ഇന്ത്യൻ യുദ്ധക്കപ്പലിന് കമാൻഡിം​ഗ് ഓഫീസറായി വനിത ഉദ്യോ​ഗസ്ഥ; ചരിത്രത്തിലാദ്യം


DECEMBER 2, 2023, 7:34 PM IST

ന്യൂഡൽഹി: ചരിത്രനിമിഷത്തിന് സാക്ഷ്യം വഹിച്ച് നാവികസേന. ഇന്ത്യൻ നാവികസേനയുടെ ചരിത്രത്തി)ൽ ആദ്യമായി യുദ്ധക്കപ്പലിന് കമാൻഡിം​ഗ് ഓഫീസറായി വനിത ഉദ്യോ​ഗസ്ഥ  വരുന്നു. ആദ്യ വനിതാ കമാൻഡിംഗ് ഓഫീസറെ നാവിക കപ്പലിൽ നിയമിച്ചതായി നാവികസേനാ മേധാവി അഡ്മിറൽ ആർ ഹരി കുമാർ പറഞ്ഞു. നാവികസേനാ ദിനത്തിന്  മുന്നോടിയായി നടത്തിയ പത്രസമ്മേളനത്തിലാണ് അഡ്മിറൽ ആർ ഹരി കുമാർ ഇക്കാര്യം അറിയിച്ചത്. അഗ്നിപഥ് പദ്ധതി  നടപ്പാക്കുന്നത് വളരെ ആവശ്യമായതും പരിവർത്തനപരവുമായ മാറ്റമാണെന്നും അദ്ദേഹം കൂട്ടിച്ചേർത്തു. "ഞങ്ങളുടെ ആദ്യ ബാച്ച് അഗ്നിവീർസ് ഈ വർഷം മാർച്ചിൽ ഐഎൻഎസ് ചിൽകയിൽ നിന്ന് ബിരുദം നേടി. പ്രധാനമായി, ഈ അഗ്നിവീർ ബാച്ചിൽ 272 വനിതാ അഗ്നിവീർ ട്രെയിനികളും ഉൾപ്പെടുന്നു," അഡ്മിറൽ കുമാർ പറഞ്ഞു.

പശ്ചിമ നാവിക കമാൻഡിന് കീഴിലുള്ള ഗോവയിലെ ഫാസ്റ്റ് അറ്റാക്ക് ക്രാഫ്റ്റ് വിഭാഗത്തിലുള്ള യുദ്ധക്കപ്പലിലാണ് വനിതാ കമാൻഡിങ് ഓഫീസർ ചുമതലയേൽക്കുന്നത്. "ഇന്ത്യൻ നാവിക കപ്പലിന്റെ ആദ്യ വനിതാ കമാൻഡിംഗ് ഓഫീസറെ നിയമിച്ചു. ഭാവിയിൽ നാവികസേനയുടെ അഭിലഷണീയവും ചലനാത്മകവുമായ പാതയിൽ തുടരുമെന്ന് ഉറപ്പാക്കാൻ നിലവിലെ അവസ്ഥയെ നിരന്തരം വെല്ലുവിളിക്കാനുള്ള ഞങ്ങളുടെ ശ്രമമാണിത്," അഡ്മിറൽ കുമാർ പറഞ്ഞു.

"2023 നമ്മുടെ രാജ്യത്തെ സംബന്ധിച്ചിടത്തോളം ശ്രദ്ധേയമായ വർഷമാണ്. സാമ്പത്തിക മുന്നണിയോ നയതന്ത്രമോ കായിക മേഖലയോ ആകട്ടെ, വിവിധ മേഖലകളിൽ നാവികസേന മുദ്ര പതിപ്പിച്ചിട്ടുണ്ട്," അഡ്മിറൽ വ്യക്തമാക്കി. സ്വാശ്രയത്വത്തിലും സാങ്കേതിക വികസനത്തിലും, ഇന്ത്യൻ നാവികസേന ബഡ്ജറ്റ് ഒപ്റ്റിമൈസേഷന്റെ പാതയിൽ സുസ്ഥിരമാണെന്ന് നാവികസേനാ മേധാവി പറഞ്ഞു. 

Other News