ജെറുസലേം: ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു പ്രസിഡന്റ് ഐസക് ഹെര്‍സോഗിനോട് ഔപചാരികമായി മാപ്പ് ആവശ്യപ്പെട്ട് കത്ത് സമര്‍പ്പിച്ചു. വര്‍ഷങ്ങളായി നീണ്ടുനില്‍ക്കുന്ന കേസുകള്‍ രാജ്യം വിഭജിക്കുകയാണെന്ന് നെതന്യാഹു കത്തില്‍ പറഞ്ഞു.
നെതന്യാഹുവിനെതിരെ 2019ലാണ് മൂന്നു വ്യത്യസ്ത അഴിമതി കേസുകള്‍ രജിസ്റ്റര്‍ ചെയ്തത്. കൈക്കൂലി, തട്ടിപ്പ്, വിശ്വാസ വഞ്ചന തുടങ്ങി നിരവധി ആരോപണങ്ങള്‍ അ്‌ദ്ദേഹത്തിനെതിരെ ഉണ്ട്. എന്നാല്‍ ആരോപണങ്ങളെല്ലാം നെതന്യാഹു ഇതുവരെ നിഷേധിക്കുകയായിരുന്നു.
തന്റെ കേസ് ഏകദേശം ആറു വര്‍ഷമായി നടക്കുന്നുണ്ടെന്നും അത് ഇനിയും വര്‍ഷങ്ങളോളം തുടരുമെന്നാണ് സൂചനയെന്നും നെതന്യാഹു വീഡിയോ പ്രസ്താവനയില്‍ പറഞ്ഞു.
വിചാരണ പൂര്‍ണമാകുമ്പോള്‍ തന്നെ വെറുതെ വിടണമെന്നായിരുന്നു ്ആഗ്രഹമെങ്കിലും സുരക്ഷയും രാഷ്ട്രീയവും ദേശീയ താത്പര്യവും വേറെയുള്ള തീരുമാനം ആവശ്യപ്പെടുന്നുവെന്നും ഇസ്രായേല്‍ രാജ്യം വലിയ വെല്ലുവിളികള്‍ നേരിടുകയാണെന്നും നെതന്യാഹു കൂട്ടിച്ചേര്‍ത്തു.
പ്രധാനമന്ത്രിയുടെ അപേക്ഷ ലഭിച്ചതായി സ്ഥിരീകരിച്ച പ്രസിഡന്റ് ഹെര്‍സോഗിന്റെ ഓഫീസ് ഇത് അസാധാരണ സ്വഭാവമുള്ളതും നിര്‍ണായക പ്രത്യാഘാതങ്ങളുള്ളതുമായ അഭ്യര്‍ഥനയാണെന്നും എല്ലാ അഭിപ്രായങ്ങളും ലഭിച്ച ശേഷം പ്രസിഡന്റ് ഉത്തരവാദിത്തത്തോടെ അപേക്ഷ പരിഗണിക്കുമെന്നും അറിയിച്ചു.
നെതന്യാഹു, വിചാരണയില്‍ സ്ഥിരമായി ഹാജരാകാനാകാത്തതിന്റെ കാരണമായി തന്റെ ഔദ്യോഗിക ഉത്തരവാദിത്വങ്ങളും രാജ്യത്തിന്റെ ഇപ്പോഴത്തെ പ്രതിസന്ധി സാഹചര്യങ്ങളും ചൂണ്ടിക്കാട്ടി. ആഴ്ചയില്‍ മൂന്ന് പ്രാവശ്യം കോടതിയില്‍ ഹാജരാകണമെന്ന ആവശ്യം 'അമിതഭാരം' സൃഷ്ടിച്ചുവെന്നും അദ്ദേഹം പറഞ്ഞു.
ആഴ്ചയില്‍ മൂന്ന് പ്രാവശ്യം ഹാജരാകുക എന്നത് അസാധ്യമായ ഒരു ആവശ്യമാണെന്ന് അദ്ദേഹം പറഞ്ഞു.
നേരത്തെ യു എസ് പ്രസിഡന്റ് ഡൊണാള്‍ഡ് ട്രംപ് പ്രസിഡന്റ് ഐസക് ഹെര്‍സോഗിന് കത്ത് എഴുതി നെതന്യാഹുവിന് മാപ്പ് നല്‍കണമെന്ന് ആവശ്യപ്പെട്ടിരുന്നു.
അതിനു മുമ്പും ട്രംപ് സമാനമായ അഭ്യര്‍ഥന നടത്തിയിരുന്നു.