ശ്രീനഗര്‍: : ഭരണത്തില്‍ തുടരാനായി പ്രധാനമന്ത്രി നരേന്ദ്ര മോഡി ഹിന്ദുകളെ ഭയപ്പെടുത്തുന്നു എന്ന് ജമ്മു കശ്മീര്‍ നാഷ്ണല്‍ കോണ്‍ഫറന്‍സ് പ്രസിഡന്റ് ഫാറൂഖ് അബ്ദുള്ള. 2014ല്‍ പ്രധാനമന്ത്രി ആയതിന് ശേഷം സാധാരണക്കാരായ ജനങ്ങളുടെ പ്രശ്‌നങ്ങളെ പറ്റി മോഡി സംസാരിച്ചിട്ടില്ലെന്നും അദ്ദേഹം കുറ്റപ്പെടുത്തി. ഇന്ത്യയെ ഭിന്നിപ്പിച്ചു കൊണ്ട് ഭരിക്കുകയാണ് ഇപ്പോള്‍ മോഡി ചെയ്യുന്നതെന്നും അദ്ദേഹം കുറ്റപ്പെടുത്തി.
കാന്‍യാര്‍ ലോക്‌സഭാ സ്ഥാനാര്‍ത്ഥി അഗ സയ്യിദ് റുഹുല്ല മെഹ്ദിയുടെ തിരഞ്ഞെടുപ്പ് റാലിക്കെത്തിയപ്പോഴായിരുന്നു ഫാറൂഖ് അബ്ദുള്ളയുടെ പ്രതികരണം. ഇപ്പോള്‍ ഹിന്ദുകളെ ഭയപ്പെടുത്തുകയാണ് മോഡി ചെയ്യുന്നത്. മുസ്ലീങ്ങള്‍ക്ക് പണം നല്‍കാനായി ഹിന്ദുകളുടെ താലിമാലകള്‍ വില്‍ക്കുന്ന സ്ഥിതി വരുമെന്നുമാണ് മോഡി പറയുന്നത്. ഇന്ത്യയിലെ സഹോദരിമാരുടെയും അമ്മമാരുടെയും താലിമാലകള്‍ വില്‍ക്കാനായി തങ്ങള്‍ അത്ര മോശപ്പെട്ടവരാണോ എന്ന് ഫാറൂഖ് അബ്ദുള്ള ചോദിച്ചു.
ഒരു പക്ഷേ പ്രതിപക്ഷമാണ് ഇനി ഭരണത്തില്‍ വരുന്നതെങ്കില്‍ ജനങ്ങള്‍ സ്വരൂപിച്ചു വെച്ചിരിക്കുന്ന സേവിംഗ്‌സ് എല്ലാം നികുതി ഇനത്തിലേക്ക് കൊടുക്കേണ്ടി വരും. രണ്ട് വീടുകള്‍ ഉള്ളവരാണെങ്കില്‍ അതില്‍ ഒരു വീട് മുസ്ലീങ്ങള്‍ക്ക് കൊടുക്കേണ്ടി വരുമെന്ന് പറഞ്ഞാണ് മോഡി പേടിപ്പിക്കുന്നത്. മുസ്ലീങ്ങള്‍ കൂട്ടികളെ ഉണ്ടാകുന്നു എന്നാണ് അദ്ദേഹത്തിന്റെ പരാതി. കുട്ടികള്‍ എന്നാല്‍ ദൈവത്തിന്റെ ദാനമാണ്. സ്വന്തം ഭാര്യക്ക് പോലും പ്രാധാന്യം നല്‍കാത്ത മോഡിക്കെങ്ങനെ ഇതിന്റെ മൂല്യം മനസ്സിലാകുമെന്നും അദ്ദേഹം ചോ?ദിച്ചു. മോഡി ഭരണത്തില്‍ വന്നതിന് ശേഷം ഗ്യാസിന്റെ വില വര്‍ധിപ്പിച്ചതിനെ പറ്റിയും അദ്ദേഹം കുറ്റപ്പെടുത്തി.
ഭരണത്തില്‍ തുടരാനായി പ്രധാനമന്ത്രി നരേന്ദ്ര മോഡി ഹിന്ദുകളെ ഭയപ്പെടുത്തുന്നു: ഫറൂഖ് അബ്ദുള്ള
