സ്വര്‍ണക്കടത്ത് കേസ് പ്രതി സ്വപ്‌ന സുരേഷ് ഇന്ന് ഇ.ഡി.ക്ക് മുന്നില്‍ ഹാജരാകും


JUNE 22, 2022, 9:10 AM IST

കൊച്ചി:  സ്വര്‍ണക്കടത്ത് കേസ് പ്രതി സ്വപ്‌ന സുരേഷ് ഇന്ന് ഇ.ഡി.ക്ക് മുന്നില്‍ ഹാജരാകും. ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ട് സ്വപ്‌നക്ക് ഇ.ഡി. നോട്ടീസ് നല്‍കിയിരുന്നു. സ്വര്‍ണക്കടത്ത് കേസിലെ പുതിയ വെളിപ്പെടുത്തലുകളുടെ പശ്ചാത്തലത്തില്‍ ആണ് സ്വപ്‌ന സുരേഷിനെ എന്‍ഫോഴ്സ്മെന്റ് ഡയറക്ടറേറ്റ് ചോദ്യം ചെയ്യുന്നത്.

മുഖ്യമന്ത്രിക്കും കുടുംബത്തിനും ഉള്‍പ്പെടെ ഉള്ള പുതിയ ആരോപണങ്ങള്‍ക്ക് പിന്നാലെ ആണ് സ്വപ്‌ന സുരേഷിനെ എന്‍ഫോഴ്സ്മെന്റ് ഡയറക്ടറേറ്റ് ചോദ്യം ചെയ്യുന്നത്. കൊച്ചിയിലെ ഇ ഡി ഓഫീസില്‍ ഹാജരാകണമെന്നാണ് നിര്‍ദ്ദേശം. ചോദ്യം ചെയ്യലിന് ഹാജരാകുമെന്ന് സ്വപ്‌ന അറിയിച്ചിട്ടുണ്ട്.

164 പ്രകാരം കോടതിയില്‍ സ്വപ്‌ന നല്‍കിയ രഹസ്യമൊഴിയിലെ വിവരങ്ങള്‍ ഇ ഡി ക്ക് ലഭിച്ചു. മൊഴി പരിശോധിച്ച ഇ.ഡി കേന്ദ്ര ഡയറക്ടറേറ്റും അന്വേഷണവുമായി മുന്നോട്ടു പോകാന്‍ കൊച്ചി യൂണിറ്റിന് നിര്‍ദ്ദേശം നല്‍കിയിട്ടുണ്ട്. സ്വര്‍ണക്കടത്ത് കേസില്‍ ഇ.ഡി. യുടെ കസ്റ്റഡിയില്‍ ആയിരിക്കെ സ്വപ്‌ന നല്‍കിയ മൊഴിയില്‍ ഉള്ളതിനേക്കാള്‍ കൂടുതല്‍ വിവരങ്ങള്‍ സ്വപ്‌നയുടെ പുതിയ മൊഴിയില്‍ ഉണ്ടെന്നാണ് സൂചന. ഇതു സംബന്ധിച്ചും ഇ.ഡി. വ്യക്തത വരുത്തും.

സ്വര്‍ണക്കടത്ത് കേസില്‍ സ്വപ്‌നയും സരിത്തും കസ്റ്റംസിനു നല്‍കിയ രഹസ്യമൊഴി ഇ ഡി ക്ക് കൈമാറാന്‍ കോടതി നിര്‍ദ്ദേശിച്ചിരുന്നു. ഈ മൊഴി കൂടി ലഭിച്ചാല്‍ സ്വപ്‌നയുടെ പുതിയ മൊഴിയുമായി ആയി ഇവ താരതമ്യപ്പെടുത്തിയാവും അന്വേഷണസംഘത്തിന്റെ തുടര്‍ നീക്കങ്ങള്‍.

Other News