ലോകത്ത് കോവിഡ് മരണങ്ങള്‍ ഇരുപത്തിയഞ്ച് ലക്ഷം കടന്നു


FEBRUARY 25, 2021, 9:50 AM IST

ന്യൂയോര്‍ക്ക്: ലോകത്ത് കോവിഡ് ബാധിതരുടെ എണ്ണത്തിനൊപ്പം  മരിച്ചവരുടെ എണ്ണവും കുതിച്ചുകയറുകയാണ്.   വേള്‍ഡോമീറ്ററിന്റെ കണക്കുപ്രകാരം രോഗബാധിതരുടെ എണ്ണം പതിനൊന്ന് കോടി മുപ്പത് ലക്ഷം പിന്നിട്ടു. മരണ സംഖ്യ ഇരുപത്തിയഞ്ച് ലക്ഷം കടന്നു. പതിനായിരത്തിലധികം മരണങ്ങളാണ് കഴിഞ്ഞദിവസം റിപ്പോര്‍ട്ട് ചെയ്തത്.

 രോഗമുക്തി നേടിയവരുടെ എണ്ണം എട്ട് കോടി എണ്‍പത്തിയാറ് ലക്ഷമായി ഉയര്‍ന്നു.ഏറ്റവും കൂടുതല്‍ പേര്‍ കോവിഡ് ബാധിച്ച് മരിച്ചത് അമേരിക്കയിലാണ്. രാജ്യത്ത് 5.17 ലക്ഷം മരണങ്ങളാണ് റിപ്പോര്‍ട്ട് ചെയ്തത്. യുഎസിലാണ് ഏറ്റവും കൂടുതല്‍ രോഗബാധിതരും ഉള്ളത്. രണ്ട് കോടി എണ്‍പത്തിയൊമ്പത് ലക്ഷം പേര്‍ക്കാണ് വൈറസ് ബാധ സ്ഥിരീകരിച്ചത്.

ഇന്ത്യയും ബ്രസീലുമാണ് രോഗികളുടെ എണ്ണത്തില്‍ രണ്ടും, മൂന്നും സ്ഥാനങ്ങളിലുള്ളത്. ഇന്ത്യയില്‍ ഒരു കോടി പത്ത് ലക്ഷം രോഗബാധിതരാണ് ഉള്ളത്. 16,000ത്തിലധികം കേസുകളാണ് കഴിഞ്ഞദിവസം റിപ്പോര്‍ട്ട് ചെയ്തത്. 1.56 ലക്ഷം പേര്‍ മരിച്ചു. ബ്രസീലില്‍ 1.03 കോടി പേര്‍ക്കാണ് രോഗം സ്ഥിരീകരിച്ചത്. 2.50 ലക്ഷം പേര്‍ മരിച്ചു.

Other News