ബിഹാറി യുവതിക്ക് നീതി ഉറപ്പാക്ക്:ഉന്നാവ് ഇരയെ പിന്തുണച്ച് പോസ്റ്റിട്ട ബിനീഷ് കോടിയേരിക്ക് കമന്റുകളുടെ  പ്രവാഹം 


JULY 29, 2019, 9:36 PM IST

കൊച്ചി:സി പി എം സംസ്ഥാന സെക്രട്ടറി കോടിയേരി ബാലകൃഷ്‌ണന്റെ ഇളയ മകൻ ബിനീഷ് കോടിയേരിയുടെ ഫേസ്‌ബുക്ക് പോസ്റ്റിനെതിരെ കമന്റുകളുടെ പ്രവാഹം. ഉന്നാവ് ബലാത്സംഗക്കേസിൽ ഇരയായ പെൺകുട്ടിക്ക് വാഹനാപകടത്തില്‍ ഗുരുതരമായി പരിക്കേല്‍ക്കുകയും ഉറ്റബന്ധു മരിക്കുകയും ചെയ്‌ത സംഭവത്തില്‍ പ്രതികരിച്ചാണ് ബിനീഷ് കൊടിയേരിയുടെ കുറിപ്പ്.ചേട്ടൻ ബിനോയിക്കെതിരായ പീഡനക്കേസുമായി ബന്ധപ്പെടുത്തി ബിനീഷിന്റെ കുറിപ്പിനെതിരെ രൂക്ഷ പ്രതികരണങ്ങളുയർന്നു.

ഇതെന്ത് പ്രഹസനമാണ് ബിനീഷേ, ആദ്യം അച്‌ഛനില്ലാതെ ബിഹാറില്‍ വളരുന്ന കുഞ്ഞിന് നീതി നേടിക്കൊടുക്കൂ എന്നാണ് ഭൂരിഭാഗം കമന്റുകളിലേയും ആവശ്യം. ബി ജെ പി  എം എല്‍ എക്കെതിരെ ബലാത്സംഗക്കേസ് രജിസ്റ്റര്‍ ചെയ്‌തതിന് പിന്നാലെ പെണ്‍കുട്ടിക്കും കുടുംബത്തിനുമുണ്ടായ ആക്രമണങ്ങളുടെയും നീതിനിഷേധങ്ങളുടെയും പേരില്‍ ബി ജെ പിക്കെതിരെ വിമര്‍ശനം  ഉന്നയിക്കുന്നതാണ് ബിനീഷ് കൊടിയേരിയുടെ ഫേസ്ബുക്ക് പോസ്റ്റ്.ഉന്നാവ് പെൺകുട്ടിയോട്, ഇനി നീ ഒറ്റയ്ക്കല്ലെന്നു ബിനീഷ് പോസ്റ്റിൽ പറയുന്നു.

കുറിപ്പിന്റെ തലക്കെട്ടിലെ അക്ഷരത്തെറ്റിനെയും കമന്റുകളിൽ രൂക്ഷമായി പരിഹസിക്കുന്നുണ്ട്.

ബിനീഷ് കൊടിയേരിയുടെ ഫേസ്ബുക്ക് പോസ്റ്റിന്റെ പൂർണരൂപം:

"ഉന്നോവ പെൺകുട്ടി"

അവൾക്കിന്നൊരു പേരില്ല, അവളുടെ പേരു പറയാൻ പാടില്ല.ബലാൽസംഘക്കേസിൽ ഇരയാണവൾ. ലോകത്തിനു മുന്നിൽ പേരു നഷ്ടപ്പെട്ടവൾ. ഇന്ന് കുടുംബവും നഷ്ടപ്പെട്ടിരിക്കുന്നു. അവൾ ജീവനു വേണ്ടി പോരാടിക്കൊണ്ടിരിക്കുന്നു. മകളെ യോഗി ആദിത്യനാദിന്റെ വിശ്വസ്തനും എം എൽ എ യുമായ കുൽദീവ്‌ സെൻഗാർ നിരന്തരമായ പീഢനത്തിനു വിദേയമാക്കിയിരുന്നു എന്ന് പരാതി പറയാൻ പൊലിസ്‌ സ്റ്റേഷനിലെത്തിയ പിതാവിനെ അപഹസിച്ചു പരിഹസിച്ചു ദേഹോദ്രവം ഏൽപ്പിച്ചു അവർ ക്രൂരമായി രസിച്ചു. അവസാനം നീതിപാലകർ തന്നെ അദ്ദേഹത്തെ ലോക്കപ്പിൽ വച്ച്‌ കൊന്നു. ഈ ആഘാതത്തിലും പിന്മാറാത്ത അവളെ പലരീതിയിലും വേട്ടക്കാർ ദ്രോഹിച്ചു. കുടുംബക്കാരെ മുഴുവൻ ജയിലിലാകി. ഇന്നലെ അമ്മാവനെ ജയിലിൽ സന്ദർശിച്ച ശേഷം മടങിയ കുടുംബത്തെ മുഴുവനായി ട്രക്കിടിപ്പിച്ചു ഇല്ലാതാക്കാൻ ശ്രമിച്ചു. അവളുടെ അമ്മായിമാരും ബന്ധുവും മരണപ്പെട്ടു. അവളും അഡ്വ്വേക്കേറ്റ്‌ ഉൾപ്പെടെ ഗുരുതര പരുക്കുകളോടെ മരണത്തൊട്‌ മല്ലടിക്കുന്നു.അവളുടെ സംരക്ഷണത്തിനായി കോടതി നിർദ്ദേശിച്ച പൊലീസ്കാരേ ഒഴിവാക്കി ഈ കൃത്യം നടത്താനുണ്ടായ കാരണം പകൽ പോലെ സത്യമല്ലേ. ഇരയേ തന്നെ ഇല്ലാതാക്കാനുള്ള ബിജെപ്പിക്കാരുടെ രീതിക്ക്‌ മാറ്റമില്ലല്ലോ, അതല്ലേ കഴിഞ്ഞ ദിവസം ആർ എസ്സ്‌ എസ്സുകാരനും കുടുംബവും ഒരു പെൺകുട്ടിയെ കൊന്ന് ഉപ്പിലിട്ട്‌ വച്ചത്‌ നാം കണ്ടത്‌. ഉന്നോവ പെൺകുട്ടിയുടെ അപകടത്തിനു മണിക്കൂറുകൾക്ക്‌ മുന്നേ ബി ജേപി നേതാക്കമ്മാരുടെ അശ്ലീല വീഡിയോ പുറത്ത്‌ വിട്ട്‌ അത്‌ വൈറലാക്കുന്നത്‌ വഴി ഈ കൊലപാതകങ്ങൾ മറയ്ക്കുവാൻ ശ്രമിച്ചിരുന്നത്‌ ആരുടെ കണ്ണിൽ പൊടിയിടാനാണു.അച്ഛനേയും ബന്ധുക്കളെയും കൊന്നു .ഇനി 'അമ്മ മാത്രമാണു ഉള്ളത്‌. ആ ജീവന്റെ കാര്യത്തിൽ ഒരുറപ്പുമില്ല.. തലമുറകളൊളം ജീവൻ കൈമാറെണ്ട ഒരു കുടുംബത്തിനെ ഒന്നടങ്കം ഇല്ലാതാക്കാൻ ശ്രമിച്ച നിങ്ങൾ ഏത്‌ ദൈവത്തിനു വേണ്ടിയാണു സംസാരിക്കുന്നത്‌? ഏത്‌ അമ്പലത്തിലാണു വൃതമിരിക്കുന്നത്‌? കപടഭക്തരേ നിങ്ങൾ ഒരു ദൈവത്തോടും പ്രാർത്ഥിക്കില്ല ഒരിടത്തും വൃതവുമിരിക്കില്ല.. നിങ്ങൾക്ക്‌ പണമാണു ദൈവം, പണമാണു വൃതം.. പണത്തിനും അധികാരത്തിനു വേണ്ടി നിങ്ങൾ ദൈവത്തെ കൂട്ടു പിടിക്കുന്നു. മതത്തെ കൂട്ടുപിടിക്കുന്നു. ഉന്നോവയിലെ പെൺ കുട്ടിക്ക്‌ ആയുസ്സും ആരോഗ്യവും തിരിച്ചുകിട്ടി ഈ ക്രൂരതക്കെതിരേ പോരാടാൻ കരുത്ത്‌ ഉണ്ടാകട്ടേ എന്ന് നമുക്‌ പ്രത്യാശിക്കാം..പ്രിയപ്പെട്ട പെൺകുട്ടി ഇനി നി ഒറ്റക്കല്ല.. ഈ മഹാരാജ്യം നിന്നോട്‌ ഒപ്പമുണ്ട്.

Other News