ന്യൂഡല്ഹി: ആഗോള വിപണിയില് ക്രൂഡ് ഓയില് വില കുറഞ്ഞതിനെ തുടര്ന്ന് ഇന്ത്യയില് വിമാന ഇന്ധനമായ ഏവിയേഷന് ടര്ബൈന് ഫ്യുവലിന്റെ (എ ടി എഫ്) വില ലിറ്ററിന് ഏകദേശം അഞ്ച് രൂപ കുറച്ചു. ബുധനാഴ്ച മുതല് പ്രാബല്യത്തില് വന്ന തീരുമാനം ആഭ്യന്തര വിമാനക്കമ്പനികള്ക്ക് ചെലവില് ആശ്വാസമാകുമെന്നാണ് വിലയിരുത്തല്. ഇതോടെ വരും ദിവസങ്ങളില് വിമാനടിക്കറ്റ് നിരക്കിലും കുറവുണ്ടാകുമോയെന്ന പ്രതീക്ഷയിലാണ് യാത്രക്കാര്.
സര്ക്കാര് തീരുമാനം പ്രകാരം ഡല്ഹിയില് എ ടി എഫിന്റെ വില ലിറ്ററിന് ഏകദേശം 110 രൂപയായി കുറഞ്ഞു.
അമേരിക്കയും ഇറാനും തമ്മിലുള്ള സംഘര്ഷം ശമിച്ചതിനെ തുടര്ന്നും ഹോര്മുസ് കടലിടുക്കിലൂടെയുള്ള ചരക്കുകപ്പല് ഗതാഗതത്തിലെ അനിശ്ചിതത്വം കുറഞ്ഞതിനെ തുടര്ന്നുമാണ് അന്താരാഷ്ട്ര വിപണിയില് ക്രൂഡ് ഓയില് വില താഴ്ന്നത്. നിലവില് ബ്രെന്റ് ക്രൂഡ് ബാരലിന് ഏകദേശം 73 ഡോളറിലും വെസ്റ്റ് ടെക്സസ് ഇന്റര്മീഡിയറ്റ് (ഡബ്ല്യു ടി ഐ) ക്രൂഡ് 70 ഡോളറിനടുത്തുമാണ് വ്യാപാരം നടക്കുന്നത്.
ജൂലൈ ഒന്നുമുതല് പ്രാബല്യത്തില് വരുന്ന രണ്ടാഴ്ചക്കാലത്തേക്കുള്ള പെട്രോള്, ഡീസല്, എ ടി എഫ് എന്നിവയുടെ കയറ്റുമതി തീരുവ സര്ക്കാര് ചൊവ്വാഴ്ച പുനഃക്രമീകരിച്ചിരുന്നു. എന്നാല് ആഭ്യന്തര വിപണിയില് വില്ക്കുന്ന പെട്രോളിന്റെയും ഡീസലിന്റെയും എക്സൈസ് തീരുവയില് മാറ്റം വരുത്തിയിട്ടില്ല.
വിമാനക്കമ്പനികളുടെ പ്രവര്ത്തനച്ചെലവില് ഏറ്റവും വലിയ വിഹിതം എ ടി എഫ് ചെലവിനാണ്. അന്താരാഷ്ട്ര എണ്ണവില ഉയരുന്ന ഘട്ടങ്ങളില് മൊത്തം പ്രവര്ത്തനച്ചെലവിന്റെ 60 ശതമാനം വരെ ഇന്ധനച്ചെലവാകാറുണ്ട്.
അമേരിക്ക- ഇറാന് സംഘര്ഷത്തെ തുടര്ന്ന് എണ്ണവില ഉയര്ന്നപ്പോള് ലോകമെമ്പാടുമുള്ള പ്രധാന വിമാനക്കമ്പനികള് ഇന്ധന സര്ചാര്ജ് ഏര്പ്പെടുത്തിയിരുന്നു. ഇന്ത്യന് വിമാനക്കമ്പനികളും സമാന നടപടി സ്വീകരിച്ചതോടെ യാത്രക്കാര്ക്ക് അധിക സാമ്പത്തികഭാരം നേരിടേണ്ടിവന്നു.
ഇന്ധന വിലയിലെ ചാഞ്ചാട്ടം നേരിടാനും വിമാനനിരക്കില് പെട്ടെന്നുള്ള വര്ധന ഒഴിവാക്കാനും ആഭ്യന്തര വിമാനക്കമ്പനികള്ക്കായി 10,000 കോടി രൂപയുടെ പ്രത്യേക സഹായനിധിക്കും കേന്ദ്ര സര്ക്കാര് നേരത്തെ അംഗീകാരം നല്കിയിരുന്നു.
എ ടി എഫ് വില കുറഞ്ഞതോടെ വിമാനക്കമ്പനികള് ഇന്ധന സര്ചാര്ജ് പിന്വലിക്കുകയോ ടിക്കറ്റ് നിരക്കില് കുറവ് വരുത്തുകയോ ചെയ്യാന് സാധ്യതയുണ്ടെന്നാണ് വ്യോമയാന മേഖലയിലെ വിദഗ്ധര് വിലയിരുത്തുന്നത്. കുറഞ്ഞ ഇന്ധനച്ചെലവ് കമ്പനികളുടെ ലാഭക്ഷമത മെച്ചപ്പെടുത്തുന്നതിനൊപ്പം മത്സരാധിഷ്ഠിത നിരക്കുകള് നിലനിര്ത്താനും സഹായിക്കും.
അതേസമയം, യാത്രാ സീസണുകളിലെ ഉയര്ന്ന ഡിമാന്ഡ് ടിക്കറ്റ് നിരക്ക് ഉയര്ന്ന നിലയില് തുടരാന് കാരണമായേക്കാമെന്നും അതിനാല് മുന്കൂട്ടി ടിക്കറ്റ് ബുക്ക് ചെയ്യുന്നതാണ് യാത്രക്കാര്ക്ക് കൂടുതല് ലാഭകരമെന്നും വിദഗ്ധര് നിര്ദേശിക്കുന്നു.