മലപ്പുറം: താനൂര് താമിര് ജിഫ്രി കസ്റ്റഡി മരണ കേസില് പ്രതികളായ നാല് പൊലീസ് ഉദ്യോഗസ്ഥരെ അറസ്റ്റ് ചെയ്ത് സിബിഐ സംഘം. പുലര്ച്ചെ വീട്ടിലെത്തിയാണ് പ്രതികളെ സിബിഐ സംഘം അറസ്റ്റ് ചെയ്തത്. ജിനേഷ്, ആല്ബിന് അഗസ്റ്റിന്, അഭിമന്യു, വിപിന് എന്നിവരാണ് അറസ്റ്റിലായത്. ജിനേഷിനെയും വിപിനെയും വള്ളിക്കുന്നിലുള്ള വീട്ടില് എത്തിയും, അഭിമന്യുവിനെ താനൂരില് വെച്ചും ആല്ബിനെ കൊല്ലത്തു നിന്നുമാണ് അറസ്റ്റ് ചെയ്തത്.
പ്രതികളായ നാലു പൊലീസുകാര്ക്കെതിരെയും കൊലക്കുറ്റമാണ് ചുമത്തിയിരുന്നത്. ഒന്നാം പ്രതി താനൂര് സ്റ്റേഷനിലെ എസ് സിപിഒ ജിനേഷ്, രണ്ടാം പ്രതി പരപ്പനങ്ങാടി സ്റ്റേഷനിലെ സിപിഒ ആല്ബിന് അഗസ്റ്റിന്, മൂന്നാം പ്രതി കല്പ്പകഞ്ചേരി സ്റ്റേഷനിലെ സിപിഒ അഭിമന്യു, നാലാം പ്രതി തിരൂരങ്ങാടി സ്റ്റേഷനിലെ സിപിഒ വിപിന് എന്നിവരായിരുന്നു ക്രൈം ബ്രാഞ്ചിന്റെ പ്രതിപട്ടികയിലുണ്ടായിരുന്നത്. കേസ് പിന്നീട് സിബിഐക്ക് കൈമാറുകയായിരുന്നു. തുടര്ന്നാണിപ്പോള് പ്രതി പട്ടികയിലുണ്ടായിരുന്ന നാലുപേരെയും അറസ്റ്റ് ചെയ്തത്.
2023 ഓഗസ്റ്റ് ഒന്നിനാണ് താനൂര് പൊലീസ് കസ്റ്റഡിയിലെടുത്ത താമിര് ജിഫ്രി മരിക്കുന്നത്. താമിര് ജിഫ്രിയുടെ ശരീരത്തില് മര്ദനമേറ്റ 21 പരിക്കുകള് ഉണ്ടായിരുന്നതായി ശരീരപരിശോധനാ റിപ്പോര്ട്ടില് ഉണ്ടായിരുന്നു. ഇതില് 19 പരിക്കുകള് മരണത്തിന് മുന്പും 2 മുറിവുകള് മരണത്തിന് ശേഷവും സംഭവിച്ചതെന്ന് റിപ്പോര്ട്ടില് പറയുന്നു.
ശ്വാസകോശത്തിലെ നീര്ക്കെട്ടാണ് മരണകാരണമെങ്കിലും ശരീരത്തിലേറ്റ അടിയാണ് ഈ നീര്ക്കെട്ടിന് പ്രധാന കാരണമെന്നാണ് ഫൊറന്സിക് സര്ജന്റെ മൊഴി. അമിത അളവിലുള്ള ലഹരി ഉപയോഗവും നീര്ക്കെട്ടിനു കാരണമായി. ആദ്യം ക്രൈംബ്രാഞ്ചാണ് കേസ് അന്വേഷിച്ചത്. സംഭവത്തില് എട്ട് പോലീസുകാരെ പ്രതിചേര്ത്ത് ക്രൈംബ്രാഞ്ച് കുറ്റപത്രം സമര്പ്പിച്ചിരുന്നു.
താമിര് ജിഫ്രിയുടെ കസ്റ്റഡി മരണത്തില് മനുഷ്യവകാശ കമ്മീഷന് റിപ്പോര്ട്ട് തേടിയിരുന്നു. താനൂര് കസ്റ്റഡി മരണക്കേസ് അട്ടിമറിക്കാന് ശ്രമമെന്ന് മരിച്ച താമിര് ജിഫ്രിയുടെ കുടുംബത്തിന്റെ ആരോപണം ഉയര്ന്നതോടെയാണ് കമ്മീഷന് ഇടപെട്ടത്. കസ്റ്റഡി മരണം അന്വേഷിച്ച ക്രൈം ബ്രാഞ്ച് പരപ്പനങ്ങാടി ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് ആദ്യഘട്ട പ്രതിപട്ടിക സമര്പ്പിച്ചിരുന്നു