ചെന്നൈ: സ്വന്തം മകളെ വിവാഹം കഴിച്ചയച്ച ജഗ്ഗി വാസുദേവ് എന്തിനാണ് മറ്റ് സ്ത്രീകളെ സന്യാസിമാരായി പ്രോത്സാഹിപ്പിക്കുന്നതെന്ന് മദ്രാസ് ഹൈക്കോടതി. കോയമ്പത്തൂരിലെ തമിഴ്നാട് അഗ്രികള്‍ച്ചറല്‍ യൂണിവേഴ്സിറ്റിയിലെ റിട്ടയേഡ് പ്രൊഫസറായ എസ് കാമരാജ് സമര്‍പ്പിച്ച ഹേബിയസ് കോര്‍പ്പസ് ഹര്‍ജിയില്‍ വാദം കേള്‍ക്കുന്നതിനിടെയാണ് ഹൈക്കോടതി ജഡ്ജിമാരായ എസ് എം സുബ്രഹ്മണ്യവും വി ശിവജ്ഞാനവും ഈ ചോദ്യം ഉന്നയിച്ചത്.
ഇഷാ ഫൗണ്ടേഷന്‍ സ്ഥാപകന്‍ സദ്ഗുരു എന്ന ജഗ്ഗി വാസുദേവ് തന്റെ മകളെ വിവാഹം കഴിച്ചയച്ച് അവളുടെ ഭാവി ഉറപ്പു വരുത്തി. എന്നാല്‍ മറ്റ് യുവതികളെ ലൗകികജീവിതം ത്യജിക്കാനും തന്റെ യോഗ കേന്ദ്രങ്ങളില്‍ സന്യാസിമാരെപ്പോലെ ജീവിക്കാനുമാണ് പ്രേരിപ്പിക്കുന്നതെന്നും കോടതി കുറ്റപ്പെടുത്തി.
തന്റെ 42, 39 വീതം വയസ്സുള്ള മികച്ച വിദ്യാഭ്യാസമുള്ള രണ്ട് പെണ്‍മക്കളെ ഇഷ യോഗാ സെന്ററില്‍ സ്ഥിരമായി താമസിക്കാന്‍ 'മസ്തിഷ്‌ക പ്രക്ഷാളനം' നടത്തിയെന്ന് ഹര്‍ജിക്കാരന്‍ ആരോപിച്ചിരുന്നു. എന്നാല്‍, തങ്ങള്‍ സ്വന്തം ഇഷ്ടപ്രകാരമാണ് കോയമ്പത്തൂരിലെ വെള്ളിനഗിരി താഴ്വരയിലുള്ള യോഗാ കേന്ദ്രത്തില്‍ താമസിക്കുന്നതെന്നും തങ്ങളെ ആരും ഇഷ്ടത്തിന് വിരുദ്ധമായി തടങ്കലില്‍ വെച്ചിട്ടില്ലെന്നും വ്യക്തമാക്കി രണ്ടുപേരും തിങ്കളാഴ്ച ഡിവിഷന്‍ ബെഞ്ചിന് മുമ്പാകെ ഹാജരായി. എന്നാല്‍ ഇരുവരുമായും കുറച്ചുനേരം സംസാരിച്ച കോടതി പ്രശ്‌നം കൂടുതല്‍ അന്വേഷിക്കാന്‍ തീരുമാനിക്കുകയായിരുന്നു.
ഇഷ ഫൗണ്ടേഷനെ പ്രതിനിധീകരിച്ച് അഭിഭാഷകന്‍ കെ രാജേന്ദ്ര കുമാര്‍ കേസിന്റെ വ്യാപ്തി വിപുലീകരിക്കാന്‍ കോടതിക്ക് കഴിയില്ലെന്ന് പറഞ്ഞപ്പോള്‍ ഭരണഘടനയുടെ 226-ാം അനുച്ഛേദം പ്രകാരമുള്ള റിട്ട് അധികാരപരിധി പ്രയോഗിച്ചുകൊണ്ട് കോടതി പൂര്‍ണ്ണമായ നീതി നടപ്പാക്കുമെന്ന് പ്രതീക്ഷിക്കുന്നുവെന്നും കേസിന്റെ അടിത്തട്ടില്‍ എത്തേണ്ടത് അത്യാവശ്യമാണെന്നും ജസ്റ്റിസ് സുബ്രഹ്മണ്യം മറുപടി നല്‍കി.
കേസുമായി ബന്ധപ്പെട്ട് കോടതിക്ക് ചില സംശയങ്ങളുണ്ടെന്നും ജഡ്ജി അഭിഭാഷകനോട് പറഞ്ഞു. അവ എന്താണെന്ന് അറിയാന്‍ അഭിഭാഷകന്‍ ആഗ്രഹിച്ചപ്പോഴാണ് തന്റെ മകളെ വിവാഹം കഴിച്ച് ജീവിതത്തില്‍ നല്ല നിലയില്‍ അയച്ച ഒരാള്‍ എന്തിനാണ് മറ്റുള്ളവരുടെ പെണ്‍മക്കളെ തലയില്‍ മുറുക്കി ജീവിതം നയിക്കാന്‍ പ്രേരിപ്പിക്കുന്നതെന്ന് അറിയണമെന്നും അതാണ് സംശയമെന്നും വിശദമാക്കിയത്.
പ്രായപൂര്‍ത്തിയായ ഒരാള്‍ക്ക് ജീവിതത്തില്‍ അവരുടേതായ വഴി തെരഞ്ഞെടുക്കാന്‍ സ്വാതന്ത്ര്യമുണ്ടെന്നും കോടതിയുടെ സംശയം ശരിക്കും മനസ്സിലാക്കാന്‍ കഴിയുന്നില്ലെന്നും അഭിഭാഷകന്‍ മറുപടി നല്‍കിയപ്പോള്‍ നിങ്ങള്‍ ഒരു പ്രത്യേക കക്ഷിക്ക് വേണ്ടി ഹാജരായതിനാല്‍ നിങ്ങള്‍ക്ക് മനസ്സിലാകില്ലെന്നും എന്നാല്‍ കോടതി ആര്‍ക്കും അനുകൂലമോ പ്രതികൂലമോ അല്ലെന്നും മുന്നിലുള്ള വ്യവഹാരക്കാരോട് നീതി മാത്രമേ ആഗ്രഹിക്കുന്നുള്ളൂവെന്നും ജസ്റ്റിസ് സുബ്രഹ്മണ്യം പറഞ്ഞു.
ഹര്‍ജിക്കാരന്റെ പെണ്‍മക്കള്‍ ഇടപെട്ട് തങ്ങളുടെ വാദങ്ങള്‍ ഉന്നയിക്കാന്‍ ശ്രമിച്ചപ്പോഴും കോടതി വിമര്‍ശനം ഉന്നയിച്ചു. ആത്മീയതയുടെ പാതയിലാണെന്ന് അവകാശപ്പെടുമ്പോഴും മാതാപിതാക്കളെ അവഗണിക്കുന്നത് പാപമാണെന്ന് നിങ്ങള്‍ കരുതുന്നില്ലെന്നും എല്ലാവരേയും സ്‌നേഹിക്കുക, ആരെയും വെറുക്കരുത് എന്നതാണ് ഭക്തിയുടെ തത്വമെങ്കിലും നിങ്ങളുടെ മാതാപിതാക്കളോടുള്ള വെറുപ്പാണ് ഞങ്ങള്‍ക്ക് കാണാന്‍ കഴിയുന്നതെന്നും അവരോട് മാന്യമായി പോലും സംസാരിക്കുന്നില്ലെന്നും കോടതി ചൂണ്ടിക്കാട്ടി.
ഇഷ ഫൗണ്ടേഷനുമായി ബന്ധപ്പെട്ട് ഒന്നിലധികം ക്രിമിനല്‍ കേസുകള്‍ ഉണ്ടെന്നും അടുത്തിടെ പോലും അവിടെ സേവനമനുഷ്ഠിക്കുന്ന ഒരു ഡോക്ടര്‍ക്കെതിരെ 2012ലെ കുട്ടികള്‍ക്കെതിരായ ലൈംഗികാതിക്രമങ്ങള്‍ തടയല്‍ (പോക്സോ) നിയമപ്രകാരം കേസെടുത്തിട്ടുണ്ടെന്നും ഹര്‍ജിക്കാരന്റെ അഭിഭാഷകന്‍ എം പുരുഷോത്തമന്‍ പറഞ്ഞതിനെ തുടര്‍ന്നാണ് ജഡ്ജിമാര്‍ അഡീഷണല്‍ നിര്‍ദേശം നല്‍കിയത്. ഫൗണ്ടേഷനുമായി ബന്ധപ്പെട്ട എല്ലാ കേസുകളുടേയും സ്റ്റാറ്റസ് റിപ്പോര്‍ട്ടുകള്‍ ഒക്ടോബര്‍ നാലിനകം സമര്‍പ്പിക്കാന്‍ പബ്ലിക് പ്രോസിക്യൂട്ടര്‍ ഇ രാജ് തിലകിനോട് കോടതി ആവശ്യപ്പെട്ടു.
തന്റെ മൂത്ത മകള്‍ 2003-ല്‍ മെക്കാട്രോണിക്സില്‍ എഞ്ചിനീയറിംഗ് ബിരുദം നേടിയിട്ടുണ്ടെന്നും അതിനുശേഷം യു കെയിലെ ഒരു പ്രശസ്തമായ യൂണിവേഴ്സിറ്റിയില്‍ നിന്ന് എം ടെക് ബിരുദം നേടിയിട്ടുണ്ടെന്നും ഹര്‍ജിക്കാരന്‍ സത്യവാങ്മൂലത്തില്‍ പറഞ്ഞു. അതേ സര്‍വകലാശാലയില്‍ ജോലിയില്‍ പ്രവേശിച്ച മകള്‍ 2004-ല്‍ പ്രതിമാസം ഒരു ലക്ഷം രൂപയോളം നേടിയിരുന്നെന്നും 2007-ല്‍ യു എസ് ആസ്ഥാനമായ ഒരാളെ വിവാഹം കഴിച്ചെങ്കിലും 2008-ല്‍ അവര്‍ വിവാഹമോചിതരായതായും അറിയിച്ചു.
അതിനുശേഷം അവര്‍ ഇഷ ഫൗണ്ടേഷനില്‍ യോഗ ക്ലാസുകളില്‍ പങ്കെടുക്കാന്‍ തുടങ്ങി. മൂത്തയാളുടെ പാത പിന്തുടര്‍ന്ന് സോഫ്റ്റ്‌വെയര്‍ എന്‍ജിനിയറായ രണ്ടാമത്തെ മകളും യോഗാ സെന്ററില്‍ സ്ഥിരമായി താമസിക്കാന്‍ തുടങ്ങിയെന്നും ഹര്‍ജിക്കാരന്‍ പറഞ്ഞു. പെണ്‍മക്കള്‍ തങ്ങളെ ഉപേക്ഷിച്ചത് മുതല്‍ തനിക്കും 63 വയസ്സുള്ള ഭാര്യക്കും ജീവിതം നരകം ആയിരുന്നുവെന്നും അദ്ദേഹം പറഞ്ഞു.
യോഗാ സെന്ററില്‍ തന്റെ പെണ്‍മക്കള്‍ക്ക് എന്തെങ്കിലും തരത്തിലുള്ള ഭക്ഷണവും മരുന്നും നല്‍കുന്നുണ്ടെന്നും ഇത് അവരുടെ ബുദ്ധിശക്തി നഷ്ടപ്പെടുത്തുന്നുവെന്നും അദ്ദേഹം ആരോപിച്ചു.