ലണ്ടന്‍: രണ്ടാം ലോക മഹായുദ്ധ കാലത്തെ ബ്രിട്ടീഷ് പ്രധാനമന്ത്രിയായിരുന്ന വിന്‍സ്റ്റണ്‍ ചര്‍ച്ചിലിന്റെ ഓള്‍ഡ് വാര്‍ ഓഫീസ് പുനരുദ്ധരിച്ച് ആഡംബര ഹോട്ടലാക്കി മാറ്റി ഹിന്ദുജ ഗ്രൂപ്പ്. ലണ്ടന്‍ നഗര ഹൃദയ ഭാഗത്തുള്ള ആഡംബര ഹോട്ടലിന്റെ ഉദ്ഘാടനം 26ന് നടക്കും. 

ഹിന്ദുജ ഗ്രൂപ്പ് ആഗോള പ്രശസ്ത റാഫിള്‍സ് ഹോട്ടല്‍സ് ആന്റ് റിസോര്‍ട്ട്സുമായി സഹകരിച്ചാണ് ആഡംബര ഹോട്ടല്‍ ആരംഭിക്കുന്നത്. വൈറ്റിഹാളില്‍ ഡൗണിങ് സ്ട്രീറ്റിന് എതിര്‍വശത്തുള്ള കെട്ടിടം എട്ട് വര്‍ഷം മുന്‍പാണ് ഹിന്ദുജ കുടുംബം കരസ്ഥമാക്കിയത്. തുടര്‍ന്ന് ഇത് ആഡംബര വസതികളും റസ്റ്റോറന്റുകളും സ്പാകളും ഉള്‍പ്പെടുന്ന ഹബ് ആക്കി മാറ്റുവാന്‍ റാഫിള്‍സ് ഹോട്ടല്‍സുമായി സഹകരണമുണ്ടാക്കുകയായിരുന്നു. 

ബ്രിട്ടീഷ് വാസ്തുശില്‍പിയായ വില്യം യങ് രൂപകല്‍പന ചെയ്ത ഓള്‍ഡ് വാര്‍ ഓഫീസ് 1906ലാണ് പൂര്‍ത്തിയാക്കിയത്. അതിനു മുന്‍പ് ഈ സൈറ്റ് വൈറ്റ്ഹാള്‍ ഒറിജിനല്‍ പാലസ് ആയിരുന്നു. വിന്‍സ്റ്റണ്‍ ചര്‍ച്ചിലും ഡേവിഡ് ലോയ്ഡ് ജോര്‍ജും പോലുള്ള രാഷ്ട്രീയ, സൈനിക നേതാക്കള്‍ ഇവിടെയുള്ള ഓഫീസില്‍ പ്രവര്‍ത്തിച്ചിരുന്നു. ഇതിന്റെ വാസ്തുശില്‍പ സൗന്ദര്യം പിന്നീട് ജെയിംസ് ബോണ്ട് ചിത്രങ്ങള്‍ക്കും വളരെ അടുത്ത കാലത്ത് ദി ക്രൗണ്‍ നെറ്റ്ഫ്‌ളിക്സ് പരമ്പരക്കും പശ്ചാത്തലമായിരുന്നു.

നൂറുകണക്കിന് കരകൗശല വിദഗ്ധരുടെ സഹായത്തോടെയുള്ള നവീകരണ ഭാഗമായി അതിലോലമായ മൊസൈക് ഫ്ളോറുകള്‍, ഓക് പാനലിംഗ്, തിളങ്ങുന്ന ഷാന്‍ഡിലിയറുകള്‍, ഗംഭീരമായ മാര്‍ബിള്‍ ഗോവണി എന്നിവ ഉള്‍പ്പെടെയുള്ള ചരിത്രപരമായ ഇന്റീരിയര്‍ ഘടകങ്ങള്‍ പുനഃസ്ഥാപിച്ചു. 120 മുറികളും സ്യൂട്ടുകളും ഷെഫ് മൗറോ കൊളാഗ്രെക്കോയുടെ സിഗ്നേച്ചര്‍ ഡൈനിംഗ് അനുഭവങ്ങളും ഗ്രാന്‍ഡ് ബാള്‍റൂം ഉള്‍പ്പെടെയുള്ള വിനോദ സ്ഥലങ്ങളും ഓള്‍ഡ് വാര്‍ ഓഫീസില്‍ ഒരുക്കിയിട്ടുണ്ട്.