ഇസ്ലാമാബാദ് : അന്താരാഷ്ട്ര സമാധാനപാലക ദൗത്യത്തിന്റെ ഭാഗമായി ഗാസയിലേക്ക് പാകിസ്ഥാന്‍ സേന പോകാന്‍ തയ്യാറാണെന്ന് ഉപപ്രധാനമന്ത്രി ഇഷാഖ് ദാര്‍ സ്ഥിരീകരിച്ചു. എന്നാല്‍ ഹമാസിനെ ആയുധരഹിതരാക്കുക എന്നത് പാകിസ്ഥാന്റെ ഉത്തരവാദിത്വമല്ലെന്നും അദ്ദേഹം വ്യക്തമാക്കി.
യു.എന്‍. സുരക്ഷാ കൗണ്‍സില്‍ നിര്‍വചിച്ച വ്യക്തമായ അധികാരപരിധിയുള്ള അന്താരാഷ്ട്ര സമാധാന സേന രൂപീകരിക്കപ്പെട്ടാല്‍ മാത്രമേ പാക് സേനയെ വിന്യസിക്കാനാകൂ എന്നാണ് ദാര്‍ വ്യക്തമാക്കിയത്. 'പാകിസ്ഥാന്റെ ജോലി സമാധാന പരിരക്ഷണം മാത്രമാണ്; സമാധാനം പ്രാബല്യത്തിലാക്കുക എന്നതല്ല,' അദ്ദേഹം പറഞ്ഞു. ഹമാസിനെ നേരിടുന്നത് പാലസ്തീന്‍ സുരക്ഷാ സംവിധാനങ്ങളുടെ ചുമതലയാണെന്നും ദാര്‍ കൂട്ടിച്ചേര്‍ത്തു.
ഇന്റലിജന്‍സ് വിലയിരുത്തലുകള്‍ പ്രകാരം പാകിസ്ഥാന്‍, ഇന്‍ഡോനേഷ്യ, അസര്‍ബൈജാന്‍ എന്നീ രാജ്യങ്ങള്‍ ഗാസയിലെ ഭാവി സേനാവിന്യാസത്തിനായി പരിഗണിക്കുന്നതായാണ് സൂചന. ഇപ്പോഴത്തെ സംഘര്‍ഷം ശമിച്ച ശേഷമായിരിക്കും ഇത്തരം ഒരു നീക്കം.
അതേസമയം, ഗാസയില്‍ പാക് സേനയുടെ സാന്നിധ്യം അമേരിക്ക-ഇസ്രായേല്‍ തന്ത്രങ്ങള്‍ക്ക് പിന്തുണ നല്‍കുന്നതായി തോന്നാന്‍ സാധ്യതയുണ്ടെന്ന് കരുതി ഇറാന്‍, തുര്‍ക്കി, ഖത്തര്‍ എന്നീ രാജ്യങ്ങള്‍ എതിര്‍പ്പ് പ്രകടിപ്പിച്ചേക്കാമെന്ന വിലയിരുത്തലുകളും ഉയരുന്നു. പാക് സേനയുടെ വിന്യാസം രാജ്യത്തിനുള്ളിലെ ഇസ്ലാമിസ്റ്റ് ഗ്രൂപ്പുകളില്‍ അസംതൃപ്തി സൃഷ്ടിക്കാമെന്നും വിദഗ്ധര്‍ മുന്നറിയിപ്പു നല്‍കുന്നു.
കഴിഞ്ഞ ആഴ്ച യു.എന്‍. സുരക്ഷാ കൗണ്‍സില്‍ അമേരിക്ക തയ്യാറാക്കിയ ഗാസ സമാധാന പദ്ധതി അംഗീകരിച്ചിരുന്നു. ഡോണള്‍ഡ് ട്രംപ് അവതരിപ്പിച്ച ഈ പദ്ധതിയില്‍ അന്താരാഷ്ട്ര സമാധാന സേനയ്ക്ക് അനുമതി നല്‍കിയിരുന്നു. റഷ്യയും ചൈനയും വിട്ടുനിന്നപ്പോള്‍ പാകിസ്ഥാനുള്‍പ്പെടെ 13 രാജ്യങ്ങള്‍ അനുകൂലിച്ചു.
അതേസമയം, പ്രതിരോധ ഗ്രൂപ്പുകളെ ആയുധരഹിതരാക്കാന്‍ ശ്രമിക്കുന്ന ഏതൊരു അന്താരാഷ്ട്ര സേനയെയും ഹമാസ് എതിര്‍ക്കുന്നുവെന്ന് സംഘടന വ്യക്തമാക്കി.
യു.എ.ഇയും മറ്റ് ഗള്‍ഫ് രാജ്യങ്ങളും പാക് പൗരന്മാര്‍ക്ക് വിസ നല്‍കുന്നതില്‍ കര്‍ശനമായ നിലപാട് സ്വീകരിക്കുന്നതിനെക്കുറിച്ചും ദാര്‍ പ്രതികരിച്ചു. കുറ്റകൃത്യങ്ങളില്‍ ഏറ്റവും കൂടുതല്‍ കുടുങ്ങുന്നവര്‍ പാകിസ്ഥാനികളാണെന്നു അവരുടെ ആഭ്യന്തര റിപ്പോര്‍ട്ടുകള്‍ കാണിക്കുന്നുവെന്നും അദ്ദേഹം പറഞ്ഞു. ഒരുകാലത്ത് ഉദ്യോഗസ്ഥര്‍ക്കും മന്ത്രിമാര്‍ക്കും പോലും വിസ നിഷേധിച്ച സാഹചര്യം ഉണ്ടായിരുന്നുവെന്നും ദാര്‍ വെളിപ്പെടുത്തി.
സൗദിയില്‍ പ്രവര്‍ത്തിക്കുന്ന ഭിക്ഷാടനം റാക്കറ്റുകളിലും ഏറ്റവും കൂടുതല്‍ പിടിയിലാകുന്നത് പാകിസ്ഥാനികളാണെന്ന് അദ്ദേഹം സമ്മതിച്ചു.
ഗാസയിലേക്ക് സേനയെ അയയ്ക്കാന്‍ തയ്യാര്‍; പക്ഷെ; ഹമാസിനെ ആയുധരഹിതരാക്കുന്നത് ഞങ്ങളുടെ ജോലി അല്ല'- പാക് മന്ത്രി
