കോട്ടയം: മോഹന്ലാല് നായകനായ കര്മ്മയോദ്ധയുടെ തിരക്കഥയുമായി ബന്ധപ്പെട്ട നിയമ യുദ്ധത്തില് സംവിധായകന് മേജര് രവിക്ക് തിരിച്ചടി. ചിത്രത്തിന്റെ തിരക്കഥ പുതുപ്പള്ളി സ്വദേശിയും തിരക്കഥാകൃത്തുമായ റെജി മാത്യുവിന്റേതാണെന്ന് കോട്ടയം കൊമേഷ്യല് കോടതി വിധിച്ചു. പരാതിക്കാരന് 30 ലക്ഷം രൂപയും സിനിമയുടെ പകര്പ്പവകാശവും നല്കണമെന്നും കോടതി ഉത്തരവിട്ടു.
13 വര്ഷം നീണ്ട നിയമപോരാട്ടത്തിന് ഒടുവിലാണ് വിധി വന്നത്. 2012ലാണ് ചിത്രം പുറത്തിറങ്ങിയത്. കഥയും തിരക്കഥയും സംഭാഷണവും തന്റെ അനുമതിയില്ലാതെയാണ് ഉപയോഗിച്ചതെന്ന് കാണിച്ച് റെജി മാത്യു നല്കിയ പരാതിയിലാണ് കോട്ടയം കൊമേഷ്യല് കോടതിയുടെ വിധി വന്നത്.
സിനിമയുടെ റിലീസിന് ഒരുമാസം മുന്പാണ് റിലീസ് തടയണമെന്ന് ആവശ്യപ്പെട്ട് റെജി മാത്യു കോടതിയെ സമീപിച്ചത്. അഞ്ച് ലക്ഷം രൂപ കെട്ടിവെച്ച ശേഷം സിനിമ റിലീസ് ചെയ്യാന് കോടതി അനുവദിച്ചിരുന്നു. കഥ, തിരക്കഥ, സംഭാഷണം എന്നിവ സംബന്ധിച്ച് തര്ക്കമുണ്ടെന്ന് രേഖപ്പെടുത്തി സിനിമ റിലീസ് ചെയ്യാനായിരുന്നു കോടതി അനുമതി കൊടുത്തത്. എന്നാല് തിരക്കഥാകൃത്തുകളുടെ സ്ഥാനത്ത് ഷാജി, സുമേഷ് എന്നിവരുടെ പേര് ചേര്ത്തായിരുന്നു സിനിമ റിലീസ് ചെയ്തത്. കോടതി വിധി ലംഘിച്ചുവെന്ന് കാണിച്ച് 40 ലക്ഷം രൂപ നഷ്ടപരിഹാരം ആവശ്യപ്പെട്ടാണ് റെജി മാത്യു വീണ്ടും കോടതിയെ സമീപിച്ചത്. തിരക്കഥയും സംഭാഷണവും തന്റേതാണെന്ന് പ്രഖ്യാപിക്കണമെന്നും ഹര്ജിക്കാരന് ആവശ്യപ്പട്ടിരുന്നു.