കൊളംബിയ: അമേരിക്കയുടെ യുദ്ധവിമാനം അപ്രത്യക്ഷമായി. അടിയന്തിര സാഹചര്യത്തില്‍ വിമാനത്തില്‍ നിന്ന് പൈലറ്റ് ഇജക്ട് ചെയ്ത് പുറത്തുവന്നതിന് പിന്നാലെയാണ് വിമാനം കാണാതായത്. സൗത്ത് കരോലിനയിലൂടെ പറക്കവെയാണ് സംഭവം. വിമാനം ഇജക്ട് ചെയ്ത ശേഷം പൈലറ്റ് സുരക്ഷിതമായി താഴെയെത്തിയെത്തിയെങ്കിലും ഇടിച്ചിറങ്ങേണ്ടിയിരുന്ന വിമാനം അപ്രത്യക്ഷമാവുകയായിരുന്നു. 

അമേരിക്കന്‍ നാവികസേനയുടെ ഭാഗമായ എഫ് 35 ലൈറ്ററിംഗ് രണ്ട് ഫൈറ്റര്‍ ജെറ്റാണ് സൗത്ത് കരോലിനയിലെ നോര്‍ത്ത് ചാള്‍സ്റ്റണിന് സമീപത്ത് കാണാതായത്. സേനയിലെ അതീവ പ്രാധാന്യമേറിയ എഫ് 35 യുദ്ധവിമാനം കണ്ടെത്താന്‍ യു എസ് സൈന്യം പൊതുജനങ്ങളുടെ സഹായം തേടി.

യുദ്ധവിമാനം പറത്തുന്നതിനിടെ എന്തിനാണ് പൈലറ്റ് ഇജക്ട് ചെയ്ത് പാരച്യൂട്ടില്‍ രക്ഷപ്പെട്ടിറങ്ങിയത് എന്ന് വ്യക്തമായിട്ടില്ല. പൈലറ്റിന്റെ പേര് സേന വെളിപ്പെടുത്തിയിട്ടില്ല. 

അപകടത്തിന് പിന്നാലെ അമേരിക്കന്‍ സൈന്യം തിരച്ചില്‍ ശക്തമാക്കിയിട്ടുണ്ട്. ചാള്‍സ്റ്റണ്‍ നഗരത്തിന് വടക്കുള്ള രണ്ട് തടാകങ്ങള്‍ കേന്ദ്രീകരിച്ചാണ് തിരച്ചില്‍ നടത്തുന്നത്. യുദ്ധവിമാനം തടാകത്തില്‍ മുങ്ങിപ്പോയോ എന്ന കാര്യം ഉള്‍പ്പെടെ പരിശോധിക്കുന്നുണ്ട്. 100 മില്യണ്‍ ഡോളര്‍ വിലമതിക്കുന്ന വിമാനത്തിന് ഏകദേശം 1,200 മൈല്‍ റേഞ്ച് ഉണ്ട്. എന്നാല്‍ വിമാനത്തില്‍ എത്ര ഇന്ധനം ഉണ്ടായിരുന്നുവെന്ന് വ്യക്തമല്ല.