കോഴിക്കോട്: കരിപ്പൂര്‍ വിമാനത്താവളത്തില്‍ വന്‍ സ്വര്‍ണവേട്ട.  കരിപ്പൂര്‍ വിമാനത്താവളം വഴി   ശരീരത്തിനുള്ളില്‍  ഒളിപ്പിച്ചു കടത്തുവാന്‍ ശ്രമിച്ച ഏകദേശം  ഒന്നേകാല്‍ കോടി രൂപ വില മതിക്കുന്ന രണ്ടു കിലോഗ്രാമോളം സ്വര്‍ണം രണ്ടു വ്യത്യസ്ത കേസുകളിലായി കോഴിക്കോട് കസ്റ്റംസ് പ്രവന്റ്റീവ് ഡിവിഷന്‍ ഉദ്യോഗസ്ഥര്‍ പിടികൂടി.

ജിദ്ദയില്‍നിന്നും എത്തിയ  വടക്കേക്കര സ്വദേശി സയ്യിദ് , കോഴിക്കോട്  മുക്കം സ്വദേശിയായ മുണ്ടയില്‍  ഇര്‍ഷാദ് എന്നിവരാണ് സ്വര്‍ണവുമായി പിടിയിലായത്. രണ്ട് പേരും സ്വര്‍ണ മിശ്രിതം ക്യാപ്‌സ്യൂള്‍ രൂപത്തില്‍ മലദ്വാരത്തില്‍ ഒളിപ്പിച്ചാണ് കടത്താന്‍ ശ്രമിച്ചത്.

വടക്കേക്കര സയ്യിദില്‍ ( 24) നിന്നും 1095 ഗ്രാം തൂക്കം വരുന്ന സ്വര്‍ണ്ണമിശ്രിതം അടങ്ങിയ നാലു ക്യാപ്‌സൂളുകളാണ് കണ്ടെത്തിയത്.

സ്പൈസ് ജെറ്റ് എയര്‍ലൈന്‍സ് വിമാനത്തില്‍ വന്ന കോഴിക്കോട്  മുക്കം സ്വദേശിയായ മുണ്ടയില്‍  ഇര്‍ഷാദില്‍ (25 ) നിന്നും 1165 ഗ്രാം തൂക്കം വരുന്ന സ്വര്‍ണ്ണമിശ്രിതമടങ്ങിയ നാലു ക്യാപ്‌സൂളുകളും കണ്ടെത്തി. ഈ സ്വര്‍ണ്ണമിശ്രിതത്തില്‍ നിന്നും സ്വര്‍ണം വേര്‍തിരിച്ചെടുത്ത ശേഷം യാത്രക്കാരുടെ അറസ്റ്റും മറ്റു തുടര്‍ നടപടികളും സ്വീകരിക്കുന്നതാണ്.

ഡെപ്യൂട്ടി കമ്മിഷണര്‍  ജെ ആനന്ദകുമാറിന്റെ നിര്‍ദേശപ്രകാരം സൂപ്രണ്ട് സലില്‍, മുഹമ്മദ് റജീബ് ഇന്‍സ്പെക്ടര്‍മാരായ  ഹരിസിംഗ് മീണ,  വിഷ്ണു അശോകന്‍ ഹെഡ് ഹവല്‍ദാര്‍മാരായ ഇ. വി. മോഹനന്‍, സന്തോഷ് കുമാര്‍ എന്നിവര്‍ ചേര്‍ന്നാണ് ഈ കള്ളക്കടത്തു പിടികൂടിയത്.