പോളണ്ടിനെ മയക്കി മലയാൡ ബിയര്‍


JANUARY 17, 2023, 10:21 PM IST

വാര്‍സൗ: പോളണ്ടില്‍ ഹരമായി മലയാളി ബിയര്‍. പോളണ്ടില്‍ സ്ഥിരതാമസമാക്കിയ പാലക്കാടുകാരന്‍ ചന്ദ്രമോഹന്‍ നല്ലൂരാണ് മലയാളി ബിയറുമായി പോളണ്ടിന്റെ 'ദാഹം' തീര്‍ക്കുന്നത്. 

റഷ്യ- യുക്രെയ്ന്‍ യുദ്ധം കൊടുമ്പിരി കൊണ്ടതോടെ അരി വിതരണക്കാരനായ ആഫ്രിക്കന്‍ സുഹൃത്ത് ബുദ്ധിമുട്ടിലായതോടെയാണ് ബിയര്‍ ഉത്പാദനത്തെ കുറിച്ച് ചന്ദ്രമോഹന്‍ ചിന്തിച്ചു തുടങ്ങിയത്. അഞ്ച് കണ്ടെയ്നര്‍ അരിയായിരുന്നു യുദ്ധത്തെതുടര്‍ന്ന് വിതരണം ചെയ്യാനാവാതെ കെട്ടിക്കിടന്നത്. അത്രയും അരി സംഭരിച്ചുവെക്കാന്‍ പറ്റുന്ന സ്ഥലമോ സൗകര്യമോ ഇല്ലായിരുന്നു. വളര്‍ത്തുമൃഗങ്ങള്‍ക്ക് ഭക്ഷണം ആക്കിയാല്‍ പോലും അരി മിച്ചം വരുന്ന സാഹചര്യമായിരുന്നു. 

അങ്ങനെയിരിക്കെയാണ് ഇന്ത്യയ്ക്ക് പുറത്ത് ഉത്പാദിപ്പിക്കുന്ന കൊമ്പന്‍ ബിയറിനെ കുറിച്ച് ചന്ദ്രമോഹന്‍ വായിക്കാനിടയായത്. അതോടെ അരിയില്‍നിന്നുള്ള ബിയര്‍ എന്ന ആശയം ഉദിച്ചു. പോളണ്ടിലെ ഒരു റസ്റ്റാേറന്റ് വാങ്ങാമെന്ന് അറിയിച്ചതോടെ ആവേശം വര്‍ധിച്ചു. എന്നാല്‍ ബിയര്‍ ഉത്പാദനം അത്ര എളുപ്പമായിരുന്നില്ലെന്ന് ചന്ദ്രമോഹന്‍ തന്നെ വ്യക്തമാക്കി. ആദ്യ രണ്ട് ശ്രമങ്ങള്‍ പരാജയപ്പെട്ടു. മൂന്നാമത്തെ ശ്രമത്തിലാണ് ചേരുവകള്‍ എല്ലാം കൃത്യമായി വന്നത്. 

പിന്നീട് ബിയറിന് എന്ത് പേരിടുമെന്ന് ആലോചിക്കാന്‍ ചന്ദ്രമോഹന് അധിക സമയം വേണ്ടിവന്നില്ല. മലയാളി എന്ന പേരിലേക്ക് അദ്ദേഹം എത്തിച്ചേര്‍ന്നു. പേര് ക്ലിക്കായതോടെ ട്രേഡ് മാര്‍ക്കിനും അപേക്ഷിച്ചു. ബിയര്‍ കുപ്പിയുടെ പുറത്തെ സ്റ്റിക്കറില്‍ മലയാളി എന്ന പേരിനൊപ്പം നല്‍കിയിരിക്കുന്ന ചിത്രത്തിനും മലയാളി ടച്ചുണ്ട്. കേരളത്തിലെ പരമ്പരാഗത കലാരൂപമായ കഥകളിയുടെ മുടി വെച്ച, കൂളിങ് ഗ്ലാസ് ധരിച്ച കൊമ്പന്‍ മീശയുള്ള ഒരു 'മലയാളി'യെ അതില്‍ കാണാം.

ബിയര്‍ ഉത്പാദന സംരംഭത്തില്‍ ചന്ദ്രമോഹന്റെ പങ്കാളിയും ഒരു മലയാളിയാണ്. ബ്രാന്‍ഡിങ് വിദഗ്ധനായ സര്‍ഗീവ് സുകുമാരനാണ് സംരംഭത്തില്‍ പങ്കാളി. പേരിനൊപ്പം ബിയറും പോളണ്ടില്‍ ഹിറ്റായി. രണ്ട് മാസത്തിനിടെ അരലക്ഷം കുപ്പി ബിയറാണ് രാജ്യത്ത് വിറ്റുപോയത്. ലിറ്റില്‍ ഇന്ത്യ ഗ്രൂപ്പാണ് മലയാളി ബിയര്‍ പോളണ്ടില്‍ വിതരണം ചെയ്യുന്നത്. യൂറോപ്യന്‍ രാജ്യങ്ങളിലേക്കുകൂടി ബിയര്‍ വിതരണം ചെയ്യാനുള്ള തയ്യാറെടുപ്പിലാണ് ചന്ദ്രമോഹന്‍. കോഴിക്കോടായിരുന്നു ചന്ദ്രമോഹന്റെ സ്‌കൂള്‍ വിദ്യാഭ്യാസവും ബിരുദ പഠനവും. അതിനുശേഷം ബിരുദാനന്തര പഠനത്തിനായി സ്പെയിനിലെത്തി. പിന്നീട് പോളണ്ടില്‍ സ്ഥിരതാമസമാക്കി. പോളണ്ടിലെ ചേംബര്‍ ഓഫ് കൊമേഴ്‌സിന്റെ ആദ്യ മലയാളി പ്രസിഡന്റ് കൂടിയാണ് ഈ യുവ സംരംഭകന്‍.

Other News