കൊച്ചി: പിന്തുടര്‍ച്ചാസൂത്രണത്തിന്റെ അഭാവം മൂലം രാജ്യത്ത് കോടികള്‍ വിലമതിക്കുന്ന ആസ്തികള്‍ അവകാശികളില്ലാതെ കിടക്കുന്ന സാഹചര്യം ഗൗരവതരമാണെന്ന് കൊച്ചിയില്‍ നടന്ന 'സക്‌സഷന്‍ പ്ലാനിംഗ് കോണ്‍ക്ലേവ്' വിലയിരുത്തി. ശരിയായ ആസൂത്രണം ഉണ്ടായിട്ടില്ലാത്തതിനാല്‍ ബാങ്ക് നിക്ഷേപങ്ങള്‍, ഇന്‍ഷൂറന്‍സ് തുകകള്‍, മറ്റ് സാമ്പത്തിക നിക്ഷേപങ്ങള്‍ എന്നിവ ഉള്‍പ്പെടെ 2 ലക്ഷം കോടിയിലധികം മൂലധനം നിയമപരമായ അവകാശികളെ കണ്ടെത്താനാകാതെ നിഷ്പ്രയോജനമായിത്തീരുന്നതായി സമ്മേളനത്തില്‍ അവതരിപ്പിച്ച വിവരങ്ങളില്‍ ചൂണ്ടിക്കാട്ടി. നോമിനിയെ നിയോഗിക്കുന്നതിലൂടെ സ്വത്തിന്‍മേല്‍ അവകാശം സ്വതേ ലഭിക്കുന്നില്ലെന്നും നോമിനിക്ക് ആസ്തിയുടെ നടത്തിപ്പുകാരന്റെ പദവിമാത്രമാണെന്നും വിദഗ്ധര്‍ വ്യക്തമാക്കി.
സ്വത്ത് സംരക്ഷണവും ആശ്രിതരുടെ സാമ്പത്തിക സുരക്ഷയും ഉറപ്പാക്കുന്നതിന് വ്യക്തമായ പിന്തുടര്‍ച്ചാസൂത്രണം നിര്‍ണായകമാണെന്ന് കോണ്‍ക്ലേവ് ഏകകണ്ഠമായി അഭിപ്രായപ്പെട്ടു. ഇതിന്റെ ഭാഗമായി ബിസിനസ് കണ്‍സള്‍ട്ടന്‍സി സ്ഥാപനം കാപ്പിറ്റെയര്‍ പിന്തുടര്‍ച്ചാസൂത്രണത്തിനായി സമര്‍പ്പിതമായ 'ട്രൂ ലെഗസി' വകുപ്പിനെ അവതരിപ്പിച്ചു. ഈ മേഖലയിലെ അറിവിന്റെ കുറവും പ്രൊഫഷണല്‍ ഉപദേശകരുടെ ക്ഷാമവും ഗുരുതരമായ സാമ്പത്തിക നഷ്ടങ്ങള്‍ക്ക് വഴിവയ്ക്കുന്നുവെന്ന് കാപ്പിറ്റെയര്‍ സ്ഥാപകന്‍ ശ്രീജിത്ത് കുന്നിയില്‍ പറഞ്ഞു. അനന്തരാവകാശ നിയമങ്ങള്‍ക്ക് വിധേയമായ സാഹചര്യം ഒഴിവാക്കാന്‍ മുന്‍കൂര്‍ പ്ലാനിംഗ് അനിവാര്യമാണെന്നും അദ്ദേഹം ഓര്‍മ്മപ്പെടുത്തി.
ആസ്തി സംരക്ഷണത്തെ ഒരു ദീര്‍ഘകാല സാമ്പത്തിക ഉത്തരവാദിത്തമായി കാണണം എന്ന അഭിപ്രായം ഈസ്‌റ്റേണ്‍ ഗ്രൂപ്പ് ചെയര്‍മാന്‍ നവാസ് മീരാന്‍ ഉള്‍പ്പെടെയുള്ള വ്യവസായനേതാക്കള്‍ ഉന്നയിച്ചു. ബിസിനസുകളില്‍ നേതൃത്വം കൈമാറ്റം സുസ്ഥിരമാക്കുന്നതിനായി അടുത്ത തലമുറയെ തീരുമാനമെടുക്കല്‍ പ്രക്രിയയിലേക്ക് പ്രാപ്തരാക്കേണ്ടതുണ്ടെന്നും അവര്‍ ചൂണ്ടിക്കാട്ടി. ഇന്ത്യയും മിഡില്‍ ഈസ്റ്റും ഉള്‍പ്പെടെ 450ലധികം ബിസിനസ് ഉടമകളുടെ പങ്കാളിത്തത്തോടെ നടന്ന കോണ്‍ക്ലേവ്, പിന്തുടര്‍ച്ചാസൂത്രണത്തിന്റെ രാജ്യവ്യാപക പ്രാധാന്യം വീണ്ടും വ്യക്തമാക്കിയതായി സംഘാടകര്‍ അറിയിച്ചു. ചടങ്ങില്‍ ശ്രീജിത്ത് കുന്നിയിലിന്റെ 'A Journey of an Etnrepreneur' എന്ന പുസ്തകവും പ്രകാശനം ചെയ്തു.
പിന്തുടര്‍ച്ചാസൂത്രണത്തിന്റെ അഭാവം മൂലം കോടികളുടെ ആസ്തികള്‍ അവകാശികളില്ലാത്ത നിലയില്‍
