വാഷിംഗ്ടണ്‍: മയക്കുമരുന്ന് കടത്ത് കേസില്‍ അമേരിക്കന്‍ കോടതിയില്‍ കുറ്റക്കാരനായി ശിക്ഷിക്കപ്പെട്ട മുന്‍ ഹോണ്ടുറാസ് പ്രസിഡന്റ് ഖുവാന്‍ ഓര്‍ലാന്‌ഡോ ഹെര്‍ണാണ്ടസിന് മാപ്പ് നല്‍കുമെന്ന് യുഎസ് പ്രസിഡന്റ് ഡോണള്‍ഡ് ട്രംപ് പ്രഖ്യാപിച്ചു. വെള്ളിയാഴ്ച ട്രൂത്ത് സോഷ്യല്‍ അക്കൗണ്ടിലൂടെ നടത്തിയ പ്രസ്താവനയിലാണ് ഹെര്‍ണാണ്ടസിനെ ''വളരെ കര്‍ശനമായും അന്യായമായും ആണ് കൈകാര്യം ചെയ്തത് '' എന്ന്' ആരോപിച്ചുകൊണ്ട് ട്രംപ് മാപ്പ് പ്രഖ്യാപനം നടത്തിയത്.
കൊക്കെയിന്‍ അമേരിക്കയിലേക്ക് കടത്താന്‍ ഗൂഢാലോചന നടത്തിയെന്നും യന്ത്രത്തോക്കുകള്‍ കൈവശം വെച്ചെന്നും കണ്ടെത്തിയ കേസില്‍ 2024 മാര്‍ച്ചില്‍ ന്യൂയോര്‍ക്ക് ജൂറി ഹെര്‍ണാണ്ടസിനെ കുറ്റക്കാരനായി പ്രഖ്യാപിച്ചിരുന്നു. തുടര്‍ന്ന് 45 വര്‍ഷം തടവുശിക്ഷയാണ് കോടതി വിധിച്ചത്. 2014 മുതല്‍ 2022 വരെ ഹോണ്ടുറാസ് പ്രസിഡന്റായിരുന്ന ഹെര്‍ണാണ്ടസ് 2022 ഏപ്രിലിലാണ് വിചാരണയ്ക്കായി അമേരിക്കയിലേക്ക് കൈമാറപ്പെട്ടത്.
അതേസമയം, ഞായറാഴ്ച നടക്കുന്ന ഹോണ്ടുറാസ് പൊതു തിരഞ്ഞെടുപ്പില്‍ കണ്‍സര്‍വേറ്റീവ് സ്ഥാനാര്‍ഥിയായ ടിറ്റോ അസ്ഫുറയ്ക്കുള്ള തന്റെ പിന്തുണയും ട്രംപ് പോസ്റ്റില്‍ പ്രഖ്യാപിച്ചു. നാഷണല്‍ പാര്‍ട്ടി നേതാവും തലസ്ഥാനമായ ടെഗുസിഗാല്‍പയുടെ മുന്‍മേയറുമായ അസ്ഫുറ 'ജനാധിപത്യത്തിന് വേണ്ടി നിലകൊള്ളുന്നയാളാണെന്നും' വെനിസ്വേലന്‍ പ്രസിഡന്റ് നിക്കോളാസ് മദൂറോയ്‌ക്കെതിരേ പ്രവര്‍ത്തിക്കുന്നയാളാണെന്നും ട്രംപ് പറഞ്ഞു.
ഭരിക്കുന്ന ഇടതുപക്ഷ പാര്‍ട്ടിയായ ലിബ്രെയുടെ സ്ഥാനാര്‍ഥിയും മുന്‍ പ്രതിരോധ മന്ത്രിയുമായ റിക്ഷി മോന്‍കാഡയെയും സെന്‍ട്രിസ്റ്റ് ലിബറല്‍ പാര്‍ട്ടിയുടെ സ്ഥാനാര്‍ഥിയും ടി.വി. അവതാരകനുമായ സാല്‍വദോര്‍ നാസ്രല്ലയെയും ട്രംപ് കടുത്ത ഭാഷയില്‍ വിമര്‍ശിച്ചു. അസ്ഫുറയുടെ വോട്ട് വിഭജിക്കാനാണ് നാസ്രല്ല മത്സരിക്കുന്നതെന്നും അദ്ദേഹം 'ബോര്‍ഡര്‍ലൈന്‍ കമ്മ്യൂണിസ്റ്റ്' ആണെന്നും ട്രംപ് ആരോപിച്ചു. തിരഞ്ഞെടുപ്പ് പോരാട്ടത്തില്‍ അസ്ഫുറ, മോന്‍കാഡ, നാസ്രല്ല എന്നീ മൂന്ന് പേരുകള്‍ക്കിടയില്‍ കടുത്ത മത്സരമാണെന്ന് സര്‍വേകള്‍ വ്യക്തമാക്കുന്നു.
മഡൂറോ വീണ്ടും അധികാരത്തിലെത്തുന്നതിനെ പല രാജ്യങ്ങളും അംഗീകരിക്കാത്ത പശ്ചാത്തലത്തില്‍, വെനിസ്വേലന്‍ പ്രസിഡന്റ് 'മയക്കുമരുന്ന് കാര്‍ട്ടലിന്റെ നേതാവ്' ആണെന്ന യുഎസ് ഭരണകൂടത്തിന്റെ ആരോപണം ട്രംപ് വീണ്ടും ആവര്‍ത്തിച്ചു. മഡുറോയും അദ്ദേഹത്തിന്റെ കൂട്ടാളികളായ 'നാര്‍ക്കോ ടെററിസ്റ്റുകളും' വെനിസ്വേല, ക്യൂബ, നിക്കാരാഗ്വ എന്നീ രാജ്യങ്ങളെ കൈവശപ്പെടുത്തിയിരിക്കുകയാണെന്ന് ട്രംപ് ആരോപിച്ചു. ഹോണ്ടുറാസ് നിലവില്‍ ഭരിക്കുന്ന പ്രസിഡന്റ് ഷിയോമാര കാസ്‌ട്രോ ക്യൂബയുമായും വെനിസ്വേലയുമായും അടുത്ത ബന്ധം പുലര്‍ത്തുന്നുവെങ്കിലും, യുഎസുമായുള്ള കൈമാറ്റ ഉടമ്പടി തുടരാനും അന്താരാഷ്ട്ര സംഘടിത കുറ്റകൃത്യങ്ങള്‍ തടയാന്‍ ലക്ഷ്യമിട്ട് പ്രവര്‍ത്തിക്കുന്ന യുഎസ് സൈനിക താവളത്തിന് രാജ്യത്ത് തുടരാന്‍ അനുമതി നല്‍കാനും സമ്മതിച്ചിട്ടുണ്ട്.
ഇതിനിടെ, വെനിസ്വേലയില്‍ നിന്ന് അമേരിക്കയിലേക്ക് മയക്കുമരുന്ന് കടത്തുന്നുവെന്ന് ആരോപിക്കപ്പെടുന്ന ബോട്ടുകളെ ലക്ഷ്യമിട്ട് ഓഗസ്റ്റില്‍ യുഎസ് നടത്തിയ 'ഓപ്പറേഷന്‍ സൗതേണ്‍ സ്പിയര്‍' ആക്രമണങ്ങളില്‍ 80ലധികം പേര്‍ കൊല്ലപ്പെട്ടതായി റിപ്പോര്‍ട്ടുണ്ട്. എന്നാല്‍ ബോട്ടുകളില്‍ മയക്കുമരുന്നുണ്ടായിരുന്നുവെന്ന് തെളിയിക്കുന്ന തെളിവുകള്‍ അധികൃതര്‍ പുറത്തുവിട്ടിട്ടില്ലെന്ന് ചൂണ്ടിക്കാട്ടി നിയമ വിദഗ്ധര്‍ ആക്രമണങ്ങളുടെ നിയമവശങ്ങള്‍ ചോദ്യം ചെയ്യുകയാണ്.
മയക്കുമരുന്ന് കേസില്‍ ശിക്ഷിക്കപ്പെട്ട മുന്‍ ഹോണ്ടുറാസ് പ്രസിഡന്റിന് മാപ്പ് നല്‍കുമെന്ന് ട്രംപ്
