വാഷിംഗ്ടണ്‍: മിഷിഗണിലെ സെനറ്റ് സ്ഥാനാര്‍ഥിയായ അബ്ദുല്‍ അല്‍ സയ്യദിനുള്ള പിന്തുണ പിന്‍വലിച്ച് റിപ്പബ്ലിക്കന്‍ സ്ഥാനാര്‍ഥി മൈക്ക് റോജേഴ്സിന് പിന്തുണ പ്രഖ്യാപിച്ചതിനെച്ചൊല്ലിയ വിവാദത്തില്‍ വിശദീകരണവുമായി ഡെമോക്രാറ്റിക് പ്രതിനിധി ഹേലി സ്റ്റീവന്‍സ്. തന്റെ തീരുമാനത്തെ വിമര്‍ശിച്ച പാര്‍ട്ടിയിലെ നേതാക്കള്‍ക്കും സഹപ്രവര്‍ത്തകര്‍ക്കുമെതിരെ രൂക്ഷ വിമര്‍ശനമുന്നയിച്ച അവര്‍, നിലപാട് മാറ്റിയത് ആരുടെയും സമ്മര്‍ദത്തിന് വഴങ്ങിയല്ലെന്നും മനഃസാക്ഷിയുടെ അടിസ്ഥാനത്തിലാണെന്നും വ്യക്തമാക്കി.
വോട്ടെടുപ്പ് ആരംഭിക്കുന്നതിന് മുമ്പ് എക്സില്‍ പ്രസിദ്ധീകരിച്ച ഏകദേശം 900 വാക്കുകളുള്ള കുറിപ്പിലാണ് സ്റ്റീവന്‍സ് നിലപാട് വിശദീകരിച്ചത്. 'നാം എടുക്കുന്ന തീരുമാനങ്ങള്‍' എന്ന തലക്കെട്ടിലുള്ള കുറിപ്പില്‍ പിന്തുണ പിന്‍വലിക്കാനിടയായ സാഹചര്യങ്ങളും പാര്‍ട്ടിക്കുള്ളില്‍നിന്ന് നേരിടേണ്ടിവന്ന വിമര്‍ശനങ്ങളും അവര്‍ വിശദീകരിച്ചു.
തന്നെ പാര്‍ട്ടിയിലെ ചിലര്‍ പരസ്യമായി 'വഞ്ചക'യെന്ന് വിശേഷിപ്പിച്ചതായും സ്റ്റീവന്‍സ് ചൂണ്ടിക്കാട്ടി. പാര്‍ട്ടിയുടെ ഔദ്യോഗിക നിലപാടില്‍നിന്ന് വ്യത്യസ്തമായ തീരുമാനമെടുത്തതുപോലെ തന്നെ, അതിന്റെ പേരില്‍ നേരിടേണ്ടിവന്ന വിമര്‍ശനങ്ങളും തന്നെ വേദനിപ്പിച്ചതായി അവര്‍ പറഞ്ഞു.
അബ്ദുല്‍ അല്‍ സയ്യദിനുള്ള തന്റെ പിന്തുണ പിന്‍വലിച്ച് മൈക്ക് റോജേഴ്സിനെ പിന്തുണച്ച തീരുമാനം നിരവധി ഡെമോക്രാറ്റുകളെ പ്രകോപിപ്പിച്ചിട്ടുണ്ട്. അവരുടെ പ്രതികരണം എനിക്ക് മനസ്സിലാകും. എന്നാല്‍ ഈ തീരുമാനം തിടുക്കത്തില്‍ എടുത്തതല്ല. മറ്റാരും തനിക്കുവേണ്ടി എടുത്തതുമല്ല. തന്റെ മനഃസാക്ഷിയുടെ അടിസ്ഥാനത്തിലുള്ള തീരുമാനമായിരുന്നു അത്- സ്റ്റീവന്‍സ് കുറിച്ചു.
അബ്ദുല്‍ അല്‍ സയ്യദിനെ ആദ്യം പിന്തുണച്ചത് പാര്‍ട്ടിയുടെ താത്പര്യങ്ങള്‍ക്ക് മുന്‍ഗണന നല്‍കണമെന്ന നിലപാടിലായിരുന്നുവെന്നും എന്നാല്‍ പിന്നീട് താന്‍ ചര്‍ച്ചകളില്‍നിന്ന് മാറ്റിനിര്‍ത്തപ്പെട്ടുവെന്നും അവര്‍ ആരോപിച്ചു.
പാര്‍ട്ടിക്കുള്ളിലെ ഭിന്നതയ്ക്ക് കാരണമായ പരസ്യങ്ങളെയും സ്റ്റീവന്‍സ് കുറിപ്പില്‍ പരാമര്‍ശിച്ചു.
അബ്ദുല്‍ അല്‍ സയ്യദിനെ പിന്തുണയ്ക്കുന്ന ഒരു സംഘടനയുടെ പരസ്യത്തില്‍ പലചരക്ക് സാധനങ്ങളുടെ വിലവര്‍ധനയെ ഇസ്രയേലിനുള്ള അമേരിക്കയുടെ പിന്തുണയുമായി ബന്ധപ്പെടുത്തിയിരുന്നു. അല്‍ സയ്യദിന്റെ സ്വന്തം പ്രചാരണസംഘം പുറത്തിറക്കിയ മറ്റൊരു പരസ്യത്തില്‍ ടക്കര്‍ കാള്‍സണെയും ഉള്‍പ്പെടുത്തിയിരുന്നു.
വംശീയവും കറുത്തവര്‍ഗക്കാര്‍ക്കെതിരായതുമായ പരാമര്‍ശങ്ങള്‍ നടത്തിയിട്ടുള്ള കാള്‍സണെ ഡെമോക്രാറ്റിക് പാര്‍ട്ടിയുടെ പ്രചാരണത്തില്‍ ഉള്‍പ്പെടുത്തിയത് അംഗീകരിക്കാനാവില്ലെന്ന് സ്റ്റീവന്‍സ് പറഞ്ഞു.
ഈ സന്ദേശങ്ങള്‍ തങ്ങളെ ആഴത്തില്‍ വേദനിപ്പിച്ചതായി കറുത്തവര്‍ഗക്കാരായ വോട്ടര്‍മാരും ജൂത വോട്ടര്‍മാരും ഉള്‍പ്പെടെയുള്ളവര്‍ നേരിട്ട് അറിയിച്ചിരുന്നുവെന്നും അവരുടെ ആശങ്കകള്‍ അവഗണിക്കാതെ കേള്‍ക്കേണ്ടതായിരുന്നുവെന്നും അവര്‍ വ്യക്തമാക്കി.
ജൂത അമേരിക്കക്കാരെക്കുറിച്ചുള്ള ഹസന്‍ പൈക്കറുടെ പരാമര്‍ശങ്ങളും വിവാദമായിരുന്നു. ഇത്തരത്തിലുള്ള പരാമര്‍ശങ്ങള്‍ നടത്തിയിട്ടുള്ള പൈക്കറിനൊപ്പം അല്‍ സയ്യദ് പ്രചാരണത്തിനിറങ്ങിയതും തന്റെ ആശങ്ക വര്‍ധിപ്പിച്ചതായി സ്റ്റീവന്‍സ് പറഞ്ഞു. പൈക്കറിനെ പ്രചാരണത്തില്‍ ഉള്‍പ്പെടുത്താനുള്ള അല്‍ സയ്യദിന്റെ തീരുമാനം അദ്ദേഹത്തിന്റെ രാഷ്ട്രീയ വിവേചനശേഷിയെക്കുറിച്ചും വിവിധ വിഭാഗങ്ങളെ ഒന്നിപ്പിക്കാനുള്ള കഴിവിനെക്കുറിച്ചും ഗൗരവമായ ചോദ്യങ്ങള്‍ ഉയര്‍ത്തുന്നതാണെന്നും അവര്‍ ആരോപിച്ചു.
അതേസമയം, വിവാദത്തില്‍ തന്റെ പ്രതിശ്രുത വരനെയും വലിച്ചിഴച്ചതിനെ സ്റ്റീവന്‍സ് വിമര്‍ശിച്ചു. തന്റെ രാഷ്ട്രീയ തീരുമാനം മറ്റാരെങ്കിലും എടുത്തതാണെന്ന തരത്തിലുള്ള ആരോപണങ്ങള്‍ സ്ത്രീകളോടുള്ള വിവേചനമാണെന്നും രാഷ്ട്രീയ വിശകലനത്തിന്റെ പേരില്‍ അവതരിപ്പിക്കുന്ന ഇത്തരം സമീപനങ്ങളെ അംഗീകരിക്കാനാവില്ലെന്നും അവര്‍ പറഞ്ഞു.
തന്റെ നിലപാടിനെതിരെ ഡെമോക്രാറ്റിക് നേതാക്കള്‍ നടത്തിയ പ്രതികരണവും തന്നെ ഏറെ അസ്വസ്ഥയാക്കിയതായി സ്റ്റീവന്‍സ് പറഞ്ഞു. തീരുമാനത്തെക്കുറിച്ച് ചര്‍ച്ച ചെയ്യുന്നതിനുപകരം നേതാക്കള്‍ തന്റെ ഉദ്ദേശ്യങ്ങളെ ചോദ്യം ചെയ്യുകയും പാര്‍ട്ടിയില്‍നിന്ന് പുറത്താക്കാനുള്ള നീക്കങ്ങള്‍ നടത്തുകയും ചെയ്തുവെന്നാണ് അവരുടെ ആരോപണം.
'ഭിന്നാഭിപ്രായങ്ങളെ ശിക്ഷിച്ചുകൊണ്ട് ഉള്‍ക്കൊള്ളലിനെക്കുറിച്ച് നമുക്ക് പ്രസംഗിക്കാനാവില്ല. സ്വന്തം പാര്‍ട്ടിക്കുള്ളിലെ അഭിപ്രായവ്യത്യാസങ്ങള്‍ പോലും അംഗീകരിക്കാന്‍ കഴിയുന്നില്ലെങ്കില്‍ വിഭജിക്കപ്പെട്ട രാജ്യത്തെ ഒന്നിപ്പിക്കാമെന്ന് വാഗ്ദാനം ചെയ്യാനും കഴിയില്ല. ജനങ്ങളുടെ ആശങ്കകള്‍ക്ക് ഇടമില്ലെന്ന തോന്നല്‍ സൃഷ്ടിച്ചുകൊണ്ട് ദീര്‍ഘകാലം നിലനില്‍ക്കുന്ന ഭൂരിപക്ഷം കെട്ടിപ്പടുക്കാനും സാധിക്കില്ല,' സ്റ്റീവന്‍സ് കുറിച്ചു.
പാര്‍ട്ടിക്കുള്ളിലെ അഭിപ്രായവ്യത്യാസങ്ങളെ അംഗീകരിക്കാനും വിവിധ വിഭാഗങ്ങളുടെ ആശങ്കകള്‍ക്ക് പ്രാധാന്യം നല്‍കാനും ഡെമോക്രാറ്റിക് നേതൃത്വം തയ്യാറാകണമെന്ന സന്ദേശത്തോടെയാണ് അവര്‍ കുറിപ്പ് അവസാനിപ്പിച്ചത്.