ലബനന്‍: ഇസ്രായേല്‍ നടത്തിയ വിമാനാക്രമണത്തില്‍ സംഘടനയുടെ ഉന്നത സൈനിക മേധാവി ഹൈതം അലി തബ്തബായി കൊല്ലപ്പെട്ട സംഭവത്തോട് പ്രതികരിക്കാനുളള അവകാശം തങ്ങള്‍ നിലനിര്‍ത്തുന്നുവെന്നും യുദ്ധസാധ്യത തുറന്ന നിലയില്‍ തന്നെയാണെന്നും വ്യക്തമാക്കി ഹിസ്ബുള്ള ഉപമുഖ്യ സെക്രട്ടറി ജനറല്‍ നൈം ഖാസിം. വെള്ളിയാഴ്ച നടത്തിയ ടെലിവിഷന്‍ പ്രസംഗത്തിലാണ് നൈം ഖാസിമിന്റെ മുന്നറിയിപ്പ്.
ബെയ്‌റൂട്ടിലെ ദക്ഷിണ ഉപനഗരത്തില്‍ നവംബര്‍ 23ന് നടന്ന ആക്രമണത്തില്‍ തബ്തബായി കൊല്ലപ്പെട്ടതോടെ ലബനനില്‍ യുദ്ധഭീതിയുണ്ടായിരിക്കെയാണ് ഖാസിമിന്റെ പ്രതികരണം.
'തിരിച്ചടിക്കുള്ള സമയവും രീതിയും നിശ്ചയിക്കേണ്ടത് ഞങ്ങളാണ്. വ്യാപകമായ വ്യോമാക്രമണ ഭീഷണികള്‍ ഞങ്ങളെ ബാധിക്കുന്നില്ല. യുദ്ധസാദ്ധ്യതയുണ്ട്; ഇല്ലാതിരിക്കാനും സാധ്യതയും ഉണ്ട്,' ഖാസിം പറഞ്ഞു.
രാജ്യത്തിന്റെ സൈന്യത്തെയും ജനങ്ങളെയും ആശ്രയിച്ചുകൊണ്ട് ഇസ്രായേലിനെ ചെറുക്കാനുളള ഒരു ഏകോപിത പദ്ധതിയുമായി ലബനന്‍ മുന്നോട്ടുപോകേണ്ടതുണ്ടെന്നും അദ്ദേഹം അഭിപ്രായപ്പെട്ടു.
അതേസമയം, പോപ്പ് ലിയോയുടെ നിര്‍ദ്ദിഷ്ട ലബനന്‍ സന്ദര്‍ശനം സമാധാന ശ്രമങ്ങള്‍ക്കും ഇസ്രായേല്‍ ആക്രമണം അവസാനിപ്പിക്കാനും സഹായകരമാകണമെന്ന പ്രതീക്ഷയും ഖാസിം പ്രകടിപ്പിച്ചു.
യുണൈറ്റഡ് സ്‌റ്റേറ്റ്‌സിന്റെയും ഇസ്രായേലിന്റെയും സമ്മര്‍ദ്ദം ശക്തമായിക്കൊണ്ടിരിക്കെ ഹിസ്ബുള്ള ഉള്‍പ്പെടെയുള്ള സായുധ സംഘങ്ങളെ ആയുധരഹിതരാക്കണമെന്ന് ലബനന്‍ സര്‍ക്കാരിനോട് അന്താരാഷ്ട്രതലത്തില്‍ ആവശ്യമുയരുന്നുണ്ട്.
ഖാസിമിന്റെ പ്രസംഗത്തിന് പിന്നാലെ, ലബനന്‍ സൈന്യം തെക്കന്‍ അതിര്‍ത്തിയില്‍ ഹിസ്ബുള്ളയുടെ ആയുധശേഖരം പിടിച്ചെടുക്കുന്നതില്‍ പര്യാപ്തമായ നടപടിയെടുക്കുന്നില്ലെന്ന് ഇസ്രായേല്‍ സൈനിക വക്താവ് അവിചായ് അദ്രെ പറഞ്ഞു.
'ഹിസ്ബുള്ള അവരുടെ ആയുധശേഖരം രഹസ്യമായി തുടരുകയാണ്,' അദ്ദേഹം എക്‌സില്‍ പോസ്റ്റ് ചെയ്തു.
ഇസ്രായേല്‍ ആക്രമണവും ലബനന്‍ തെക്കന്‍ പ്രദേശങ്ങളില്‍ അഞ്ചിടങ്ങളിലെ ഇസ്രായേല്‍ സാന്നിധ്യവും തുടര്‍ന്നുനില്‍ക്കുന്നിടത്തോളം ആയുധങ്ങള്‍ ഉപേക്ഷിക്കില്ലെന്ന നിലപാട് ഹിസ്ബുള്ള ആവര്‍ത്തിച്ചു.
കമാന്‍ഡറെ വധിച്ച ഇസ്രായേലിനെതിരെ തിരിച്ചടിക്കാന്‍ ഹിസ്ബുള്ളയ്ക്ക് അവകാശമുണ്ട്; യുദ്ധം അവസാനിച്ചിട്ടില്ലെന്ന് നൈം ഖാസിം
