നിർണായക ദിനം നാളെ: കേരളം ആരുടെ കൈകളിലേക്ക്? ഫലത്തിനായി ആകാംക്ഷയോടെ രാഷ്ട്രീയരംഗം

---

കൊച്ചി: കേരള നിയമസഭാ തിരഞ്ഞെടുപ്പിന്റെ ഫലം നാളെ പുറത്ത് വരാനിരിക്കെ, സംസ്ഥാന രാഷ്ട്രീയവും ജനങ്ങളും ഒരുപോലെ ആകാംക്ഷയിലാണ്. മണിക്കൂറുകൾ മാത്രം ശേഷിക്കെ, മൂന്ന് മുന്നണികളും പ്രതീക്ഷകളും ആശങ്കകളും കൂട്ടിച്ചേർത്താണ് ഫലത്തെ കാത്തിരിക്കുന്നത്.

പത്തുവർഷമായി തുടർച്ചയായി അധികാരത്തിൽ തുടരുന്ന ഇടതുമുന്നണിക്ക് ഈ തിരഞ്ഞെടുപ്പ് നിർണായകമാണ്. വീണ്ടും അധികാരം പിടിച്ചാൽ, അത് കേരളത്തിന്റെ തെരഞ്ഞെടുപ്പ് ചരിത്രത്തിൽ അപൂർവ നേട്ടമായി രേഖപ്പെടുത്തപ്പെടും. എന്നാൽ ഭൂരിപക്ഷം നഷ്ടപ്പെട്ടാൽ, രാജ്യത്തെ അവസാന ഇടതുമുന്നണി സർക്കാർ എന്ന നിലയും നഷ്ടപ്പെടാൻ ഇടയാകും.

മറുവശത്ത്, കഴിഞ്ഞ പത്തുവർഷമായി ഭരണത്തിൽ നിന്ന് പുറത്തിരിക്കുന്ന യുഡിഎഫിന് ഈ തിരഞ്ഞെടുപ്പ് ജീവന്മരണ പോരാട്ടമാണ്. വിജയം നേടിയാൽ അത് മുന്നണിക്ക് വലിയ ആത്മവിശ്വാസവും രാഷ്ട്രീയ പുനരുജ്ജീവനവും നൽകും. എന്നാൽ വീണ്ടും പരാജയം നേരിട്ടാൽ, മുന്നണിയുടെ നിലനിൽപ്പിനെ തന്നെ ചോദ്യം ചെയ്യപ്പെടുന്ന സാഹചര്യം ഉണ്ടാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.

ബിജെപി നയിക്കുന്ന എൻഡിഎയും ഇത്തവണ കൂടുതൽ പ്രതീക്ഷകളോടെയാണ് രംഗത്തിറങ്ങിയത്. സംസ്ഥാനത്ത് വോട്ട് ശതമാനം ക്രമേണ ഉയർത്തിക്കൊണ്ടിരിക്കുന്ന എൻഡിഎ, ഇത്തവണ ചില സീറ്റുകളിലെങ്കിലും വിജയമുണ്ടാകുമെന്ന കണക്കുകൂട്ടലിലാണ്. 2030ഓടെ കേരളത്തിൽ ശക്തമായ സാന്നിധ്യം ഉറപ്പാക്കാനുള്ള ദീർഘകാല തന്ത്രത്തിന്റെ ഭാഗമായാണ് ഈ തെരഞ്ഞെടുപ്പിനെ അവർ കാണുന്നത്.

ഈ തെരഞ്ഞെടുപ്പിൽ ഉയർന്ന പോളിംഗ് ശതമാനം ശ്രദ്ധേയമാണ്. എസ്‌ഐആർ നടപടികളുടെ പശ്ചാത്തലത്തിൽ ന്യൂനപക്ഷ വിഭാഗങ്ങൾ വലിയ തോതിൽ പോളിംഗ് സ്‌റ്റേഷനുകളിലേക്ക് എത്തിയതായാണ് വിലയിരുത്തൽ. ഭരണമുന്നണിക്കും ബിജെപിക്കും എതിരായി മുസ്ലീം വോട്ടുകൾ ഏകീകരിച്ചുവെന്ന അവകാശവാദം യുഡിഎഫ് ഉയർത്തുന്നുണ്ട്, ഇത് ഫലത്തെ സ്വാധീനിക്കാമെന്നാണ് അവരുടെ കണക്കുകൂട്ടൽ.

ഇങ്ങനെ പല ഘടകങ്ങളും നിർണായകമായി മാറുന്ന സാഹചര്യത്തിൽ, നാളെയുടെ ഫലം കേരളത്തിന്റെ രാഷ്ട്രീയ ഭൂപടത്തിൽ വലിയ മാറ്റങ്ങൾ വരുത്തുമോയെന്നത് കാത്തിരിക്കുകയാണ് സംസ്ഥാനം.


ആശയക്കുഴപ്പമുണ്ടാക്കിയ സർവെ ഫലങ്ങൾ 

കേരള നിയമസഭാ തിരഞ്ഞെടുപ്പ് ഫലപ്രഖ്യാപനത്തിന് മണിക്കൂറുകൾ മാത്രം ശേഷിക്കെ, പ്രീ പോൾ-എക്‌സിറ്റ് പോൾ സർവെകൾ തമ്മിലുള്ള വൈരുദ്ധ്യം രാഷ്ട്രീയരംഗത്ത് ആശയക്കുഴപ്പം സൃഷ്ടിച്ചിരുന്നു. പ്രീ പോൾ സർവെകൾ ഇടതുമുന്നണിക്ക് മേൽക്കൈ പ്രവചിച്ചപ്പോൾ, എക്‌സിറ്റ് പോൾ സർവെകൾ യുഡിഎഫിന് മുൻതൂക്കം കാണിച്ചതാണ് ചർച്ചകൾക്ക് ഇടയാക്കിയത്.

സർവെ ഫലങ്ങളെ അടിസ്ഥാനമാക്കി ഇരുമുന്നണികളുടെയും പ്രവർത്തകർ ആത്മവിശ്വാസം പ്രകടിപ്പിക്കുന്നുണ്ടെങ്കിലും, യഥാർത്ഥ ചിത്രം വ്യക്തമാകുന്നത് നാളെയായിരിക്കും. പ്രവചനങ്ങൾ എത്രത്തോളം യാഥാർത്ഥ്യത്തിലേക്ക് മാറുമെന്നതിൽ ആകാംക്ഷ നിറഞ്ഞ കാത്തിരിപ്പിലാണ് രാഷ്ട്രീയകേന്ദ്രങ്ങളും പൊതുജനങ്ങളും.