ഹൂസ്റ്റണ്‍ : ജൂണ്‍ 9, 10,11 തീയതികളില്‍ ന്യൂയോര്‍ക്കില്‍ വച്ച് നടക്കുന്ന മൂന്നാം ലോകകേരളസഭയുടെ അമേരിക്കന്‍ മേഖലാ സമ്മേളനത്തില്‍ പങ്കെടുത്ത് പ്രവാസി സമൂഹം അഭിമുഖീകരിക്കുന്ന വിവിധ പ്രശ്നങ്ങള് ശക്തമായി ഉന്നയിക്കുമെന്ന് നിലവില്‍ ലോക കേരളാ സഭാംഗവും ഓവര്‍സീസ് ഇന്ത്യന്‍ കള്‍ച്ചറല്‍ കോണ്‍ഗ്രസ് (ഒഐസിസി യുഎസ്എ) ചെയര്‍മാനുമായ ജെയിംസ് കൂടല്‍ പറഞ്ഞു.
പ്രവാസികളുടെ പ്രശ്നങ്ങള് ശക്തമായി ഉന്നയിക്കുന്നതിനു അമേരിക്കയില്‍ ലഭിക്കുന്ന ഉചിതമായ വേദി എന്ന നിലയില്‍ പ്രവാസി വിഷയങ്ങള്‍ അവതരിപ്പിയ്ക്കുവാന്‍ അവസരം ലഭിക്കുമെന്നുള്ള ഉറച്ച പ്രതീക്ഷയിലാണ് ജെയിംസ് സമ്മേളനത്തില്‍ പങ്കെടുക്കുന്നത്. തിരുവനന്തപുരത്തു വച്ച് നടത്തിയ ലോക കേരളാസഭ സമ്മേളനത്തിലും ജെയിംസ് പങ്കെടുത്ത് നിര്‍ദ്ദേശങ്ങള്‍ സമര്‍പ്പിച്ചിരുന്നു.
കേരളത്തില്‍ നിക്ഷേപം നടത്തുവാന്‍ ഒട്ടും തന്നെ പര്യാപ്തമല്ല എന്ന് ഒരു ഇടതുപക്ഷ എംഎല്‍എ പോലും പറയുന്ന ഒരു സാഹചര്യം നിലനില്‍ക്കുമ്പോള്‍ പ്രവാസികളുടെ നിക്ഷേപം കേരളത്തില്‍ എങ്ങനെ ഉപയോഗപ്പെടുത്തണം, പ്രവാസികളുടെ നാട്ടിലെ സ്വത്തിന്റെ സംരക്ഷണം, അമേരിക്കയിലും കാനഡയിലും പഠിക്കുവാന്‍ എത്തുന്ന വിദ്യാര്‍ത്ഥികള്‍ നേരിടുന്ന പ്രശ്നങ്ങള്, കേരളത്തിലേക്ക് നേരിട്ടുള്ള വിമാന സര്‍വീസുകള്‍, പ്രവാസ ജീവിതത്തിനു ശേഷം കേരളത്തില്‍ സ്ഥിരതാമസത്തിനായി ആഗ്രഹിക്കുന്ന പ്രവാസികള്‍ നേരിടുന്ന പ്രശ്നങ്ങള്, തുടങ്ങി നിരവധി വിഷയങ്ങള്‍ സംബന്ധിച്ച് നിര്‍ദ്ദേശങ്ങള്‍ സമര്‍പ്പിക്കുന്നതായിരിക്കുമെന്നും മുഖ്യമന്ത്രിയുമായും മറ്റു ജനപ്രതിനിധികളുമായും നേരിട്ട് കണ്ട് ചര്‍ച്ചകള്‍ നടത്തുന്നതായിരിക്കുമെന്നും ജെയിംസ് കൂടല്‍ അറിയിച്ചു.
ജീമോന്‍ റാന്നി
Facebook
LinkedIn
Twitter
Print
WhatsApp
