ടൊറന്റോ: അനധികൃത പണമിടപാട് നടന്നത് റിപ്പോര്‍ട്ട് ചെയ്യാതിരുന്നതിന് കാനഡയിലെ ടൊറന്റോ -ഡോമിനിയന്‍ ബാങ്കിന് (ടിഡി ബാങ്ക്) കാനഡ സാമ്പത്തിക രഹസ്യാന്വേഷണ ഏജന്‍സി 9.2 മില്യണ്‍ ഡോളര്‍ പിഴ ചുമത്തി . കള്ളപ്പണം വെളുപ്പിക്കല്‍/തീവ്രവാദ പ്രവര്‍ത്തനങ്ങള്‍ക്ക് സാമ്പത്തിക സഹായം നല്‍കുന്ന അപകടസാധ്യതകള്‍ വിലയിരുത്തി രേഖപ്പെടുത്താതിരിക്കുക, സംശയാസ്പദമായ ഇടപാട് റിപ്പോര്‍ട്ടുകള്‍ സമര്‍പ്പിക്കാതിരിക്കുക എന്നീ കാരണങ്ങള്‍ ചൂണ്ടിക്കാട്ടിയാണ് പിഴ. കഴിഞ്ഞ ഡിസംബറില്‍ ആര്‍ബിസിക്കെതിരെ 7.5 ദശലക്ഷം ഡോളറും, സിഐബിസിക്കെതിരായി 1.3 ദശലക്ഷം ഡോളര്‍ പിഴയും ചുമത്തിയിരുന്നു.
കള്ളപ്പണം വെളുപ്പിക്കല്‍ വിരുദ്ധ കംപ്ലയന്‍സ് പ്രോഗ്രാമുമായി ബന്ധപ്പെട്ട് നടന്നുകൊണ്ടിരിക്കുന്ന യുഎസ് റെഗുലേറ്ററി അന്വേഷണവുമായി ബന്ധപ്പെട്ട് 450 മില്യണ്‍ യുഎസ് ഡോളര്‍ പ്രാരംഭ നീക്കിവച്ചതായി ബാങ്ക് വെളിപ്പെടുത്തിയതിന് ദിവസങ്ങള്‍ക്ക് ശേഷമാണ് ടിഡിക്കെതിരെ പിഴ ചുമത്തിയിരിക്കുന്നത്. മൂന്ന് യുഎസ് റെഗുലേറ്റര്‍മാരുമായും നീതിന്യായ വകുപ്പുമായും ചര്‍ച്ചകള്‍ നടന്നുകൊണ്ടിരിക്കുകയാണെന്നും അധിക പണമിടപാടുകള്‍ പ്രതീക്ഷിക്കുന്നതായും ബാങ്ക് അറിയിച്ചു.
സംശയാസ്പദമായ പ്രവര്‍ത്തനങ്ങളെ ഫലപ്രദമായി നിരീക്ഷിക്കാനും കണ്ടെത്താനും റിപ്പോര്‍ട്ടുചെയ്യാനും തങ്ങളുടെ പ്രോഗ്രാം പര്യാപ്തമല്ലെന്നും പോരായ്മകള്‍ പരിഹരിക്കുന്നതിനുള്ള പ്രവര്‍ത്തനങ്ങള്‍ നടക്കുന്നുണ്ടെന്നും ടിഡി ബാങ്ക് വ്യക്തമാക്കി
അനധികൃത ഇടപാട്: ടിഡി ബാങ്കിന് 9.2 മില്യണ്‍ ഡോളര്‍ പിഴ ചുമത്തി കാനഡ സാമ്പത്തിക രഹസ്യാന്വേഷണ ഏജന്‍സി
