ഡാളസ്: കേരള എക്യൂമെനിക്കല്‍ ക്രിസ്ത്യന്‍ ഫെലോഷിപ്പിന്റെ നേതൃത്വത്തില്‍ ഡാളസില്‍ അഖില ലോക പ്രാര്‍ഥനാ ദിനം മാര്‍ച്ച് 11 ശനിയാഴ്ച രാവിലെ 9 മണി മുതല്‍ 12.30 വരെ മെസ്‌ക്വിറ്റ് സെന്റ്. പോള്‍സ് മാര്‍ത്തോമ്മ ദേവാലയത്തില്‍ വെച്ച് നടത്തപ്പെട്ടു.

ഡാളസിലെ വിവിധ ക്രൈസ്തവ വിഭാഗങ്ങളിലെ ഇടവകളില്‍ നിന്ന് അനേക സ്ത്രീകളും വൈദീകരും സമ്മേളനത്തില്‍ പങ്കെടുത്തത് കോവിഡ് മഹാമാരിക്ക് ശേഷം മാസ്‌ക് തുടങ്ങിയ നിയന്ത്രണങ്ങള്‍ ഇല്ലാത്ത ഒരു  ഒത്തുകൂടലിന്റെ നിമിഷങ്ങളായി. അതോടൊപ്പം  പട്ടുസാരിയും നീല ബ്ലൗസും അണിഞ്ഞ് തങ്ങളുടെ പ്രായത്തെപ്പോലും വകവെയ്ക്കാതെ മുന്നൂറില്‍ പരം സ്ത്രീകള്‍ സമ്മേളനത്തില്‍ പങ്കെടുത്തത് വേറിട്ട അനുഭവമായി.  

സിസ്റ്റര്‍ മരിയ തെങ്ങുംതോട്ടത്തില്‍ (സെന്റ്. തോമസ് സീറോ മലബാര്‍ കാതലിക്ക് ചര്‍ച്ച്, ഗാര്‍ലന്റ് ) മുഖ്യ സന്ദേശം  നല്‍കി. ഞാന്‍ നിങ്ങളുടെ വിശ്വാസത്തെക്കുറിച്ച് കേട്ടിരിക്കുന്നു (എഫെസ്യ 1:15 - 19) എന്ന ബൈബിള്‍ വാക്യത്തെ അടിസ്ഥാനമാക്കി ആയിരുന്നു മുഖ്യ ചിന്താവിഷയം. ജോണ്‍ തോമസ് നേതൃത്വം നല്‍കുന്ന   കേരള എക്യൂമെനിക്കല്‍ ക്രിസ്ത്യന്‍ ഫെലോഷിപ്പ് ഗായകസംഘം ഗാന ശുശ്രുഷക്ക് നേതൃത്വം നല്‍കി. 

ലോകത്തിലെ 170ല്‍പരം രാജ്യങ്ങളില്‍ ക്രിസ്തിയ വിശ്വാസികളായ വനിതകളുടെ നേതൃത്വത്തില്‍ ഓരോ വര്‍ഷവും ഒരു പ്രത്യേക രാജ്യം തെരഞ്ഞെടുത്ത് ആ രാജ്യത്തിലെ കഷ്ടത അനുഭവിക്കുന്ന ജനവിഭാഗത്തിനായി പ്രാര്‍ഥിക്കുവാനായി മാര്‍ച്ച് മാസത്തിലെ ഒരു ശനിയാഴ്ച  പ്രാര്‍ഥനാദിനമായി ആചരിച്ചുവരുന്നതാണ് വേള്‍ഡ് ഡേ പ്രയര്‍.

തായ്വാനിലെ കഷ്ടത അനുഭവിക്കുന്ന ജനവിഭാഗത്തിനായിട്ടാണ് പ്രത്യേകം പ്രാര്‍ഥനാ ദിനമായി ഈ വര്‍ഷം വേര്‍തിരിച്ചിരിക്കുന്നത്. പ്ലേനോ സെന്റ്. പോള്‍സ്. മലങ്കര ഓര്‍ത്തഡോക്‌സ് ഇടവകയിലെ  മര്‍ത്തമറിയം വനിതാ സമാജം ആണ് ഡാളസിലെ വേള്‍ഡ് ഡേ പ്രയറിന് ഈ വര്‍ഷം നേതൃത്വം നല്‍കിയത്.

ശ്രീമതി സാറാമ്മ രാജു (സാലി കൊച്ചമ്മ) ആയിരുന്നു പ്രോഗ്രാം ജനറല്‍ കണ്‍വീനര്‍. ശ്രീമതി മേരി മാത്യു എം. സി യായി പ്രവര്‍ത്തിച്ചു. റവ. ഷൈജു സി. ജോയ് (പ്രസിഡന്റ് ), വെരി. റവ. രാജൂ ഡാനിയേല്‍ കോര്‍ എപ്പിസ്‌കോപ്പ (വൈസ്. പ്രസിഡന്റ്), ഷാജി എസ്. രാമപുരം (ജനറല്‍ സെക്രട്ടറി) എന്നിവര്‍ ഡാളസിലെ കേരള എക്യൂമെനിക്കല്‍ ക്രിസ്ത്യന്‍ ഫെലോഷിപ്പിന്റെ ഈ വര്‍ഷത്തെ പ്രവര്‍ത്തനങ്ങള്‍ക്ക് നേതൃത്വം നല്‍കുന്നു.

(ഷാജി രാമപുരം)