ലണ്ടന്‍: ബ്രിട്ടീഷ് വിദ്യാഭ്യാസ മേഖലയ്ക്ക് പുത്തനുണര്‍വ്വ് നല്‍കിയ ഒന്നായിരുന്നു കഴിഞ്ഞ ബോറിസ് ജോണ്‍സണ്‍ സര്‍ക്കാരിന്റെ കാലത്തെ സ്റ്റുഡന്റ് വിസ നയം. ഇതനുസരിച്ച് പോസ്റ്റ് ഗ്രാഡ്വേറ്റ് പഠനത്തിനെത്തുന്ന വിദ്യാര്‍ത്ഥികള്‍ക്ക് പഠനശേഷം രണ്ടു വര്‍ഷം കൂടി യു കെയില്‍ തുടര്‍ന്ന് ജോലിചെയ്യാന്‍ കഴിയും. പി എച്ച് ഡി കഴിഞ്ഞവര്‍ക്കാണെങ്കില്‍ മൂന്ന് വര്‍ഷം വരെ തുടരാന്‍ കഴിയുമായിരുന്നു.എന്നാല്‍ പോസ്റ്റ് സ്റ്റഡി വിസ റൂട്ടില്‍ വിദേശ വിദ്യാര്‍ത്ഥികള്‍ക്ക് അനുവദിച്ചിരിക്കുന്ന താമസ കാലയളവ് വെട്ടിക്കുറയ്ക്കാനുള്ള നീക്കത്തിലാണ് ബ്രിട്ടീഷ് ആഭ്യന്തര സെക്രട്ടറി സുല്ല ബ്രാവര്‍മാന്‍. പദ്ധതിയുമായി ബന്ധപ്പെട്ട് ബ്രിട്ടീഷ് ആഭ്യന്തര വകുപ്പും രാജ്യത്തെ വിദ്യാഭ്യാസ വകുപ്പുമായി കടുത്ത ഭിന്നതയിലാണെന്നാണ് യുകെ മാധ്യമങ്ങള്‍ റിപ്പോര്‍ട്ട് ചെയ്യുന്നു.

വിദേശ ബിരുദധാരികള്‍ക്ക് - ഇന്ത്യക്കാര്‍ ഉള്‍പ്പെടെ - തൊഴില്‍ അന്വേഷണങ്ങള്‍ തുടരാനും ഒരു പ്രത്യേക തൊഴില്‍ ഓഫറിന്റെ ആവശ്യമില്ലാതെ രണ്ട് വര്‍ഷം വരെ തൊഴില്‍ പരിചയം നേടാനുമുള്ള അവസരം അനുവദിക്കുന്ന പുതിയ ഗ്രാജ്വേറ്റ് വിസ റൂട്ട് ബ്രാവര്‍മാന്റെ നിര്‍ദ്ദിഷ്ട അവലോകനത്തിന് കീഴില്‍ വെട്ടിക്കുറയ്ക്കുമെന്ന ആശങ്കയിലാണ്.

ഇന്ത്യന്‍ വംശജയായ ആഭ്യന്തര സെക്രട്ടറി ഗ്രാജ്വേറ്റ് വിസ റൂട്ട് 'പരിഷ്‌കരിക്കാന്‍' ഒരു പദ്ധതി തയ്യാറാക്കിയിട്ടുള്ളതായി 'ദ ടൈംസ്' റിപ്പോര്‍ട്ട് ചെയ്യുന്നു.  ഒന്നികില്‍ വിദ്യാര്‍ത്ഥികള്‍ക്ക് വൈദഗ്ധ്യമുള്ള ജോലി കരസ്ഥമാക്കിക്കൊണ്ട് തൊഴില്‍ വിസ നേടണം അല്ലെങ്കില്‍ പഠനം പൂര്‍ത്തിയായി ആറ് മാസത്തിന് ശേഷം യുകെ വിടണം എന്നതാണ് പുതിയ നിര്‍ദ്ദേശം. അന്താരാഷ്ട്ര വിദ്യാര്‍ത്ഥികളോടുള്ള യുകെയുടെ ആകര്‍ഷണീയതയെ ദോഷകരമായി ബാധിക്കുമെന്ന് ഭയപ്പെടുന്നതിനാല്‍, യുകെ വിദ്യാഭ്യാസ വകുപ്പ് (ഡിഎഫ്ഇ) മാറ്റങ്ങള്‍ തടയാന്‍ ശ്രമിക്കുകയാണെന്ന റിപ്പോര്‍ട്ടും വിദ്യാഭ്യാസ വകുപ്പ് ഉദ്യോഗസ്ഥരെ ഉദ്ധരിച്ച് പത്രം പരാമര്‍ശിക്കുന്നു.

'മാന്യത കുറഞ്ഞ സര്‍വ്വകലാശാലകളിലെ' ഹ്രസ്വ കോഴ്സുകളിലെ വിദ്യാര്‍ത്ഥികള്‍ ഗ്രാജ്വേറ്റ് വിസ കൂടുതലായി ഉപയോഗിക്കുന്നുണ്ടെന്ന് ബ്രാവര്‍മാന്റെ പദ്ധതിയെ പിന്തുണയ്ക്കുന്ന ഒരു സര്‍ക്കാര്‍ ഉറവിടം പറഞ്ഞു. ''ഇത് ഒരു പിന്‍വാതില്‍ ഇമിഗ്രേഷന്‍ റൂട്ടായാണ് വിദേശ വിദ്യാര്‍ത്ഥികള്‍ ഉപയോഗിക്കുന്നതെന്ന്,'' ഉറവിടത്തെ ഉദ്ധരിച്ച് പത്രം പറഞ്ഞു.

എന്നിരുന്നാലും, യുകെയുടെ പോസ്റ്റ്-സ്റ്റഡി ഓഫര്‍ എന്ന് വിളിക്കപ്പെടുന്ന രണ്ട് വര്‍ഷത്തെ ഗ്രാജുവേറ്റ് വിസ ബ്രിട്ടന്റെ മിക്ക പ്രധാന എതിരാളികളുമായും യോജിപ്പിച്ചിരിക്കുന്നുവെന്ന് യുകെ വിദ്യാഭ്യാസ വകുപ്പ് വാദിക്കുന്നു, യുഎസ് മാത്രമാണ് ഒരു വര്‍ഷത്തെ വിസ വാഗ്ദാനം ചെയ്യുന്നത്.

ഓഫീസ് ഫോര്‍ നാഷണല്‍ സ്റ്റാറ്റിസ്റ്റിക്സിന്റെ (ONS) ഏറ്റവും പുതിയ സ്ഥിതിവിവരക്കണക്കുകള്‍ പ്രകാരം, കഴിഞ്ഞ വര്‍ഷം യുകെയിലെ വിദേശ വിദ്യാര്‍ത്ഥികളുടെ ഏറ്റവും വലിയ സമൂഹം എന്ന നിലയില്‍ ഇന്ത്യക്കാര്‍ ചൈനയെ പിന്നിലാക്കിയിരിക്കുകയാണ്. 2021 ജൂലൈയില്‍ അവതരിപ്പിച്ച പുതിയ ഗ്രാജ്വേറ്റ് വിസ റൂട്ടില്‍ ഇന്ത്യക്കാരാണ് ആധിപത്യം നേടിയത് -അതായത് അനുവദിക്കപ്പെട്ട വിദ്യാര്‍ത്ഥി വിസകളില്‍ 41 ശതമാനം ഇന്ത്യക്കാരാണ്.

യുകെയിലേക്ക് വരുന്ന വിദേശ വിദ്യാര്‍ത്ഥികളുടെ എണ്ണം കുറയ്ക്കുന്നതിനുള്ള നിര്‍ദ്ദേശങ്ങള്‍ സമര്‍പ്പിക്കാന്‍ പ്രധാനമന്ത്രി ഋഷി സുനാക്ക് ഹോം ഓഫീസിനോടും ഡിഎഫ്ഇയോടും ആവശ്യപ്പെട്ടതിനെത്തുടര്‍ന്ന് തയ്യാറാക്കിയ നിരവധി നിര്‍ദ്ദേശങ്ങളില്‍ ഒന്നാണ് ബ്രാവര്‍മാന്റെ നിര്‍ദ്ദേശം. യുകെയില്‍ 680,000 വിദേശ വിദ്യാര്‍ത്ഥികളുണ്ടെന്ന് കഴിഞ്ഞ ആഴ്ച പ്രസിദ്ധീകരിച്ച കണക്കുകള്‍ കാണിക്കുന്നു. ഗവണ്‍മെന്റിന്റെ 2019 ലെ ഉന്നത വിദ്യാഭ്യാസ തന്ത്രത്തില്‍ 2030 ഓടെ 600,000 വിദ്യാര്‍ത്ഥികളെ ലക്ഷ്യം വച്ചിരുന്നു, അത് കഴിഞ്ഞ വര്‍ഷം തന്നെ പൂര്‍ത്തീകരിച്ചിരുന്നു.

പരിഗണിക്കുന്ന മറ്റൊരു നിര്‍ദ്ദേശം, വിദേശ വിദ്യാര്‍ത്ഥികള്‍ക്ക് പിഎച്ച്ഡി പോലുള്ള ബിരുദാനന്തര ഗവേഷണ അധിഷ്ഠിത കോഴ്സുകളിലോ കുറഞ്ഞത് രണ്ട് വര്‍ഷമെങ്കിലും ദൈര്‍ഘ്യമുള്ള ബിരുദാനന്തര കോഴ്സുകളിലോ ആണെങ്കില്‍ മാത്രമേ ആശ്രിതരായ കുടുംബാംഗങ്ങളെ അവരോടൊപ്പം കൊണ്ടുവരാന്‍ അനുവദിക്കൂ എന്നതാണ്.

വിദ്യാര്‍ത്ഥി വിസ വിഷയത്തില്‍ ആഭ്യന്തര വകുപ്പും വിദ്യാഭ്യാസ വകുപ്പും തമ്മിലുള്ള ഭിന്നതയെക്കുറിച്ച് പ്രതികരിക്കാന്‍ യുകെ ഹോം ഓഫീസ് വിസമ്മതിച്ചു.

 എന്നാല്‍  യുകെയുടെ മികച്ച അക്കാദമിക് പ്രശസ്തിക്ക് സംഭാവന നല്‍കാനും ലോക വേദിയില്‍ നമ്മുടെ സര്‍വ്വകലാശാലകളെ മത്സരക്ഷമത നിലനിര്‍ത്താനും സഹായിക്കുന്നതിന് ലോകമെമ്പാടുമുള്ള മികച്ച പ്രതിഭകളെ ആകര്‍ഷിക്കുന്നത് ഉള്‍പ്പെടെ 'യുകെയുടെ ആവശ്യങ്ങള്‍ക്കനുസരിച്ച് വഴക്കമുള്ളതായിട്ടാണ് തങ്ങളുടെ പോയിന്റ് അധിഷ്ഠിത സിസ്റ്റം രൂപകല്‍പ്പന ചെയ്തിരിക്കുന്നതെന്ന് അവര്‍ പറഞ്ഞു. 

'ഞങ്ങളുടെ എല്ലാ ഇമിഗ്രേഷന്‍ നയങ്ങളും അവര്‍ രാജ്യത്തെ ഏറ്റവും മികച്ച രീതിയില്‍ സേവിക്കുന്നുവെന്നും പൊതുജനങ്ങളുടെ മുന്‍ഗണനകളെ പ്രതിഫലിപ്പിക്കുന്നുവെന്നും ഉറപ്പുവരുത്തുന്നതിനായി ഞങ്ങള്‍ നിരന്തരമായ അവലോകനത്തിന് വിധേയമായി സൂക്ഷിക്കുന്നുവെന്നും യുകെ ഹോം ഓഫീസ് അറിയിച്ചു.