കോട്ടയം: കെ ആര്‍ നാരായണന്‍ ഇന്‍സ്റ്റിറ്റ്യൂട്ട് ഡയറക്ടര്‍ ശങ്കര്‍ മോഹന് പിന്നാലെ അധ്യാപകരുടേയും ജീവനക്കാരുടേയും കൂട്ടരാജി. ഇന്‍സ്റ്റിറ്റ്യൂട്ടിലെ ഡീന്‍ ഉള്‍പ്പെടെ എട്ട് പേരാണ് രാജിക്കത്ത് നല്‍കിയത്. പതിനെട്ടാം തിയ്യതി ശങ്കര്‍ മോഹന് രാജിക്കത്ത് നല്‍കിയിരുന്നുവെന്നാണ് രാജിവെച്ചവര്‍ പറയുന്നത്. 

ഡീന്‍ ചന്ദ്രമോഹന്‍, സിനിമോട്ടോഗ്രാഫി വിഭാഗത്തിലെ ഫൗസിയ, നന്ദകുമാര്‍, ഓഡിയോ വിഭാഗത്തിലെ വിനോദ്,  അസിസ്റ്റന്റ് പ്രൊഫസര്‍ ഡയറക്ഷന്‍ ബാബാനി പ്രമോദി, പ്രൊഡക്ഷന്‍ എക്സിക്യൂട്ടീവ് സന്തോഷ്, അഡ്മിനിസ്ട്രേഷന്‍ ഓഫീസര്‍ അനില്‍ കുമാര്‍ എന്നിവര്‍ ഉള്‍പ്പെടെയാണ് രാജിവച്ചത്. ഇവരെല്ലാവുരം ഡയറക്ടര്‍ ശങ്കര്‍ മോഹനുമായി അടുപ്പം പുലര്‍ത്തിയിരുന്നവരാണെന്നാണ് പറയപ്പെടുന്നത്. അധ്യാപകര്‍ക്ക് ഗുണനിലവാരമില്ലെന്ന പരാതി വിദ്യാര്‍ഥികള്‍ ഉന്നയിച്ചിരുന്നു. ഇത് അംഗീകരിക്കാനാവില്ലെന്ന് ചൂണ്ടിക്കാട്ടിയാണ് രാജിവെച്ചിരിക്കുന്നത്. 

ശങ്കര്‍ മോഹന്‍ രാജിവെച്ച ഒഴിവില്‍ പുതിയ ഡയറക്ടറെ കണ്ടെത്താന്‍ സര്‍ക്കാര്‍ സെര്‍ച്ച് കമ്മിറ്റി രൂപീകരിച്ചിട്ടുണ്ട്. ഡോ. വി കെ രാമചന്ദ്രന്‍, ഷാജി എന്‍ കരുണ്‍, ടി വി ചന്ദ്രന്‍ എന്നിവരാണ് സെര്‍ച്ച് കമ്മിറ്റിയിലുള്ളവര്‍. ചെയര്‍മാന്‍ അടൂര്‍ ഗോപാലകൃഷ്ണനാണ് ശങ്കര്‍ മോഹന്‍ രാജി സമര്‍പ്പിച്ചത്. രാജിക്ക് വിവാദവുമായി ബന്ധമില്ലെന്നാണ് ശങ്കര്‍ മോഹനന്റെ വിശദീകരണം.

ഇന്‍സ്റ്റിറ്റ്യൂട്ടിലെ വിദ്യാര്‍ഥികള്‍ ഉന്നയിച്ച ആരോപണങ്ങളില്‍ സര്‍ക്കാര്‍ അന്വേഷണം നടത്തിയിരുന്നു. ഉന്നതതല സമിതി അന്വേഷണറിപ്പോര്‍ട്ട് സമര്‍പ്പിച്ചതിനുശേഷമാണ് ശങ്കര്‍ മോഹനന്റെ രാജി.