ഭൂമിക്കടിയിലെ ഇന്ധന കലവറകൾ വറ്റുന്നു എന്ന ആശങ്കകൾക്കിടയിൽ ലോകത്തിന്റെ ഇന്ധന പ്രതീക്ഷകൾക്ക് തിളക്കമേകി ഭൂമിക്കുള്ളിൽ ഹൈഡ്രജൻ മല സ്ഥിതി ചെയ്യുന്നതായുള്ള പഠനം പുറത്തു വന്നിരിക്കുകയാണ്. ഭൂമിയുടെ ഉപരിതലത്തിനുള്ളിൽ സ്ഥിതി ചെയ്യുന്ന ഹൈഡ്രജൻ ശേഖരം അടുത്ത 200 വർഷത്തേക്ക് ലോകത്തിന്റെ ഇന്ധന ആവശ്യകത നിറവേറ്റാൻ പര്യാപ്തമായതാണ്. സയൻസ് അഡ്വാൻസസ് ജേണലിൽ ഡിസംബർ 13ന് പ്രസിദ്ധീകരിച്ച മോഡൽ പ്രെഡിക്ഷൻസ് ഓഫ് ഗ്ലോബൽ ജിയോളജിക് ഹൈഡ്രജൻ റിസോഴ്‌സസ് എന്ന പഠനമാണ് ഈ നിർണായക വിവരം വെളിപ്പെടുത്തിയിരിക്കുന്നത്.
ഭൂമിയുടെ അടിയിലുള്ള പാറകളിലും, റിസർവോയറുകളിലുമായി ഏകദേശം 6.2 ട്രില്യൺ ഹൈഡ്രജനാണ് ശേഖരിക്കപ്പെട്ടിരിക്കുന്നത്. ഇത് ഇതു വരെ കണ്ടുപിടിക്കപ്പെട്ടിരുന്ന ഹൈഡ്രജൻ ശേഖരത്തിന്റെ 26 മടങ്ങ് അധികമാണ്. ഭാവിയുടെ ഇന്ധന ആവശ്യങ്ങൾ നിറവേറ്റാൻ ഏറ്റവും അനുയോജ്യമായ ഫ്യുവലാണ് ഹൈഡ്രജൻ.
ലോകത്തെങ്ങും ഹൈഡ്രജൻ ഇന്ധനവുമായി ബന്ധപ്പെട്ട പരീക്ഷണങ്ങൾ പുരോഗമിക്കുകയാണ്. ധാരാളമായി ലഭ്യമാണെന്നതും, ലൈറ്റ് ആയ പ്രകൃതവും ഒരു ഇന്ധനമെന്ന നിലയിൽ ഹൈഡ്രജന് കാര്യക്ഷമത നൽകുന്നു. ഓയിൽ & ഗ്യാസ് എന്നിവയ്ക്ക് പകരമായി ഹൈഡ്രജൻ ഉപയോഗിക്കുന്നതിനുള്ള കൊണ്ടു പിടിച്ച ശ്രമങ്ങളാണ് നടക്കുന്നത്.
ഭാവിയിൽ ചില സെക്ടറുകളുമായി ബന്ധപ്പെട്ട ഇന്ധന ആവശ്യകതയുടെ 30% ഹൈഡ്രജനിലൂടെ നിറവേറ്റപ്പെടുമെന്ന് പുതിയ പഠനം പറയുന്നു. ആഗോള തലത്തിൽ ഇന്ധന ഡിമാൻഡ് 2050 വർഷത്തോടെ ഇപ്പോഴത്തേതിനേക്കാൾ അഞ്ച് മടങ്ങിലധികമായി വർധന നേടുമെന്നും ഈ പഠനം പറയുന്നു.
ഒരു ചെറിയ തന്മാത്രയായ ഹൈഡ്രജൻ വലിയ അളവിൽ ലഭ്യമാവില്ലെന്ന പരമ്പരാഗത വിശ്വാസത്തെയാണ് പുതിയ പഠനം വെല്ലുവിളിക്കുന്നത്. ഭൂമിക്കടിയിലെ വിടവുകളിലൂടെയും, പാറകൾക്കിടയിലൂടെയും ഹൈഡ്രജൻ നഷ്ടപ്പെട്ടു പോകുമെന്നായിരുന്നു കരുതപ്പെട്ടിരുന്നത്. എന്നാൽ സമീപ കാലത്ത് അൽബേനിയ, പടിഞ്ഞാറൻ ആഫ്രിക്ക എന്നിവിടങ്ങളിലെ ക്രോമിയം ഖനനവുമായി ബന്ധപ്പെട്ട് ഭൂമിക്കടിയിൽ വലിയ അളവിൽ ഹൈഡ്രജൻ ശേഖരമുണ്ടെന്ന് കണ്ടെത്തിയതോടെ ഈ അനുമാനം തെറ്റാണെന്ന് തെളിഞ്ഞു.
ഹൈഡ്രജന്റെ ഏത് തരത്തിലുമുള്ള രൂപഭേദങ്ങളെ ശേഖരിച്ചു വെക്കാൻ സാധിക്കുമെന്നതും പ്രതീക്ഷ പകരുന്ന കാര്യമാണ്. അതേ സമയം ഹൈഡ്രജൻ വേർതിരിച്ചെടുത്ത് ചിലവ് കുറഞ്ഞ് ലഭ്യമാക്കുക എന്നതാണ് വെല്ലുവിളി ഉയർത്തുന്നത്. എന്നാൽ ഇന്ന് ആധുനിക സങ്കേതങ്ങളുടെ പിൻബലത്തോടെ പരോഗമിക്കുന്ന പരീക്ഷണങ്ങൾ ഇതിനും പരിഹാരം കണ്ടെത്തുമെന്നാണ് കരുതപ്പെടുന്നത്. ഇങ്ങനെ സംഭവിക്കുന്നതോടെ ഹൈഡ്രജൻ ഒരു ബിസിനസായി മാറുകയും, വലിയ നിക്ഷേപകർ ഇൻവെസ്റ്റ്‌മെന്റിനായി മുന്നിട്ടറങ്ങുകയും ചെയ്യും.
ഭൂമിക്കടിയിൽ ഹൈഡ്രജൻ ശേഖരം; 200 വർഷത്തേക്കുള്ള ഇന്ധന പ്രശ്‌നത്തിന് പരിഹാരം
