വാഷിംഗ്ടണ്‍: സ്വതന്ത്ര വ്യാപാരത്തിനാണ് താന്‍ പിന്തുണ നല്കുന്നതെന്നും പ്രസിഡന്റ് ഡൊണള്‍ഡ് ട്രംപ് തീരുവ ഏര്‍പ്പെടുത്തുന്നത് ഒഴിവാക്കാന്‍ താന്‍ ശ്രമിച്ചെങ്കിലും അത് വിജയിച്ചില്ലെന്നും എലോണ്‍ മസ്‌ക് വ്യക്തമാക്കി. സെരോദ സ്ഥാപകന്‍ നിഖില്‍ കാമത്ത് അവതരിപ്പിക്കുന്ന 'പീപ്പിള്‍ ബൈ ഡബ്ല്യു ടി എഫ്' പോഡ്കാസ്റ്റില്‍ സംസാരിക്കുകയായിരുന്നു മസ്‌ക്.
പ്രസിഡന്റ് തീരുവകളെ വളരെ ഇഷ്ടപ്പെടുന്നുവെന്ന് അദ്ദേഹം വ്യക്തമാക്കിയിട്ടുണ്ടെന്നും ഈ നിലപാടില്‍ നിന്ന് പിന്തിരിപ്പിക്കാന്‍ താന്‍ ശ്രമിച്ചിട്ടുണ്ടെങ്കിലും വിജയിച്ചില്ലെന്നും മസ്‌ക് പറഞ്ഞു.
സാധാരണയായി സ്വതന്ത്ര വ്യാപാരം കൂടുതല്‍ കാര്യക്ഷമമാണെന്നും വ്യക്തി തലത്തിലും നഗരങ്ങളിലുമോ സംസ്ഥാനങ്ങളിലുമോ തീരുവകള്‍ വേണമെന്ന് ആഗ്രഹിക്കുമ്പോള്‍ ്അത് ജീവിതവും സമ്പദ്വ്യവസ്ഥയും സങ്കീര്‍ണമാക്കുമെന്നും അതുകൊണ്ട് രാജ്യങ്ങള്‍ക്കിടയിലും എന്തിന് താരിഫ് വേണമെന്നും മസ്‌ക് ചോദിച്ചു.
അടുത്ത 10 മുതല്‍ 20 വര്‍ഷങ്ങള്‍ക്കുള്ളില്‍ എഐയും റോബോട്ടിക്ക്‌സും തൊഴില്‍ രംഗത്തെ മുഴുവനായും മാറ്റിമറിക്കുമെന്ന് മസ്‌ക് പ്രവചിച്ചു.
ഭാവിയില്‍ ജോലി ചെയ്യണമെങ്കില്‍ ചെയ്യാം, വേണ്ടെങ്കില്‍ വേണ്ട എന്ന അവസ്ഥയുണ്ടാകും. 20 വര്‍ഷത്തിന് ശേഷം ആളുകള്‍ 'എലോണ്‍ പറഞ്ഞ പ്രവചനം തെറ്റായിരുന്നു' എന്ന് പറയാനാണ് സാധ്യത. പക്ഷേ എന്റെ വിശ്വാസം അത് യാഥാര്‍ഥ്യമാകും. 10 അല്ലെങ്കില്‍ 15 വര്‍ഷത്തിനുള്ളില്‍ തന്നെ എഐ, റോബോട്ടിക്‌സ് പുരോഗതി തൊഴില്‍ നിര്‍ബന്ധമല്ലാത്ത ഒരു നിലയിലേക്ക് എത്തിക്കുമെന്നും മസ്‌ക് പറഞ്ഞു.
ഭാവിയിലെ ജോലിയെ ഹോബിയായുള്ള തോട്ടപ്പണി പോലെ അദ്ദേഹം ഉപമിച്ചു. നിങ്ങള്‍ക്ക് വീട്ടില്‍ പച്ചക്കറി വളര്‍ത്താം, അതേ സമയം കടയില്‍ നിന്ന് വാങ്ങുകയും ചെയ്യാം. വളര്‍ത്തുന്നത് ബുദ്ധിമുട്ടാണ്, പക്ഷേ ചിലര്‍ക്ക് അത് ഇഷ്ടമാണ്. അതുപോലെ തന്നെ ജോലിയും ഒരുപക്ഷേ ഒരു ഐച്ഛിക പ്രവര്‍ത്തിയായി മാറും.
എഐയും റോബോട്ടിക്‌സും അതിവേഗം മുന്നേറുന്നതിനാല്‍ ആളുകള്‍ക്ക് ആഗ്രഹിക്കുന്ന എല്ലാ സാധനങ്ങളും സേവനങ്ങളും ലഭ്യമാകും. ചിന്തിക്കാന്‍ കഴിയുന്നുവെങ്കില്‍ നേടാനും കഴിയും എന്ന രീതിയിലേക്ക് നാം പോകുമെന്നും മസ്‌ക് കൂട്ടിച്ചേര്‍ത്തു.
എച്ച് 1 ബി വിസ സമ്പ്രദായത്തെക്കുറിച്ചും മസ്‌ക് അഭിപ്രായപ്പെട്ടു. എച്ച് 1 ബി പ്രോഗ്രാമില്‍ ചില ദുരുപയോഗങ്ങള്‍ നടന്നിട്ടുണ്ടെന്നും ചില ഔട്ട്‌സോഴ്സിംഗ് കമ്പനികള്‍ ഈ സംവിധാനത്തെ ദുരുപയോഗം ചെയ്യുന്നതിനാല്‍ അത് നിര്‍ത്തേണ്ടതാണെന്നും മസ്‌ക് പറഞ്ഞു.
എന്നാല്‍, എച്ച് 1 ബി പ്രോഗ്രാം പൂര്‍ണ്ണമായും അടയ്ക്കണമെന്ന നിലപാട് താന്‍ പിന്തുണക്കുന്നില്ലെന്നും വലതുപക്ഷത്തിലെ ചിലര്‍ അങ്ങനെ പറയുന്നുവെങ്കിലും അതു അമേരിക്കയ്ക്കുതന്നെ ദോഷകരമായിരിക്കുമെന്നും അദ്ദേഹം വ്യക്തമാക്കി.