ഹൂസ്റ്റണ്‍: കോട്ടയം ക്ലബ് ഹൂസ്റ്റണ്‍ പ്രൊവിന്‍സിന്റെ ആഭിമുഖ്യത്തില്‍ മാഗിന്റെ ആസ്ഥാന കേന്ദ്രമായ സ്റ്റാഫോര്‍ഡിലെ കേരളാ ഹൗസില്‍ നടത്തിയ 'പൊന്നോണം 2023' ജനപങ്കാളിത്തം കൊണ്ടും വൈവിധ്യമാര്‍ന്ന പരിപാടികള്‍കൊണ്ടും ശ്രദ്ധേയമായി. ആഘോഷ പരിപാടികള്‍ മൂന്നു മണിക്കൂര്‍ നീണ്ടുനിന്നു.
ചെയര്‍മാന്‍ ജോസ് ജോണ്‍, പ്രസിഡണ്ട് സുഗു ഫിലിപ്പ്, മിസോറി സിറ്റി മേയര്‍ റോബിന്‍ ഇലക്കാട്ട്, സ്റ്റാഫോര്‍ഡ് സിറ്റി മേയര്‍ കെന്‍ മാത്യു, മാധ്യമ പ്രവര്‍ത്തകന്‍ ബ്ലെസ്സണ്‍ ശാമുവേല്‍, ഡബ്ല്യു എം സി ഗ്ലോബല്‍ വൈസ് പ്രസിഡണ്ട് എസ് കെ ചെറിയാന്‍, മാഗ് പ്രസിഡണ്ട് ജോജി ജോസഫ്, ഹൂസ്റ്റണിലെ സാമൂഹ്യ സാംസ്‌കാരിക വേദിയിലെ നിറസാന്നിധ്യമായ പൊന്നു പിള്ള, വൈസ് പ്രസിഡണ്ട് ജോമോന്‍ ഇടയാടി, സെക്രട്ടറി ഷിബു കെ മാണി എന്നിവര്‍ പ്രസംഗിച്ചു.
പുതുപ്പള്ളി എം എല്‍ എയായി തിരഞ്ഞെടുക്കപ്പെട്ട ചാണ്ടി ഉമ്മന് കോട്ടയം ക്ലബിന്റെ ആശംസകള്‍ നേര്‍ന്നു. മാവേലി തമ്പുരാനെ ചെണ്ടമേളത്തിന്റെ അകമ്പടിയോടു കൂടി എതിരേറ്റു. കേരളത്തിനെ മണ്ണില്‍ പോലും ഓണാഘോഷം കേവലം ചടങ്ങു മാത്രമായി ചുരുങ്ങിയ ഈ കാലത്ത് പ്രവാസികള്‍ അതിന്റെ തനിമ നിലനിര്‍ത്തിക്കൊണ്ടു വിദേശ രാജ്യങ്ങളിലും പ്രത്യേകിച്ച് അമേരിക്കയിലും ഓണം ആഘോഷിക്കുന്നത് അഭിമാനമുളവാക്കുന്നതാണെന്ന് മാവേലി തമ്പുരാന്‍ ഓണ സന്ദേശത്തില്‍ പറഞ്ഞു.
മാവേലിയും വിശിഷ്ട വ്യക്തികളും ക്ലബ് ഭാരവാഹികളും ചേര്‍ന്ന് നിലവിളക്കു കൊളുത്തി പരിപാടികള്‍ക്ക് തുടക്കം കുറിച്ചു. ജൊഹാന, അജി, ആന്‍ ഫിലിപ്പ് എന്നിവരുടെ സോളോ ഡാന്‍സും ഹര്‍ഷ ഷിബു, സാറാ തോമസ്, ജെസ്മിയോ, ആഞ്ജലീന, അല്‍ഫിന്‍ ബിജോയ്, ആഞ്ജലീന ബിജോയ്, ജെര്‍മിയ ജയേഷ്, ജെസ്മിയ ജയേഷ് തുടങ്ങിയവരുടെ സംഘനൃത്തവും ഓണാഘോഷത്തിന് മാറ്റു കൂട്ടി.
മീരാ ബിജു, ട്രേസ ജെയിംസ്, ആന്‍ഡ്രൂസ് ജേക്കബ്, ജയകുമാര്‍ നടക്കല്‍, സുകു ഫിലിപ്പ്, മധു ചേരിക്കല്‍, ജോജി ജോസഫ് തുടങ്ങിവരുടെ ശ്രുതി മധുരമായ ഗാനങ്ങള്‍ ആഘോഷങ്ങള്‍ക്ക് ഇരട്ടി മധുരം നല്‍കി. ആന്‍ഡ്രൂസ് ജേക്കബ്, മോന്‍സി കുര്യന്‍ എന്നിവരവതരിപ്പിച്ച നര്‍മ്മരസം തുളുമ്പുന്ന സ്‌കിറ്റ് ഏവരിലും ചിരി പടര്‍ത്തി. ഡോ. റെയ്‌ന റോക്ക് എം സിയായി പരിപാടികള്‍ നിയന്ത്രിച്ചു. പ്രോഗ്രാം കോര്‍ഡിനേറ്റര്‍മാരായി ബിജു ശിവന്‍, മധു ചേരിയ്ക്കല്‍, ആന്‍ഡ്രൂസ് ജേക്കബ് എന്നിവര്‍ പ്രവര്‍ത്തിച്ചു.
വിഭവസമൃദ്ധമായ ഓണ സദ്യയോട് കൂടി ഓണാഘോഷ പരിപാടികള്‍ക്ക് സമാപ്തി കുറിച്ചു.
- ജീമോന്‍ റാന്നി
Facebook
LinkedIn
Twitter
Print
WhatsApp
