ഭോപ്പാല്‍: അധികാരത്തിന്റെ ശീതളിമയില്‍ നൂറു കോടി രൂപ ചെലവഴിച്ച് ബി ജെ പി പത്തു നില ഓഫിസ് കെട്ടിടം പണിയുന്നു. ഈ വര്‍ഷാവസാനം തെരഞ്ഞെടുപ്പ് വരാനിരിക്കെയാണ് ബി ജെ പിയുടെ ഓഫിസ് നിര്‍മാണം ആരംഭിക്കുന്നത്.

1991ലാണ് ഭോപാലില്‍ രണ്ടു കോടി രൂപ ചെലവില്‍ ബി ജെ പിയുടെ ഓഫിസ് പണിതത്. അത്യാന്താധുനിക സൗകര്യങ്ങളോടെ തയ്യാറാക്കുന്ന പുതിയ ഓഫിസ് രാജ്യത്തെ ഏറ്റവും വലിയ പാര്‍ട്ടി ഓഫിസായിരിക്കുമെന്നാണ് കരുതുന്നത്. 

ബി ജെ പി അധ്യക്ഷന്‍ ജെ പി നദ്ദ ഞായറാഴ്ച പുതിയ കെട്ടിടത്തിന്റെ ഭൂമിപൂജയും ശിലാസ്ഥാപനവും നിര്‍വഹിക്കും. രാജ്യത്തുടനീളം എല്ലാ ജില്ലകളിലും ഒരു ഓഫീസ് സ്ഥാപിക്കാനാണ് ബി ജെ പിയുടെ തീരുമാനം.

പുതിയ ഓഫീസ് അത്യാധുനിക സൗകര്യങ്ങളോടെയാണ് സജ്ജീകരിക്കുകയെന്ന് മധ്യപ്രദേശ് ബി ജെ പി അധ്യക്ഷന്‍ വി ഡി ശര്‍മ പറഞ്ഞു. മെയിന്‍ ഓഫീസ്, നേതാക്കളുടെ വസതി, ജീവനക്കാരുടെ വസതി എന്നിങ്ങനെ മൂന്ന് ഭാഗങ്ങളായി തിരിച്ചാണ് ഓഫിസ് പണിയുന്നത്. ആയിരം പേര്‍ക്ക് ഇരിക്കാവുന്ന ഓഡിറ്റോറിയവുമുണ്ടാകും.