പഞ്ചാബ് മുൻ മുഖ്യമന്ത്രി അമരീന്ദർ സിംഗ് ബിജെപിയിൽ ചേർന്നു


SEPTEMBER 22, 2022, 7:33 AM IST

ന്യൂഡൽഹി: മുൻ പഞ്ചാബ് മുഖ്യമന്ത്രി അമരീന്ദർ സിങ് ബിജെപിയിൽ ചേർന്നു. അമരീന്ദർ സിങ് സ്വന്തം പാർട്ടിയായ പഞ്ചാബ് ലോക് കോൺഗ്രസിനെ ബിജെപിയിൽ ലയിപ്പിച്ചു. കഴിഞ്ഞ വർഷമാണ് അമരീന്ദർ സിങ് സ്വന്തം പാർട്ടി രൂപീകരിച്ചത്.

മുൻ പഞ്ചാബ് മുഖ്യമന്ത്രിയായിരുന്ന അമരീന്ദർ സിങ് കോൺഗ്രസ് വിട്ട ശേഷമാണ് സ്വന്തം പാർട്ടിയായ പഞ്ചാബ് ലോക് കോൺഗ്രസ് രൂപീകരിച്ചത്. കോൺഗ്രസ് നേതൃത്വവുമായി ഇടഞ്ഞതിനെ തുടർന്ന് മുഖ്യമന്ത്രി സ്ഥാനം ഒഴിയണമെന്ന് കോൺഗ്രസ് നേതൃത്വം അമരീന്ദർ സിങിനോട് ആവശ്യപ്പെട്ടിരുന്നു. ബിജെപി മാത്രമാണ് രാജ്യം നേരിടുന്ന പ്രശ്നനങ്ങളെ ഗൗരവത്തോടെ കാണുന്നതെന്ന് ലയനത്തിന് ശേഷം അമരീന്ദർ സിങ് ഡൽഹിയിൽ പറഞ്ഞു.പഞ്ചാബ് അതിർത്തിയിൽ കൂടി വരുന്ന സുരക്ഷാഭീഷണിയെ കുറിച്ചും അമരീന്ദർ സിങ് സംസാരിച്ചു. പഞ്ചാബിനെയും രാജ്യത്തെയും തനിക്ക് രക്ഷിക്കണമെന്നും അമരീന്ദർ കൂട്ടിച്ചേർത്തു. പാകിസ്ഥാനുമായുള്ള ബന്ധം ഉലഞ്ഞുകൊണ്ടിരിക്കുകയാണ്. അതിർത്തി സംസ്ഥാനമായ പഞ്ചാബിൽ പ്രശ്നങ്ങൾ ഉണ്ടാക്കാൻ ഡ്രോണുകൾ കടന്നു വരുന്നത് കാണാം. ചൈനയും അധികം വിദൂരതയിലല്ല.സംസ്ഥാനത്തെയും രാജ്യത്തെയും സംരക്ഷിക്കുക എന്നത് കടമയാണെന്നും അമരീന്ദർ സിങ് പറഞ്ഞു.അടുത്ത ലോക്‌സഭാ തെരഞ്ഞെടുപ്പിൽ പഞ്ചാബിൽ ബിജെപിയുടെ മുഖമാവുക അമരീന്ദർ സിങ്ങായിരിക്കും. ബിജെപി ആസ്ഥാനത്ത് നടന്ന ലയന ചടങ്ങിൽ ബിജെപി നേതാക്കളും കേന്ദ്രമന്ത്രിമാരും പങ്കെടുത്തു. കക്ഷി രാഷ്ട്രീയത്തിനപ്പുറം അമരീന്ദർ സിങ് ദേശീയ താത്പര്യത്തിനാണ് മുൻ‌തൂക്കം കൊടുക്കുന്നതെന്ന് കേന്ദ്രമന്ത്രി നരേന്ദ്ര സിംഗ് തോമർ പറഞ്ഞു. പഞ്ചാബ് എന്ന അതിർത്തി സംസ്ഥാനത്തിലെ ജനങ്ങളുടെ സമാധാനത്തിനും സുരക്ഷക്കുമാണ് അമരീന്ദർ മുൻതൂക്കം കൊടുക്കുന്നതെന്നും തോമർ പറഞ്ഞു.

Other News