കോഴിക്കോട്: കോടതി വിധിയുടെ പശ്ചാതലത്തില്‍ പാര്‍ലമെന്റ് അംഗത്വം റദ്ദാക്കിയ നടപടിയില്‍ രാഹുല്‍ ഗാന്ധിക്ക് പിന്തുണയുമായി ചലച്ചിത്ര താരം ഹരീഷ് പേരടി. സത്യത്തിന്റെ ചൂടേറ്റ് വളര്‍ന്ന കുട്ടി മുഖമുയര്‍ത്തി അനീതികള്‍ക്കെതിരെ വിരല്‍ ചൂണ്ടിയപ്പോള്‍ പലരും ഇന്ന് അയാളെ ഭയപ്പെടുന്നുവെന്ന് ഹരീഷ് പേരടി ഫേസ്ബുക്കില്‍ കുറിച്ചു. 

കുട്ടിയായ കണ്ണടക്കാരന്‍ രാഹുല്‍ ഗാന്ധി രാജീവ് ഗാന്ധിയുടെ നെഞ്ചില്‍ മുഖമമര്‍ത്തി നില്‍ക്കുന്ന ചിത്രം പങ്കുവെച്ചാണ് ഹരീഷ് പേരടി ഫേസ്ബുക്കില്‍ തന്റെ കുറിപ്പ് പോസ്റ്റ് ചെയ്തിരിക്കുന്നത്. രാഹുലിന്റെ സത്യാന്വേഷണ പരീക്ഷണങ്ങള്‍ക്കൊപ്പമാണ് താനെന്നും ഹരീഷ് പേരടി പറഞ്ഞു. 

രാജ്യത്തിനു വേണ്ടി രക്തസാക്ഷിത്വം വരിച്ച സ്വന്തം അമ്മയുടെ ചിതയിലേക്ക് നോക്കിനില്‍ക്കുന്ന സ്വന്തം അച്ഛന്റെ നെഞ്ചില്‍ അഭയം പ്രാപിച്ച ആ കുട്ടിക്ക് അന്നറിയില്ലായിരുന്നു  ആ അച്ഛനും രാജ്യത്തിനുവേണ്ടി രക്തസാക്ഷിയാവുമെന്ന്. സത്യത്തിന്റെ ചൂടേറ്റ് വളര്‍ന്ന ആ കുട്ടി മുഖമുയര്‍ത്തി അനീതികള്‍ക്കെതിരെ വിരല്‍ ചൂണ്ടിയപ്പോള്‍, പലരും ഇന്ന് അയാളെ ഭയപ്പെടുന്നു, അയോഗ്യതകള്‍ കല്‍പ്പിക്കുന്നു. അതുകൊണ്ടുതന്നെ ജനാധിപത്യത്തില്‍ ഈ അയോഗ്യത വലിയ യോഗ്യതയായി മാറുന്നു. അയാളുടെ സത്യാന്വേഷണ പരീക്ഷണങ്ങള്‍ക്കൊപ്പം- ഹരീഷ് പേരടി കുറിച്ചു.