ശസ്ത്രക്രിയയില്‍ യുവതിയുടെ കൈവിരല്‍ നിശ്ചലമായ സംഭവത്തില്‍ ഒരു ലക്ഷം ദിര്‍ഹം നഷ്ടപരിഹാരം


JANUARY 8, 2022, 9:01 AM IST

ദുബായ്: തെറ്റായും അനാവശ്യമായും നടത്തിയ ശസ്ത്രക്രിയയെ തുടര്‍ന്ന് യുവതിയുടെ കൈവിരല്‍ നിശ്ചലമായ സംഭവത്തില്‍ രണ്ട് ആശുപത്രികള്‍ക്കും ഡോക്ടര്‍മാര്‍ക്കും ഒരു ലക്ഷം ദിര്‍ഹം പിഴയിട്ട് ദുബായ് കോടതി. 38കാരിയായ ബാങ്ക് ഉദ്യോഗസ്ഥയുടെ വലത് മോതിര വിരലാണ് രണ്ട് വ്യത്യസ്ത ആശുപത്രികളിലായി നടത്തിയ രണ്ട് ശസ്ത്രക്രിയകളെ തുടര്‍ന്ന് അനക്കമില്ലാതെയായത്. തെറ്റായ ചികിത്സയെ തുടര്‍ന്ന് തന്റെ വിരല്‍ പ്രവര്‍ത്തന രഹിതമായെന്നു കാണിച്ച് യുവതി നല്‍കിയ പരാതിയിലാണ് നടപടി.

കാറിന്റെ ഡോറിനിടയില്‍ കൈവിരല്‍ കുടുങ്ങിയതിനെ തുടര്‍ന്നാണ് യുവതി ആശുപത്രിയിലെത്തുന്നത്. എക്‌സ്‌റേയില്‍ എല്ലിന് ചെറിയ പൊട്ടലുണ്ടെന്ന് കണ്ടെത്തിയതിനെ തുടര്‍ന്ന് വിരല്‍ ബാന്‍ഡേജ് ചെയ്തു. എന്നാല്‍, 17 ദിവസം കഴിഞ്ഞിട്ടും വേദനയില്‍ മാറ്റമില്ലാതിരുന്നതിനെ തുടര്‍ന്ന് മറ്റൊരു ആശുപത്രിയില്‍ ചികിത്സ തേടുകയായിരുന്നു. അവിടെയുള്ള എല്ലു രോഗ വിധഗ്ദനെയായിരുന്നു യുവതി കണ്ടത്. വിരല്‍ പരിശോധിച്ച ഡോക്ടര്‍ അവര്‍ക്ക് ശസ്ത്രക്രിയ നിര്‍ദ്ദേശിച്ചത് അനുസരിച്ച് യുവതി ശസ്ത്രക്രിയയ്ക്ക് വിധേയയാവുകയും ചെയ്തു. അപകടം സംഭവിച്ച് ഒരു മാസത്തിന് ശേഷമായിരുന്നു ഇത്.

എന്നാല്‍, ശസ്ത്രക്രിയയ്ക്കു ശേഷവും വിരലിന്റെ നിശ്ചലാവസ്ഥ അതേരീതിയില്‍ തുടര്‍ന്നു. വീണ്ടും രണ്ട് മാസം കഴിഞ്ഞിട്ടും ശക്തമായ വേദന കൂടി ആയതോടെ മൂന്നാമതൊരു ആശുപത്രിയിലെ ഡോക്ടറെ യുവതി സമീപിച്ചു. ആ ഡോക്ടര്‍ വീണ്ടുമൊരു സര്‍ജറി കൂടി നിര്‍ദ്ദേശിക്കുകയായിരുന്നു. ഗത്യന്തരമില്ലാതെ വീണ്ടും സര്‍ജറി ചെയ്‌തെങ്കിലും കൈവിരലിന്റെ അവസ്ഥയ്ക്ക് ഒരു മാറ്റവുമുണ്ടായില്ല. ഇതേത്തുടര്‍ന്നാണ് മൂന്ന് ആശുപത്രികള്‍ക്കും ഡോക്ടര്‍മാര്‍ക്കുമെതിരെ പരാതിയുമായി യുവതി ദുബായ് ഹെല്‍ത്ത് അതോറിറ്റിയെ സമീപിച്ചത്.

ഇതുമായി ബന്ധപ്പെട്ട് അതോറിറ്റി നടത്തിയ അന്വേഷണത്തില്‍ രണ്ടാമത്തെയും മൂന്നാമത്തെയും ആശുപത്രികളും ഡോക്ടര്‍മാരും യുവതിയുടെ വിരല്‍ ശസ്ത്രക്രിയയ്ക്ക് വിധേയമാക്കിയത് മെഡിക്കല്‍ നിയമങ്ങള്‍ക്ക് വിരുദ്ധമായാണെന്ന് കണ്ടെത്തി. അപകടം സംഭവിച്ച് നിശ്ചിത സമയ പരിധി കഴിഞ്ഞാല്‍ സര്‍ജറി നടത്തുന്നത് കൊണ്ട് കാര്യമില്ല എന്നതിന്റെ അടിസ്ഥാനത്തിലാണിത്. അതേസമയം, ആദ്യത്തെ ആശുപത്രിയുടെയും ഡോക്ടര്‍മാരുടെയും ഭാഗത്ത് നിന്ന് തെറ്റായ നടപടികള്‍ ഉണ്ടായിട്ടില്ലെന്നും അന്വേഷണത്തില്‍ വ്യക്തമായി.

Other News