കൊച്ചി: ഒരു വര്ഷം കൊണ്ട് 20 ലക്ഷം യാത്രക്കാരുമായി കൊച്ചി വാട്ടര് മെട്രോ. കേരള സര്ക്കാരിന്റെ അഭിമാന പദ്ധതിയായ കൊച്ചി വാട്ടര് മെട്രോ മറ്റൊരു ചരിത്രനേട്ടം കൂടി കൈവരിച്ച് മുന്നോട്ടുകുതിക്കുകയാണെന്ന് മന്ത്രി പി രാജീവ് പറഞ്ഞു
പൊതുഗതാഗത മേഖലയിലെ നാഴികക്കല്ലായി മാറിയ വാട്ടര്മെട്രോ വിനോദസഞ്ചാരികള്ക്ക് പുറമെ കൊച്ചിക്കാര്ക്കും ഏറെ സഹായകമായിട്ടുണ്ടെന്നാണ് യാത്രക്കാരുടെ എണ്ണത്തിലുണ്ടാകുന്ന വര്ധനവ് സൂചിപ്പിക്കുന്നത്. യാത്രാസമയത്തില് ഉണ്ടാകുന്ന ഗണ്യമായ കുറവും മികച്ച സൗകര്യങ്ങളും വാട്ടര്മെട്രോയ്ക്ക് ജനങ്ങള്ക്കിടയില് സ്വീകാര്യത വര്ധിപ്പിക്കുന്നുവെന്നും മന്ത്രി വ്യക്തമാക്കി.
10 ടെര്മിനലുകളിലായി 6 റൂട്ടിലേക്ക് കൊച്ചി വാട്ടര് മെട്രോ വളര്ന്നിരിക്കുകയാണ്. വാട്ടര്മെട്രോയുടെ വളര്ച്ച കൊച്ചിയിലേക്ക് നിരവധി ടൂറിസ്റ്റുകളെയാണ് ആകര്ഷിക്കുന്നത്. ഇന്ത്യയിലെ തന്നെ ആദ്യ വാട്ടര്മെട്രോയിലേക്ക് വരുന്ന വ്ലോഗര്മാരുടെ എണ്ണവും ഏറെയാണ് - മന്ത്രി ഫേസ്ബുക്കില് കുറിച്ചു.
പരിസ്ഥിതി സൗഹൃദമായ, എന്നാല് അന്താരാഷ്ട്ര നിലവാരം കാത്തുസൂക്ഷിക്കുന്ന കേരള മോഡല്, യൂണിയന് ഗവണ്മെന്റ് പോലും പരസ്യങ്ങളില് ഉപയോഗിക്കുന്നത് ഇന്ന് കേരളം ചിന്തിക്കുന്നത് നാളെ രാജ്യം ഏറ്റെടുക്കും എന്നതിന്റെ മറ്റൊരു ഉദാഹരണം കൂടിയാണ് എന്നും മന്ത്രി പറഞ്ഞു.