ഹൈദരാബാദ്: തെലങ്കാനയിലെ കാമറെഡ്ഡി ജില്ലയില്‍ നൈറ്റിയും മുഖംമൂടിയും ധരിച്ചെത്തിയ അജ്ഞാതസംഘം സ്റ്റേറ്റ് ബാങ്ക് ഓഫ് ഇന്ത്യയുടെ (എസ് ബി ഐ) എ ടി എം തകര്‍ത്ത് പണം കവര്‍ന്നതായി റിപ്പോര്‍ട്ട്. ആംബുലന്‍സിലെത്തിയ സംഘമാണ് ഞായറാഴ്ച പുലര്‍ച്ചെ കവര്‍ച്ച നടത്തിയത്. സംഭവത്തിന്റെ ദൃശ്യങ്ങള്‍ സി സി ടി വിയില്‍ പതിഞ്ഞിട്ടുണ്ട്.
ഒക്ടോബര്‍ 11-ന് പുലര്‍ച്ചെ ഒന്നിനും ഒന്നരയ്ക്കുമിടയിലാണ് സംഭവം നടന്നതെന്നാണ് വിവരം. ആംബുലന്‍സില്‍ സ്ഥലത്തെത്തിയ സംഘം നൈറ്റിയും മുഖംമൂടിയും ധരിച്ചിരുന്നതായി സി സി ടി വി ദൃശ്യങ്ങളില്‍ കാണാം. കട്ടര്‍ ഉള്‍പ്പെടെയുള്ള ഉപകരണങ്ങള്‍ ഉപയോഗിച്ച് എ ടി എം തകര്‍ത്തശേഷം പണവുമായി സംഘം രക്ഷപ്പെടുകയായിരുന്നു.
എ ടി എം തകര്‍ത്ത നിലയില്‍ നാട്ടുകാര്‍ കണ്ടെത്തിയതോടെയാണ് കവര്‍ച്ച പുറത്തറിഞ്ഞത്. തുടര്‍ന്ന് നാട്ടുകാര്‍ വിവരം പൊലീസിനെ അറിയിച്ചു. സ്ഥലത്തെത്തിയ പൊലീസ് കേസെടുത്ത് അന്വേഷണം ആരംഭിച്ചു. തെളിവുകള്‍ ശേഖരിക്കുന്നതിനായി അന്വേഷണസംഘവും സ്ഥലത്തെത്തി.
പ്രതികളെ തിരിച്ചറിയുന്നതിനും കവര്‍ച്ചയ്ക്ക് മുമ്പും ശേഷവും ഇവര്‍ നടത്തിയ നീക്കങ്ങള്‍ കണ്ടെത്തുന്നതിനുമായി പൊലീസ് സി സി ടി വി ദൃശ്യങ്ങള്‍ വിശദമായി പരിശോധിച്ചുവരികയാണ്. എത്ര രൂപയാണ് നഷ്ടപ്പെട്ടതെന്ന് ഇതുവരെ സ്ഥിരീകരിച്ചിട്ടില്ല. എ ടി എമ്മിലെ പണത്തിന്റെ കണക്ക് പരിശോധിച്ച ശേഷമേ നഷ്ടത്തിന്റെ യഥാര്‍ഥ വ്യാപ്തി വ്യക്തമാകൂ.
കവര്‍ച്ചയ്ക്കായി ഉപയോഗിച്ച ആംബുലന്‍സ് യഥാര്‍ഥ വാഹനമാണോ അതോ പ്രതികള്‍ വാഹനം ആംബുലന്‍സിന്റെ രൂപത്തില്‍ ഉപയോഗിച്ചതാണോ എന്നും പൊലീസ് അന്വേഷിക്കുന്നുണ്ട്.
കരീംനഗറിന് സമീപമുള്ള ദുര്‍ഷെഡ്, തിമ്മാപൂര്‍ പ്രദേശങ്ങളിലെ രണ്ട് എസ് ബി ഐ എ ടി എമ്മുകള്‍ സമാനമായ രീതിയില്‍ ആക്രമിക്കപ്പെട്ട് ആഴ്ചകള്‍ക്കകമാണ് പുതിയ സംഭവം. സെപ്റ്റംബര്‍ 19-നായിരുന്നു നേരത്തെയുണ്ടായ കവര്‍ച്ചാശ്രമം. അന്ന് പ്രതികള്‍ ഗ്യാസ് കട്ടറുകള്‍ ഉപയോഗിക്കുകയും സ്ത്രീകളുടെ വസ്ത്രം ധരിച്ച് തിരിച്ചറിയല്‍ ഒഴിവാക്കാന്‍ ശ്രമിക്കുകയും ചെയ്തതായാണ് റിപ്പോര്‍ട്ട്. സി സി ടി വി നിരീക്ഷണം തടസ്സപ്പെടുത്താനും സംഘം ശ്രമിച്ചതായി വിവരമുണ്ട്.
തുടര്‍ച്ചയായ എ ടി എം കവര്‍ച്ചാശ്രമങ്ങളുടെ പശ്ചാത്തലത്തില്‍ പ്രതികളെ കണ്ടെത്താനുള്ള അന്വേഷണം പൊലീസ് ഊര്‍ജിതമാക്കിയിട്ടുണ്ട്.