ദുബായ്: കാര്‍ റേസിംഗ് പരിശീലനത്തിനിടെ തമിഴ് നടന്‍ അജിത്തിന്റെ കാര്‍ അപകടത്തില്‍പ്പെട്ടു. താരം പരുക്കുകളില്ലാതെ അത്ഭുതകരമായി രക്ഷപ്പെട്ടതായാണ് റിപ്പോര്‍ട്ടുകള്‍. കാര്‍ അപകടത്തില്‍ പെടുന്ന വീഡിയോ സമൂഹമാധ്യമങ്ങളില്‍ പ്രചരിക്കുന്നുണ്ട്.
ദുബായിലെ റേസിങ് ട്രാക്കിലെ പരിശീലനത്തിനിടെ ചൊവ്വാഴ്ചയാണ് അപകടമുണ്ടായത്. 24 എച്ച് ദുബായ് 2025 എന്ന റേസിനായുള്ള തയ്യാറെടുപ്പിലായിരുന്നു താരം.
കാര്‍ നിയന്ത്രണം വിട്ട് സംരക്ഷണ ഭിത്തിയില്‍ ഇടിച്ച് വട്ടം കറങ്ങുന്നതായി വീഡിയോയില്‍ വ്യക്തമാണ്. അജിത് കുമാര്‍ റേസിങ് എന്ന പേരിലൊരു റേസിങ് ടീം തന്നെയുണ്ട് അജിത്തിന്.