ന്യൂയോര്‍ക്ക്: ഭീകരമായ സോളാര്‍ വികിരണം വിമാനം നിയന്ത്രിക്കുന്ന ഓണ്‍ബോര്‍ഡ് ഫ്‌ലൈറ്റ് കംപ്യൂട്ടറുകളെ ബാധിക്കാമെന്ന കണ്ടെത്തലിനെ തുടര്‍ന്നു എയര്‍ബസ് 6,000 ഓളം വിമാനങ്ങളില്‍ മാറ്റങ്ങള്‍ നിര്‍ദേശിച്ചതോടെ ലോകമെമ്പാടും വിമാന സര്‍വീസുകള്‍ക്ക് തടസ്സമുണ്ടാകുമെന്ന് മുന്നറിയിപ്പ്; എയര്‍ബസിന്റെ ആഗോള ഫ്‌ലീറ്റിന്റെ പകുതിയോളം വരുന്ന A320 ശ്രേണിയിലെ (A318, A319, A320, A321) വിമാനങ്ങളെയാണ് തീരുമാനം ബാധിക്കുന്നത്.
ജെറ്റ് ബ്ലൂ വിമാനം യുഎസില്‍ നിന്ന് മെക്‌സിക്കോയിലേക്കു പറക്കുമ്പോള്‍ അപ്രതീക്ഷിതമായി ഉയരാനുള്ള ശേഷി നഷ്ടപ്പെട്ട് ഫ്‌ലോറിഡയില്‍ അടിയന്തര ലാന്‍ഡിങ് നടത്തേണ്ടിവന്ന സംഭവത്തെ തുടര്‍ന്ന് നടത്തിയ അന്വേഷണത്തിലാണ് പ്രശ്‌നം കണ്ടെത്തിയത്; സംഭവത്തില്‍ 15 പേര്‍ക്ക് പരിക്കേറ്റിരുന്നു.
5,100 വിമാനങ്ങളില്‍ മൂന്നു മണിക്കൂറോളം വേണ്ടിവരുന്ന ലളിതമായ സോഫ്റ്റ്‌വെയര്‍ അപ്‌ഡേറ്റ് ചെയ്താല്‍ വീണ്ടും സര്‍വീസ് നടത്താനാകുമെങ്കിലും, പഴയ മോഡലുകളായ 900 വിമാനങ്ങളില്‍ കംപ്യൂട്ടറുകള്‍ തന്നെ മാറ്റേണ്ടിവരുമെന്നും അതുവരെ യാത്രക്കാരെ കയറ്റി പറക്കാനാവില്ലെന്നും എയര്‍ബസ് വ്യക്തമാക്കി.
ഇതോടെ 'യാത്രക്കാര്‍ക്കും വിമാനക്കമ്പനികള്‍ക്കും പ്രവര്‍ത്തന തടസ്സമുണ്ടാകാം' എന്ന മുന്നറിയിപ്പുമായി എയര്‍ബസ് ക്ഷമ ചോദിച്ചു.
ബ്രിട്ടനില്‍ ചില വിമാനത്താവളങ്ങളില്‍ ചെറിയ തടസ്സങ്ങള്‍ റിപ്പോര്‍ട്ട് ചെയ്തിട്ടുണ്ടെങ്കിലും വലിയ റദ്ദാക്കലുകള്‍ ഇതുവരെ ഇല്ല; എയര്‍ ഇന്ത്യ, വിസ് എയര്‍ തുടങ്ങിയവ അപ്‌ഡേറ്റ് ആരംഭിച്ചതായി വ്യക്തമാക്കി. യുഎസില്‍ തിരക്കേറിയ താങ്ക്‌സ്ഗിവിങ് വാരാന്ത്യത്തിലാണ് പ്രശ്‌നം ഉയര്‍ന്നത്. 340 വിമാനങ്ങള്‍ക്കു പ്രശ്‌നം ബാധിച്ചിണ്ടെന്നും ചെറിയ വൈകലുകള്‍ പ്രതീക്ഷിക്കുന്നുവെന്നും അമേരിക്കന്‍ എയര്‍ലൈന്‍സ് പറഞ്ഞു, ഡെല്‍റ്റയുടെ പ്രവര്‍ത്തനങ്ങളില്‍ പരിമിതമായ സ്വാധീനം മാത്രമേ തകാര്‍ ഉണ്ടാക്കിയിട്ടുള്ളൂ എന്നാണ് വിലയിരുത്തല്‍. ഓസ്‌ട്രേലിയയില്‍ തങ്ങളുടെ മൂന്നിലൊന്ന് വിമാനങ്ങളെ ബാധിച്ചതായി സ്ഥിരീകരിച്ച് ജെറ്റ്സ്റ്റാര്‍ 90 വിമാനങ്ങള്‍ റദ്ദാക്കി.
സോളാര്‍ വികിരണം തിരിച്ചടി: 6,000 എയര്‍ബസ് വിമാനങ്ങളില്‍ സോഫ്റ്റ് വെയര്‍ മാറ്റം, ലോകമെമ്പാടും വിമാന സര്‍വീസുകള്‍ക്ക് തടസ്സ ഭീഷണി
