കൊച്ചി : എം ടി വാസുദേവന്‍ നായരുടെ ഒന്‍പത് കഥകളെ ആസ്പദമാക്കി ഒരുങ്ങുന്ന ആന്തോളജി ചിത്രം മനോരഥങ്ങളുടെ ട്രെയിലര്‍ ലോഞ്ചിനിടെ നടന്‍ ആസിഫ് അലിയെ അപമാനിച്ചെന്ന് ആരോപിച്ച് സംഗീത സംവിധായകന്‍ രമേശ് നാരായണനെതിരെ സോഷ്യല്‍ മീഡിയയില്‍ കടുത്ത പ്രതിഷേധം.
രമേഷ് നാരായണന് പുരസ്‌കാരം നല്‍കാന്‍ ആസിഫ് അലിയെ ആണ് സംഘാടകര്‍ നിയോഗിച്ചത്. എന്നാല്‍ ആസിഫില്‍ നിന്നും പുരസ്‌കാരം സ്വീകരിക്കാന്‍ മടിച്ച രമേശ് നാരായണന്, പകരം സംവിധായകന്‍ ജയരാജിനെ വേദിയിലേക്ക് വിളിച്ചുവരുത്തി ജയരാജില്‍ നിന്നും പുരസ്‌കാരം ഏറ്റുവാങ്ങുകയായിരുന്നു. പുരസ്‌കാരം നല്‍കിയ വേളയിലോ, അതിനു ശേഷമോ രമേഷ് നാരായണന് ആസിഫ് അലിയെ അഭിവാദ്യം ചെയ്യുകയോ സംസാരിക്കുകയോ ചെയ്യാതിരുന്നതും വിമര്‍ശനങ്ങള്‍ക്ക് ആക്കം കൂട്ടുന്നു.
സംഭവത്തിന്റെ വീഡിയോ പുറത്തുവന്നതിനു പിന്നാലെ സോഷ്യല്‍ മീഡിയയില്‍ പരക്കെ വിമര്‍ശനങ്ങള്‍ ഉയരുകയാണ്. ആസിഫിനോട് പൊതുവേദിയില്‍ മോശമായി പെരുമാറിയ രമേഷ് നാരായണന് സംഭവത്തില്‍ മാപ്പു പറയണമെന്നാണ് സോഷ്യല്‍ മീഡിയ ആവശ്യപ്പെടുന്നത്. ഒരു കലാകാരന്‍ എന്താവരുതെന്ന് രമേഷ് നാരായണന് കാണിച്ചു തന്നു എന്നും സോഷ്യല്‍ മീഡിയ വിമര്‍ശിക്കുന്നു.
നടന്‍ ആസിഫ് അലിയെ വേദിയില്‍ അപമാനിച്ചെന്ന്; രമേശ് നാരായണനെതിരെ വിമര്‍ശനം
