയുടെ പുതിയ നടപടി.