തായ് വാന്‌ ചുറ്റുമുള്ള ചൈനയുടെ സൈനികാഭ്യാസം ഉടന്‍ നിര്‍ത്തണമെന്ന് ജപ്പാന്‍


AUGUST 5, 2022, 10:09 AM IST

ടോക്കിയോ- തായ് വാന്‌ ചുറ്റുമുള്ള സൈനികാഭ്യാസം ഉടന്‍ നിര്‍ത്താന്‍ ജപ്പാനീസ് പ്രധാനമന്ത്രി ഫ്യൂമിയോ കിഷിദ ചൈനയോട് ആവശ്യപ്പെട്ടു.  തങ്ങളുടെ എക്സ്‌ക്ലൂസീവ് ഇക്കണോമിക് സോണില്‍ അഞ്ച് ചൈനീസ് മിസൈലുകള്‍ പതിച്ചതായി ജപ്പാന്റെ പ്രതിരോധ മന്ത്രാലയം പറഞ്ഞു മണിക്കൂറുകള്‍ക്ക് ശേഷമാണ് ചൈനയ്ക്കുള്ള മുന്നറിയിപ്പ്.

'ചൈനയുടെ ഭാഗത്തുനിന്നുള്ള നടപടികള്‍ മേഖലയുടെയും അന്താരാഷ്ട്ര സമൂഹത്തിന്റെയും സമാധാനത്തിനും സ്ഥിരതയ്ക്കും ഗുരുതരമായ പ്രത്യാഘാതങ്ങള്‍ ഉണ്ടാക്കും,'  കിഷിദ വെള്ളിയാഴ്ച പറഞ്ഞു.

ചൈനയുടെ അഭ്യാസങ്ങളോട് പ്രതികരിക്കാന്‍ യുഎസും ജപ്പാനും ഒരുമിച്ച് പ്രവര്‍ത്തിക്കണമെന്ന് കിഷിദ പറഞ്ഞു.

അതേസമയം ചൈനയുടെ വിമര്‍ശനം അവഗണിച്ച് തായ്വാനുമായി യുഎസ് ഇടപഴകുന്നത് തുടരുമെന്ന് ജപ്പാന്‍ സന്ദര്‍ശനത്തിനിടെ യുഎസ് ഹൗസ് സ്പീക്കര്‍ നാന്‍സി പെലോസി വെള്ളിയാഴ്ച പറഞ്ഞു.

പ്രഭാതഭക്ഷണത്തിനായി കിഷിദയെ കണ്ടതിന് ശേഷം ടോക്കിയോയില്‍ നടത്തിയ വാര്‍ത്താ സമ്മേളനത്തില്‍ സംസാരിക്കുകയായിരുന്നു മിസ്സിസ് പെലോസി.

തായ്വാനെ ഒറ്റപ്പെടുത്താന്‍ ഞങ്ങള്‍ ബീജിംഗിനെ അനുവദിക്കില്ലെന്നും പെലോസി പറഞ്ഞു.ബീജിംഗ് 'ഒരുപക്ഷേ ഞങ്ങളുടെ സന്ദര്‍ശനം ഒരു ഒഴികഴിവായി ഉപയോഗിക്കുകയായിരുന്നുവെന്ന് തന്റെബുധനാഴ്ചത്തെ സന്ദര്‍ശനത്തിന് ശേഷം ചൈന നടത്തിയ സൈനികാഭ്യാസങ്ങളെ പരാമര്‍ശിച്ച് മിസ്സിസ് പെലോസി പറഞ്ഞു.

തായ്വാന്‍ സന്ദര്‍ശനത്തെക്കുറിച്ചുള്ള ചൈനയുടെ വിമര്‍ശനം പെലോസി തള്ളിക്കളഞ്ഞു. സമ്പന്നമായ ജനാധിപത്യം കെട്ടിപ്പടുക്കുന്നതിന് തായ്വാനെ അഭിനന്ദിക്കാനുള്ള മാര്‍ഗമായാണ് പെലോസി സന്ദര്‍ശനത്തെ വിശേഷിപ്പിച്ചത്.

''ലോകത്തിലെ ഏറ്റവും സ്വതന്ത്ര രാജ്യങ്ങളിലൊന്നാണ് തായ്വാന്‍,'' അവര്‍ പറഞ്ഞു. എന്നാല്‍ സ്വയംഭരണാധികാരമുള്ള ദ്വീപിനെ സ്വന്തം പ്രദേശമാണെന്നാണ് ബീജിംഗ് അവകാശപ്പെടുന്നത്.

നാവികസേനയുടെ കപ്പലുകളും യുദ്ധവിമാനങ്ങളും ഉപയോഗിച്ച് ജനാധിപത്യ സ്വയംഭരണ ദ്വീപിന്റെ പ്രതിരോധം പരീക്ഷിക്കുന്നതിനിടെ ചൈന വ്യാഴാഴ്ച റോക്കറ്റും ബാലിസ്റ്റിക്-മിസൈലും ഉപയോഗിച്ച് തായ്വാനെ വളഞ്ഞിരുന്നു.

ശക്തിപ്രകടനം വാണിജ്യ വ്യോമ, കടല്‍ റൂട്ടുകളെ തടസ്സപ്പെടുത്തുകയും കൂടുതല്‍ സൈനിക വര്‍ദ്ധനവിനെക്കുറിച്ചുള്ള ആശങ്കകള്‍ ഉയര്‍ത്തുകയും ചെയ്തു. തായ്വാനും യുഎസും ചൈനയുടെ നീക്കങ്ങളെ അപലപിച്ചു, ''സാഹചര്യം നിരീക്ഷിക്കാന്‍'' യുഎസ്എസ് റൊണാള്‍ഡ് റീഗന്‍ വിമാനവാഹിനിക്കപ്പലും അതിനെ അനുഗമിക്കുന്ന കപ്പലുകളും മേഖലയില്‍ തുടരുമെന്ന് വൈറ്റ് ഹൗസ് പ്രഖ്യാപിച്ചു.

അഭ്യാസത്തിന്റെ ഭാഗമായി തായ്വാന് ചുറ്റും ചൈന നിരവധി മിസൈലുകള്‍ തൊടുത്തുവിട്ടു. ജപ്പാന്റെ എക്സ്‌ക്ലൂസീവ് ഇക്കണോമിക് സോണിനുള്ളില്‍ അഞ്ച് മിസൈലുകള്‍ പതിച്ചു, ഇതാദ്യമായാണ് ഇത് സംഭവിച്ചതെന്ന് ജപ്പാന്‍ പ്രതിരോധ മന്ത്രി നോബുവോ കിഷി വ്യാഴാഴ്ച വൈകി പറഞ്ഞു.

'ഇത് നമ്മുടെ ജനങ്ങളുടെ സുരക്ഷയെ ബാധിക്കുന്ന ഗുരുതരമായ പ്രശ്‌നമാണ്,' കിഷി പറഞ്ഞു. 'ഞാന്‍ ശക്തമായി പ്രതിഷേധിക്കുന്നു.'

സമുദ്രവിഭവങ്ങള്‍ പര്യവേക്ഷണം ചെയ്യുന്നതിനും ഉപയോഗിക്കുന്നതിനുമായി രാജ്യം പ്രത്യേക അവകാശങ്ങള്‍ അവകാശപ്പെടുന്ന ഒരു രാജ്യത്തിന്റെ പ്രാദേശിക ജലത്തിനപ്പുറമുള്ള പ്രദേശമാണ് ഒരു പ്രത്യേക സാമ്പത്തിക മേഖല.

Other News