രാജ്യത്തെ ഏറ്റവും വലിയ സ്വകാര്യ ബാങ്കായ എച്ച്ഡിഎഫ്സി ബാങ്കിന്റെ യുപിഐ സേവനങ്ങള്‍ മാസത്തില്‍ രണ്ടു ദിവസം ബാധിക്കപ്പെടുമെന്നു മുന്നറിയിപ്പ്. അത്യാവശ്യമായ സിസ്റ്റം മെയിന്റനന്‍സ് ആണ് സേവനങ്ങള്‍ തടസപ്പെടാനുള്ള കാരണം. ഇതു സംബന്ധിച്ച മുന്നറിയിപ്പ് ഇതിനകം ബാങ്ക് ഉപയോക്താക്കള്‍ക്ക് നല്‍കി കഴിഞ്ഞു. ഇതൊരു സാധാരണ നടപടി മാത്രമാണ്. എല്ലാ ബാങ്കുകളും അവരുടെ സിസ്റ്റം മെയിന്റനന്‍സ് കൃത്യസമയത്ത് നടത്തേണ്ടതുണ്ട്.
നവംബര്‍ 5, നവംബര്‍ 23 തീയതികളിലാകും ബാങ്കിന്റെ യൂണിഫൈഡ് പേയ്‌മെന്റ് ഇന്റര്‍ഫേസ് (യുപിഐ) സേവനം തടസപ്പെടുക. പക്ഷെ ഈ നടപടി ഉപയോക്താക്കളെ ബാധിക്കാനുള്ള സാധ്യത വളരെ കുറവാണ്. ഉപയോക്താക്കളുടെ സൗകര്യാര്‍ത്ഥം നവംബര്‍ 5 -ന് അര്‍ധരാത്രി 12 മുതല്‍ പുലര്‍ച്ചെ 02:00 വരെ രണ്ട് മണിക്കൂര്‍ ആണ് മെയിന്റനന്‍സ് നിശ്ചയിച്ചിരിക്കുന്നത്. നവംബര്‍ 23 -ന്, 12 എഎം മുതല്‍ 03:00 വരെ മൂന്നു മണിക്കൂറുമാകും സേവനങ്ങള്‍ തടസപ്പെടുക.
ഇടപാടുകളുടെ സുരക്ഷ വര്‍ധിപ്പിക്കുന്നതിനും, ഉപയോക്താക്കള്‍ക്കു കൂടുതല്‍ മെച്ചപ്പെട്ട സേവനങ്ങള്‍ നല്‍കുന്നതിനുമാണ് ഈ സിസ്റ്റം മെയിന്റനന്‍സ്. അതേസമയം നിങ്ങള്‍ ഒരു എച്ച്ഡിഎഫ്സി ബാങ്ക് ഉപഭോക്താവാണെങ്കില്‍, ഈ കാലയളവില്‍ യുപിഐ സേവനങ്ങള്‍ ലഭിക്കില്ലെന്ന് പ്രത്യേകം ഓര്‍ക്കുക. തഴെ പറയുന്ന സേവനങ്ങളാകും പ്രധാനമായി ബാധിക്കപ്പെടുക
എച്ച്ഡിഎഫ്സി ബാങ്ക് കറന്റ്, സേവിംഗ്‌സ് അക്കൗണ്ട്, റുപേ ക്രെഡിറ്റ് കാര്‍ഡ് എന്നിവയിലെ സാമ്പത്തികവും, സാമ്പത്തികേതരവുമായ യുപിഐ ഇടപാടുകള്‍.
എച്ച്ഡിഎഫ്സി ബാങ്ക് യുപിഐ ഹാന്‍ഡില്‍ ഉപയോഗിക്കുന്ന എല്ലാ ബാങ്ക് അക്കൗണ്ട് ഉടമകള്‍ക്കും HDFC MobileBanking ആപ്പ്, Gpay, WhatsApp Pay, Paytm, Shriram Finance, Mobikwik, Kredit.Pe എന്നിവയിലെ സാമ്പത്തികവും, സാമ്പത്തികേതരവുമായ യുപിഐ ഇടപാടുകള്‍.
എച്ച്ഡിഎഫ്സി ബാങ്ക് സേവനം ഉപയോഗിക്കുന്ന വ്യാപാരികളുടെ എല്ലാ യുപിഐ ഇടപാടുകളും ഈ സമയത്ത് ലഭിക്കില്ലെന്നു പ്രത്യേകം ശ്രദ്ധിക്കുക.
രാത്രികാലങ്ങളിലായി പേയ്‌മെന്റുകള്‍ ഷെഡ്യൂള്‍ ചെയ്യുന്ന വ്യക്തികളും, കമ്പനികളും ശ്രദ്ധിക്കുക
എച്ച്ഡിഎഫ്സി ബാങ്കിന്റെ യുപിഐ സേവനങ്ങള്‍ നവംബര്‍ 5 നും 23 നും തടസപ്പെടും
