ന്യൂഡല്ഹി: മെറ്റയുടെ പുതിയ എഐ അസിസ്റ്റന്റായ 'മ്യൂസ്' സംബന്ധിച്ച മീമുകളും തമാശകളും പങ്കുവെച്ചതിന് പിന്നാലെ പ്രധാനമന്ത്രി നരേന്ദ്ര മോഡിക്കൊപ്പമുള്ള എഡിറ്റ് ചെയ്ത ചിത്രം സമൂഹമാധ്യമത്തില് പങ്കുവെച്ച് മെറ്റ എഐ മേധാവി അലക്സാണ്ടര് വാങ്. പിന്നീട് ചിത്രം നീക്കം ചെയ്തെങ്കിലും അത് പോസ്റ്റ് ചെയ്തതിന്റെ കാരണം അദ്ദേഹം വ്യക്തമാക്കിയില്ല.
ഓപ്പണ്എഐ സി ഇ ഒ സാം ആള്ട്ട്മാനും ആന്ത്രോപിക് സി ഇ ഒ ഡാരിയോ അമോഡെയിയും ഉള്പ്പെടെയുള്ള പ്രമുഖ എഐ മേധാവികള് പ്രധാനമന്ത്രി നരേന്ദ്ര മോഡിക്കൊപ്പം കൈകോര്ത്തുനില്ക്കുന്ന ചിത്രമാണ് വാങ് എഡിറ്റ് ചെയ്തത്. ഇന്ത്യ എഐ ഇംപാക്ട് ഉച്ചകോടിക്കിടെ പകര്ത്തിയ യഥാര്ഥ ചിത്രത്തില് മോഡിക്കൊപ്പം നിരവധി എഐ രംഗത്തെ പ്രമുഖര് കൈകോര്ത്തുനില്ക്കുന്നുണ്ട്.
എഡിറ്റ് ചെയ്ത ചിത്രത്തില് മെറ്റയുടെ 'മ്യൂസ്' എന്ന എഐ അസിസ്റ്റന്റിന്റെ രോമാവൃതമായ കാര്ട്ടൂണ് രൂപത്തിലുള്ള ചിഹ്നത്തെ ആള്ട്ട്മാനും അമോഡെയിക്കും ഇടയില് ചേര്ത്താണ് ഇരുവരുടെയും കൈകള് പിടിപ്പിച്ചിരിക്കുന്നത്. എഐ രംഗത്തെ ഇരു കമ്പനികളും തമ്മിലുള്ള മത്സരത്തെ തമാശരൂപത്തില് അവതരിപ്പിക്കുന്നതായിരുന്നു ചിത്രം.
ചിത്രം എക്സില് പങ്കുവെച്ച് വാങ്, 'മ്യൂസിന് ചെയ്യാന് കഴിയാത്തത് എന്താണ്?' എന്ന് കുറിച്ചു. തുടര്ന്ന് 'മ്യൂസിന് നൊബേല് സമാധാന പുരസ്കാരം എവിടെനിന്ന് ഏറ്റുവാങ്ങാനാകും എന്ന് പറയൂ' എന്നും അദ്ദേഹം കുറിച്ചു.
പിന്നീട് വാങ് ചിത്രം നീക്കം ചെയ്തു. എന്നാല് അത് നീക്കം ചെയ്തതിന്റെ വ്യക്തമായ കാരണം അദ്ദേഹം നല്കിയിട്ടില്ല.
ഉപഭോക്താക്കളുടെ ദൈനംദിന ജോലികളും വിവിധ പദ്ധതികളും എളുപ്പമാക്കുന്നതിനായി മെറ്റ പുറത്തിറക്കിയ എഐ അസിസ്റ്റന്റാണ് 'മ്യൂസ്'. മെറ്റ സി ഇ ഒ മാര്ക്ക് സക്കര്ബര്ഗിന്റെ 'പേഴ്സണല് സൂപ്പര് ഇന്റലിജന്സ്' എന്ന ആശയത്തിന്റെ പ്രധാന ഭാഗമായാണ് പുതിയ എഐ അസിസ്റ്റന്റിനെ കമ്പനി അവതരിപ്പിച്ചിരിക്കുന്നത്.
ആദ്യഘട്ടത്തില് അമേരിക്കയിലെ ഉപയോക്താക്കള്ക്ക് മാത്രമായിരിക്കും മ്യൂസ് ലഭ്യമാകുക. ഭാവിയില് മെറ്റയുടെ സ്മാര്ട്ട് ഗ്ലാസുകളിലും മ്യൂസ് ലഭ്യമാക്കുമെന്ന് കമ്പനി അറിയിച്ചിട്ടുണ്ട്. എന്നാല് ഇതിന്റെ സമയക്രമം സംബന്ധിച്ച് കൂടുതല് വിവരങ്ങള് മെറ്റ പുറത്തുവിട്ടിട്ടില്ല.