യെമനിലെ ഹൂതി വിമതരുടെ ആക്രമണം കടുത്ത സാഹചര്യത്തിൽ, സൗദി അറേബ്യ, തുർക്കി, പാകിസ്താൻ എന്നീ രാജ്യങ്ങളുടെ സൈന്യാധിപന്മാർ പങ്കെടുന്ന അടിയന്തര സൈനിക ചർച്ചകൾക്ക് റിയാദ് വേദിയാകുന്നു. മൂന്ന് രാജ്യങ്ങളും ഒപ്പുവെച്ച മക്ക സംയുക്ത പ്രതിരോധ കരാറിന്റെ അടിസ്ഥാനത്തിലാണ് ഈ അടിയന്തര നീക്കം.
ന്യൂയോർക്കിൽ വ്യാഴാഴ്ച സൗദി വിദേശകാര്യ മന്ത്രി പ്രിൻസ് ഫൈസൽ ബിൻ ഫർഹാൻ, പാകിസ്ഥാൻ വിദേശകാര്യ മന്ത്രി ഇഷാഖ് ദാർ, തുർക്കി വിദേശകാര്യ മന്ത്രി ഹക്കാൻ ഫിദാൻ എന്നിവർ തമ്മിൽ നടത്തിയ കൂടിക്കാഴ്ചയ്ക്ക് ശേഷമാണ് ഈ പ്രഖ്യാപനമുണ്ടായത്. ഐക്യരാഷ്ട്രസഭയുടെ പൊതുസഭാ സമ്മേളനത്തിനിടെയാണ് മൂന്ന് മന്ത്രിമാരും കൂടിക്കാഴ്ച നടത്തിയത്.
"മക്ക സംയുക്ത പ്രതിരോധ കരാർ പ്രകാരം സൗദി അറേബ്യയെ പിന്തുണയ്ക്കുന്നതിനുള്ള വഴികൾ ചർച്ച ചെയ്യുന്നതിനായി മൂന്ന് രാജ്യങ്ങളിലെയും സൈനിക മേധാവികളുടെ അടിയന്തര യോഗം ചേരുന്നതുമായി ബന്ധപ്പെട്ട ക്രമീകരണങ്ങൾ" ഈ കൂടിക്കാഴ്ചയിൽ ചർച്ച ചെയ്തതായി സൗദി അറേബ്യയുടെ ഔദ്യോഗിക വാർത്താ ഏജൻസിയായ എസ്പിഎ പുറത്തിറക്കിയ പ്രസ്താവനയിൽ പറയുന്നു. ഈ യോഗത്തിൽ പങ്കെടുക്കുന്നതിനായി തുർക്കിയുടെ ചീഫ് ഓഫ് ജനറൽ സ്റ്റാഫ് വെള്ളിയാഴ്ച സൗദി അറേബ്യ സന്ദർശിക്കുമെന്ന് തുർക്കി പ്രതിരോധ മന്ത്രാലയം അറിയിച്ചു. ചർച്ചകൾ വെള്ളിയാഴ്ച തന്നെ നടക്കുമോ എന്നത് സംബന്ധിച്ച് വ്യക്തതയുണ്ടായിട്ടില്ല.
സൗദി അറേബ്യ, പാകിസ്ഥാൻ, തുർക്കി എന്നിവർ കഴിഞ്ഞ മാസം 'മക്ക സംയുക്ത പ്രതിരോധ കരാറിൽ' ഒപ്പുവെച്ചിരുന്നു. ഇതിലൂടെ, ഏതെങ്കിലും ഒരു രാജ്യത്തിന് നേരെ ആക്രമണമുണ്ടായാൽ പരസ്പരം പ്രതിരോധിക്കാൻ ഈ മൂന്ന് രാജ്യങ്ങളും പ്രതിജ്ഞാബദ്ധമാണ്. 2026 ഓഗസ്റ്റ് 7-ന് മക്കയിലെ അൽ സഫ കൊട്ടാരത്തിൽ വെച്ച് സൗദി കിരീടാവകാശി മുഹമ്മദ് ബിൻ സൽമാൻ, പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്, തുർക്കി പ്രസിഡന്റ് റജബ് തയ്യിബ് എർദോഗൻ എന്നിവർ ചേർന്നാണ് ഈ കരാറിൽ ഒപ്പുവെച്ചത്. 2025 സെപ്റ്റംബർ 17-ന് പാകിസ്ഥാനും സൗദി അറേബ്യയും തമ്മിൽ ഒപ്പുവെച്ച 'തന്ത്രപ്രധാനമായ പരസ്പര പ്രതിരോധ കരാറി'ൽ നിന്നാണ് ഈ പുതിയ കരാർ രൂപപ്പെട്ടത്. മധ്യപൂർവ്വേഷ്യയിലും ദക്ഷിണേഷ്യയിലും സംയുക്ത സൈനിക പ്രതിരോധ ശേഷിയും പ്രാദേശിക സുരക്ഷയും ശക്തിപ്പെടുത്തുന്നതിനായി, നാറ്റോ മാതൃകയിലുള്ള ഒരു പരസ്പര പ്രതിരോധ സംവിധാനം ഈ കരാർ വിഭാവനം ചെയ്യുന്നു. പരസ്പര പ്രതിരോധത്തിനുള്ള വ്യവസ്ഥ കരാറിലുണ്ടെങ്കിലും, ഹൂതി ആക്രമണങ്ങളോട് പാകിസ്ഥാനോ തുർക്കിയോ ഇതുവരെ സൈനികമായി പ്രതികരിച്ചിട്ടില്ല.
സംഘർഷം വർദ്ധിപ്പിച്ച് ഹൂതി ആക്രമണങ്ങൾ
വർഷങ്ങളായി നിലനിന്നിരുന്ന വെടിനിർത്തൽ കരാർ അവസാനിപ്പിക്കുകയും സമുദ്ര ഉപരോധം പ്രഖ്യാപിക്കുകയും ചെയ്തുകൊണ്ട്, ഇറാൻ്റെ പിന്തുണയുള്ള ഹൂതികൾ ജൂലൈ മുതൽ സൗദി അറേബ്യയ്ക്കെതിരായ ആക്രമണങ്ങൾ ശക്തമാക്കിയിട്ടുണ്ട്. സൗദിയുടെ എണ്ണ കയറ്റുമതി തടസ്സപ്പെടുത്താൻ ലക്ഷ്യമിട്ട്, സൗദിയിലെ വിവിധ കേന്ദ്രങ്ങളെ ആക്രമിക്കുകയും യെമൻ്റെ മുഴുവൻ ചെങ്കടൽ തീരപ്രദേശവും പിടിച്ചെടുക്കുകയും ചെയ്തിരിക്കുകയാണ് ഈ സംഘം. ലോകത്തിലെ ഏറ്റവും വലിയ ക്രൂഡ് ഓയിൽ കയറ്റുമതിക്കാരായ സൗദി അറേബ്യയെ സംബന്ധിച്ചിടത്തോളം ഈ ആക്രമണങ്ങൾ വലിയ ആശങ്കയാണ് സൃഷ്ടിക്കുന്നത്.
സൗദിയിലെ തന്ത്രപ്രധാന നഗരങ്ങളായ മക്ക, ജിദ്ദ എന്നിവയ്ക്കും യാൻബു പോലെയുള്ള പ്രമുഖ എണ്ണക്കയറ്റുമതി കേന്ദ്രങ്ങൾക്കും നേരെ ഹൂതികൾ മിസൈൽ-ഡ്രോൺ ആക്രമണങ്ങൾ കടുപ്പിച്ചതാണ് അടിയന്തര സാഹചര്യത്തിന് കാരണമായത്. അടുത്തിടെ താഇഫ്, യാൻബു മേഖലകളിലേക്ക് ഹൂതികൾ തൊടുത്തുവിട്ട 6 ബാലിസ്റ്റിക് മിസൈലുകൾ സൗദി വ്യോമപ്രതിരോധ സേന തകർത്തിരുന്നു. സൗദി അറേബ്യയുടെ പരമാധികാരത്തിന് മേലുള്ള കടന്നുകയറ്റങ്ങളെ ശക്തമായി പ്രതിരോധിക്കുമെന്ന് സൗദി സഖ്യസേന വ്യക്തമാക്കിയിട്ടുണ്ട്. സഖ്യകക്ഷിയായ സൗദിക്ക് ആവശ്യമായ സാങ്കേതിക-സൈനിക സഹായങ്ങൾ നൽകാൻ തയ്യാറാണെന്ന് തുർക്കി വിദേശകാര്യ മന്ത്രി ഹകാൻ ഫിദാൻ അറിയിച്ചിട്ടുണ്ട്.
സൗദി അറേബ്യയിലെ സാധാരണക്കാരെയും സാമ്പത്തിക കേന്ദ്രങ്ങളെയും ലക്ഷ്യമിട്ടുള്ള ഹൂതി ആക്രമണങ്ങളെ മൂന്ന് വിദേശകാര്യ മന്ത്രിമാരും അപലപിച്ചതായി എസ്പിഎ റിപ്പോർട്ട് ചെയ്തു. ഇസ്ലാമിലെ ഏറ്റവും പവിത്രമായ നഗരമായ മക്കയ്ക്കുനേരെയുണ്ടായ ആക്രമണങ്ങളെയും അവർ അപലപിച്ചു. എന്നാൽ തങ്ങൾ അത്തരം ആക്രമണങ്ങൾ നടത്തിയിട്ടില്ലെന്നാണ് യെമൻ ഗ്രൂപ്പിന്റെ വാദം.
വ്യാഴാഴ്ച, സൗദി അറേബ്യയുടെ ഗ്രാൻഡ് മുഫ്തി സാലിഹ് ബിൻ ഫൗസാൻ ബിൻ അബ്ദുള്ള അൽ ഫൗസാൻ, "തങ്ങളുടെ കടമ നിർവഹിക്കാൻ സജ്ജരാകാൻ" സൈനികരോട് ആഹ്വാനം ചെയ്തു. "ഹൂതി ഗ്രൂപ്പിനെയും അവരെ പിന്തുണയ്ക്കുന്നവരെയും ഉന്മൂലനം ചെയ്യാൻ" അദ്ദേഹം ദൈവത്തോട് പ്രാർത്ഥിക്കുകയും ചെയ്തു. ഹൂതികളിൽ നിന്ന് തുടർച്ചയായ ആക്രമണങ്ങൾ നേരിടുന്ന സാഹചര്യത്തിൽ, 'മക്ക സംയുക്ത പ്രതിരോധ കരാറി'ന് കീഴിൽ സൗദി അറേബ്യയ്ക്ക് പിന്തുണ നൽകുന്നതിനുള്ള വഴികൾ ചീഫ് ഓഫ് സ്റ്റാഫ് തലത്തിലുള്ള വരാനിരിക്കുന്ന യോഗം ചർച്ച ചെയ്യും. എന്നാൽ, തുർക്കിയും പാകിസ്താനും സൗദിയിൽ സൈന്യത്തെ വിന്യസിക്കുകയോ നേരിട്ട് യുദ്ധത്തിൽ പങ്കാളികളാവുകയോ ചെയ്താൽ കടുത്ത തിരിച്ചടി നേരിടേണ്ടി വരുമെന്ന് ഹൂതി നേതൃത്വം മുന്നറിയിപ്പ് നൽകിയിട്ടുണ്ട്. അതേസമയം, ഈ ആക്രമണങ്ങളിൽ തങ്ങൾക്ക് പങ്കില്ലെന്നും ഹൂതികൾ സ്വന്തം നിലയ്ക്കാണ് തീരുമാനങ്ങൾ എടുക്കുന്നതെന്നും ഇറാൻ വ്യക്തമാക്കിയിട്ടുണ്ട്.
ഹൂതി ആക്രമണങ്ങൾ ശക്തമാകുന്നതിനിടെ അടിയന്തര സൈനിക ചർച്ചകളുമായി സൗദി അറേബ്യയും തുർക്കിയും പാകിസ്ഥാനും
